1 ኢዮቢ፥ «ታኒ ጺሎ ኣሳ» ጊዛ ቆፋ ላሞንታ ጊሻስ ሄ ኣሳቲ ኢዛ ዞሪዛይሳ ኣጊዳ። 2 ኤራማ ዜሬፌ ቡዜ ዴሬ ኣስ ባራኬሌ ና ኤሊሁይ ኢዮቢ ባና ጾሳፌ ኣዲ ጺሊሲዳ ጊሻስ ኢዮቤ ቦላ ኬሂ ሃንቄቲዴስ። 3 ቃሴካ ኢዮቤ ላጌ ሄቲ ኢዮቤ ቦላ ፒርዳፌ ኣቲን ኢዛ ኣማንዛ ቃላ ዮቲ ኣማንንታ ጊሻስ ኢስታ ቦላካ ሃንቄቲዴስ። 4 ኤሊሁይ ሃንኮይታፔ ዬላጋ ጊዲዳ ጊሻስ ሃንኮይቲ ባንታስ ዲዛይሳ ሃሳዪ ዉርሳናሼ ጋካናስ ኢዮቤራ ሃሳያናዉ ባ ታራ ናጎ ቦላ ዴስ። 5 ኢዮቤ ላጌ ሄቲ ኢዮቤስ ቤሲዛ ዛሮ ኢማናስ ዳንዳዮንታይሳ ቤኢዲ ኬሂ ሃንቄቲዴስ።

6 ቡዜ ዴሬ ኣስ ባራኬሌ ና ኤሊሁይ፥

«ታኒ ኢንቴፌ ዬላጋ ጊዲዳ

ጊሻሲኔ

ኢንቴ ጪማ ጊዲዳ ጊሻስ

ፖኮይኔ ያሺ ታና ኦይኪን

ሃኖ ጋካናስ

ታ ቆፋ ቆንጪሶንታ ጋምኣዲስ።

7 ‹ጪማቲ ሲንቲ ሃሳዬቶ፤

ባንታ ላይን ዴሚዳ

ኣ ኤራቴፌ ታማርሴቶ›

ጋ ቆፓዲስ።

8 ጊዶ ኣቲን ኣሳ ጊዶን ኣቂዲ

ኣ ኤራቴ ኣሳስ ኢሚዛይ

ኡባ ዳንዳይዛ ጾሳ ኣያና።

9 ኣስ ኣ ኤራንቻ ኬሲዛይ

ጪማቴ ጊዴና፤

ቃሴካ ኣሲ ኣኬካናስ

ዳንዳይዛይ

ኢዛዴስ ላይ

ኣዱቂዳ ጊሻስ ጊዴና።

10 «ሄሳ ጊሻስ ሎኤ ሲዪቴ፤

ታኒካ ታ ቆፋ ኢንቴስ ዮታና።

11 ኢንቴ ሃሳይዛ ዎዴ

ታኒ ጮኡ ጋዳ ኤዝጋይስ፤

ኢንቴ ሃሳያና ቃላ

ቆፒሺንካ ታኒ ናጋይስ።

12 ታኒ ኢንቴ ሃሳይዛይሳ

ሎኤ ሲያዲስ፤

ጊዶ ኣቲን ኢንቴፌ

ኦኒካ ኢዮቢ ሞራንቻ

ጊዲዳይሳ ኣማንዳይኔ

ቃሴካ ኢዛ ሃሳያስ

ቤሲዛ ዛሮ ኢሚዳይ ዴና።

13 ኢዮቤ ሃሳያስ ቤሲዛ ዛሮ

ኢማናስ ዳንዳይዛይ

ጾሳፌ ኣቲን ኣስ ጊዶንታ ጊሻስ

ኢንቴ፥ ‹ኑኒ ኣ ኤራቴ

ዴሚዶስ› ጊዲ

ጮ ሃዳ ጬቄቶፍቴ።

14 ኢዮቢ ማርሼቲዳይ

ኢንቴናራፔ ኣቲን

ታናራ ጊዴና፤

ታኒካ ኢንቴ ሃሳይዛይሳ ማላን

ኢዛስ ዛሮ ኢሚኬ።

15 «ኢስቲ ዳጋሚዲ

ሃሳይዛ ቃላይ ይዳ ጊሻስ

ኣይኮ ሃሳያናዉ

ዳንዳይቤቴና።

16 ሄኮ! ኢስቲ ሃሳይዛ ሚሺ

ዪን ጮኡ ጊዲ ኤቂዳ፤

ሂስቲን ታኒካ ጮኡ ጋ

ናጋናሲ ታስ ቤሲዜ?

17 ኣካይ! ጮኡ ጊኬ፤

ታኒካ ታ ባጋራ ዲዛ

ዛሮዛ ኢማና፤

ታ ቆፋካ ቆንጪሳና።

18 ታ ሃሳያናስ ቤሲዛዚ

ዳሮይ ዲዛ ጊሻስ፤

ታናን ዲዛ ኣያናይ

ታና ዎልቃራ ሃሳይሴስ።

19 ቤኢቴ! ታኒ ሃሳዮንታ ኣጊኮ

ዎይኔ ጫጄ ዎዛ

ኦራ ሉካሞይ

ሼምፒዛሶ ይዲ

ቃናስ ፑሪዛይሳ ማላ

ታ ጊዶይ ፑሪዲ

ቃና ጋኪዴስ።

20 ኣኔ! ታኒ

ሃይሳፌ ሃሳያዳ ሼምፓይስ፤

ታ ዶና ዶያዳ

ታኒ ሃሳያናስ ቤሴስ።

21 ሃይሳ ሃ ዮኦዛን

ታኒ ኦናካ ማዲኬ፤

ዎይኮ ኣይ ኣሳካ ኣዳሺኬ።

22 ታኒ ኣስ ኣዳሾይ ሙሌካ ሃኔና፤

ታ ሄሳ ማላ ኦኮ

ታና ሜዳይሲ

ታና ሃንቃና።