ኤልፋዜ ሃሳያ
1 ቴማኔ ዴሬ ኣስ ኤልፋዜይ
ሂዝጊ ዛሪዴስ፤
2 «ኣሲ ጾሳ ጎኣናዉ ዳንዳይዜ?
ሃራይ ኣቶሺን
ኤራ ኣስ ጊዲኮካ
ጎኣዚ ኢዛዴሳፌ ኣቲን
ጾሳስ ጊዴና።
3 ኔ ጺሎቴ ኡባ ዳንዳይዛ
ጾሳ ኣይ ጎኣኔ?
ዎሶይ ባይንዳ ኔ ዴኦዚ
ኢዛ ኣይ ማዳኔ?22፡2-3 ኢዮ 35፡6-8
4 ሂስቲን ኔ ቦላ ኢዚ ፒርዲዳይኔ
ሃይሳ ኔና ሃንቂዳይ
ኔኒ ጾስ ያዪዛ ጊሻሴ?
5 ሃይሲ ኡባይ ኔና ጋኪዳይ
ኔ ኢታቴ ዳሪዳ
ጊሻሲኔ
ኔ ናጋራይ ዛዋይ ባይንዳይሳ
ጊዲዳ ጊሻስ ጊዴኔ?
6 ኢሲ ጋሶይካ ባይንዳ
ኔ ኢሻታፔ ኦይሶ ኤካዳሳ፤
ቃሴ ኢስታ ማይኦ ቃራ ኤካዳ
ኢስታ ካሎ ኣሻዳሳ።
7 ጋፊዲኔ ሳሜቲዲ ዳቡርዳይታ
ካኔ ሃ ዲጋዳሳ።
8 ኔ ጋዳዴኔ ዎልቃማ
ኣስ ጊዳዳ
ኢዛን ዲዛ ቦንቾ
ኣስ ጊዲኮካ፥
9 ኔኒ ኣምኤ ማጫሳታ
ሜላ ኩሼ ዬዳዳሳ፤
ዪኦ ናይቲካ
ባና ኣይሳና ዴኦዛ ይሳዳሳ።
10 ሃይሳ ጋሶን
ኔና ኦይካና ዎጺማዴይ
ኔና ዩዪ ኣዴስ፤
ኔ ኤዝጎንታ
ሜቶይ ኔና ዳጋንና።
11 ኔና ጼሎይ ሜታና ጋካናስ
ኔስ ሚዴስ፤
ዲኦ ሃካ ኔና ሜጪዴስ።
12 «ጾሳይ ቃ ሳሎን
ዲዛይሳ ጊዴኔ?
ጾሊንቴቲ ኣይኮካ
ቃሶሆን ዲኮካ
ኢዚ ኢስታፌ ቦላራ ዲዲ
ኢስታ ጼሌስ።
13 ኔኒ ጊዲኮ፥ ‹ጾሲ ኣይ ኤሪዜ?
ጊርዲ ጊዳ ማን
ኢዚ ዋኒ ኑ ቦላ
ፒርዳናዉ ዳንዳይዜ?
14 ሳሎ ቦላን ኢዚ ሲሜሬቲሺን
ፒ ጊዳ ሻራይ
ኢዛ ካሚዛ ጊሻስ
ኢዚ ቤያናዉ ዳንዳዬና› ጋሳ።
15 «ናጋራንቻቲ ሲሜሬቲዛ
ቤኒ ኦጌዛ ኔ ካላይ?
16 ኢስቲካ ዎዴይ ጋኮንታ
ሲንራ ቦሻን ሾጬቲዳ፤
ዲኦንካ ሜጬቲዲ
ጻጶራ ይዳ።
17 ኢስቲካ ኡባ ዳንዳይዛ ጾሳ፥
‹ኑፔ ኔ ሃካ፤
ኔ ኑስ ኣይ ኦናስ
ዳንዳያይ?› ጊዳ።
18 ጊዲኮካ ኢስታ ኬ
ዱሬቴን
ኩንዳይ ጾሳ።
ሄሳ ጊሻስ ታኒ
ኢታ ኣሳታ ቆፋ ኤኪኬ።
19 «ኪያ ኣሳቲ ኢታ ኣሳቲ
ቃጻዬቲሺን
ቤኢዲ ኡፋዬቴቴስ፤
ሱሬ ኣሳቲ ኢስታ ቦላ ቂልጬቴስ፥
20 ‹ቱንካ ኑ ሞርኬቲ ይዳ፤
ኢስታ ሃሮዚ ኩሜ
ታማን ጹጌቲዴስ።›
21 «ሄሳ ጊሻስ ኢዮቤ
ኔናቴ ጾሳስ ሃሪሳ፤
ኢዛራካ ኔ ሳሮን ዳ፤
ኔ ሃይሳ ኦኮ
ሎኦ ሚሽ ዴማና።
22 ጾሲ ኔስ ኢሚዛ ቲሚርታ ኤካ፤
ኢዛ ቃላካ ኔ ዎዚናን ዎ።
23 ኔናቴ ኡባ
ዳንዳይዛ ጾሳኮ
ኔ ዛሪዳኮ፥
ኔ ካሴ ማላ ሃናና፤
ኔ ሶፔ ኢታ ኦሶ ዲጋ።
24 ዎርቃ ጉዱላን ኦላ፤
ኦፊሬ ዎርቃ
ሻፋ ሹቻ ማላ
ዎራ ኦላ።
25 ሄ ዎዴ ኡባ ዳንዳይዛ
ጾሳይ ኔስ
ዎርቃኔ ሙሩታ ቢራ ጊዳና።
26 ሄ ዎዴ ኡባ ዳንዳይዛ ጾሳን
ኔኒ ኡፋዬታና፤
ኢዛን ኣማኔታዳ ኔ ዳና።
27 ኔ ኢዛኮ ዎሲዛ ዎዴ
ኢዚ ኔ ዎሳ ሲያና፤
ኔ ኣዲኔቲዳይሳ ኢዛስ ጋና።
28 ኔ ቆፋይ ኡባይ ኔስ ፖሌታና፤
ኔስ ኦጌ ኡባይ ፖኦ ጊዳና።
29 ጾሲ ኦቶራንቻታ ካዉሻና፤
ኣሽኬታ ጊዲኮ ኢዚ ኣሻና።
30 ኔኒካ ሱሬ ዎዚናይ
ዲዛዴ ጊዲኮ
ጾሲ ኢታ ኡባፌ ኔና ናጋና፤
ኔ ኩሼቲካ ቆሆ ኦሶፔ
ጌሽ ጊዲኮ
ጾሲ ኔና ኣሺ ኤካና።»