ኢዮቤ ማጻፋ 40

1 ቃሴካ ጾሲ ኢዮቤስ፥

2 «ኢዮቤ! ኣሲ ኡባ

ዳንዳይዛ ጾሳራ ማርሼቲዲ

ላና ኔስ ሚሳቲዜ?

ታናራ ጾሳራ ማርሼቲዛይ

ኔና ጊዲዳ ጊሻስ

ኣኔ ታስ ዛራ» ጊዴስ።

3 ኢዮቢ ዛሪዲ፥

4 «ጎዶ! ታኒ ኣይኮ ማዶንታ

ላፋ ኣሳ፥

ሃኒፌ ጉዬ ታ ኩሼን

ታ ዶና ጎርዳዳ፤

ጮኡ ጉሳፌ ኣቲን

ኔስ ታ ዛራና ዛሮይ

ታስ ዴና።

5 ታኒ ኢሲቶ ጋናይሳ ጋዲስ፤

ጊዶ ኣቲን ታስ

ዛሪዛ ሚሺ ባዋ፤

ሃይሳፌ ጉዬ ኡባካ

ታ ሃሳይኬ» ጊዴስ።

6 ሄሳፌ ጉዬ ጎዳይ

ጎቴ ጫርኮ ጊዶን ጊዲዲ

ኢዮቤስ ሂዝጊዴስ፥

7 «ኣኔ ኣዴ ጊዲኮ ዴንዳዳ ጊጼታ፤

ታ ኦይቺዛይሳ ታስ ዛራ።

8 ታና ፒርዳ ጌላሲዛዴ ኬሳዳ

ኔና ጺሎ ኣስ ኬሳናስ ዳፌታይ?

9 ጾሳ ዎልቃ ማላ

ሚኖ ዎልቃይ ኔስ ዲዜ?

ጾሳ ቃላ ጉን ማላ

ኔ ቃላይ ጉማናዉ

ዳንዳይዜ?

10 ሄሳ ማላ ጊዲኮ

ኣኔ ኔ ቦንቾኒኔ

ኔ ጊታቴን ዴንዳ!

ኔ ቴማቴኔ

ጊታቴ ማይኣ።

11 ኦቶራንቻታ ቤያዳ ካዉሻ፤

ኔ ሃንቆዛ ኢስታ ቦላ ጉሳ።

12 ኣኔ ሎኤ ጼላዳ

ኦቶራንቻታ ኡባ ዬላቻ፤

ኢታ ኦዛይታ

ኢስቲ ዲዛሶን ሄን ይሳ።

13 ኢስታ ኡባ ሞጎ ማይኦን ጻጻዳ

ኢሲ ቦላ ዱፎን ሞጋ።

14 ሄሳፌ ጉዬ ኔኒ

ኔ ዎልቃን ጾኒዛይሳ

ታኒ ኔስ ማርካታና።

15 «ታኒ ኔና ሜዳይሳ

ሆሪቄ ጌቴቲዛ

ዶኣ ሜዲስ፤

ኢዚካ ቦራ ማላ ማታ ሜስ።

16 ኢዛስ ጼሳን ዲዛ ዎልቃ ቤያ፤

ኢዛስ ኡሎ ጊዶን ዲዛ

ሻያ ሚኖቴ ጼላ።

17 ኢዛስ ጎይናይ

ሊባኖሴ ዚጋ ሚ ማላ

ሲቲ ጊዳይሳ፤

ኢዛስ ጌዳ ጻጶቲካ

ሚኖኔ ኦርዴታ።

18 ኢዛ ሜቄቲካ ጻርቂማላኔ

ቢራታ ማርጮ ማላ ሚኖታ።

19 ታ ሜዳ ሜታ

ኡባፌ ዎልቃማ፤

ታፔ ኣቲን ኢዛ ጾናናይ

ሃራይ ዴና።

20 ዎራ ዶኣቲ ኡባይ ካኢዛ ዙማይ፥

ኢዛስ ሚዛ ሚሽ ሞኪሴስ።

21 ኩዋይ ዲዛ ሚ ጋርሳን፥

ማቃ ጊዶኒኔ

ሃ ዲዛሶ

ጫሬ ጊዶን ኢቼስ።

22 ኩዋይ ዲዛ ሚቲ

ኢዛ ባንታ ኩዋን ጌንቴስ፤

ሻፋ ዶናን ዲጪዛ ሚቲ

ኢዛ ካሜቴስ።

23 ሻፋ ሃ ኪጻስ

ኢዚ ዳጋሜና፤

ዮርዳኖሴ ሻፋይ

ኬሂ ኩሚዲ ጎጊንካ

ኢዚ ያዬና።

24 ኢዛ ኣይፌታ ቶይሲዲ

ኢዛ ኦይካና ኣሲ ዲዜ?

ኢዛ ሲካ ዳፎን ቃቺዲ

ኢዛ ኦይካናስ ዳንዳይዛይ ኦኔ?