Jó 23

ኢዮቤ ሃሳያ

1 ኢዮቢካ ሂዝጊ ዛሪዴስ፤

2 «ሃኢካ ታ ዎዚናይ

ጫሞ ቆፋኒኔ

ዙዙንን ኩሚዴስ፤

ጌንጬጫን ታ ዎሲንካ

ኢዛ ኩሼይ ታ ቦላ

ዴጺዳ ማላ ዴስ።*23፡2 ኢዛ ኩሼይ ታ ቦላ ዴጺዳ ማላ ዴስ ጊዛይሲ ኢብራዌታ ማጻፋን ታ ኩሼ ፑዴ ዴንናስ ታና ዴጼስ ጌስ።

3 ኢዚ ዲዛሶታ ኤሪዳኮ

ኣይ ማላ ዶሳዚናሺን፤

ጌዴ ኢዚ ዲዛሶ ጋኪዳኮ

ታ ኣይ ማላ ኡፋዬታኔሺን፤

4 ታ ማጋና

ታ ኢዛስ ሺሻናኮሺን፤

ታ ሚሻዛ ማራራ

ታ ኢዛስ ሺሻናኮሺን።

5 ታስ ኢሜቲዛ ዛሮዛካ

ታ ኤራናኮሺን፤

ታና ኢዚ ኣይ ጋናኮ

ታ ኤራናኮሺን።

6 ሂስቲን ጾሲ ባ ጊታ ዎልቃራ

ታና ፒርዳንዴሻ?

ኣካይ፤ ታ ጊዛይሳ ኢዚ ኤዝጋና።

7 ሄንካ ሱሬ ኣሲ

ኢዛራ ማርሼታና፤

ታስ ፒርዲዛ ጾሳይ

ሜርናስ ታና ናጻ ኬሳና።

8 «ጊዶ ኣቲን ታ ኣርሼይ ሞኪዛ ባጋ

ቢኮ ሄን ኢዚ ዴና፤

ኣርሼይ ዉሊዛ ባጋካ ሲሚኮ

ኢዛ ዴማናዉ ዳንዳይኬ።

9 ኢዚ ጊዲኮ ፑዴሃን

ባ ኦሳ ኦስ፤

ታኒ ጊዲኮ ኢዛ ቤያናዉ

ዳንዳያቤኬ፤

ዱጌ ባጋ ሲማዳካ

ኢዛ ዴማናዉ

ዳንዳያቤኬ።

10 ኢዚ ታ ታንጎ ኡባ ኤሬስ፤

ታና ኢዚ ፓጪኮካ

ታኒ ዎርቃ ማላ ጌሽ ጊዳ ዲሺን

ኢዚ ታና ዴማና።

11 ታ ቶሆቲ

ኢዚ ዶሲዛ ኦጌታራ ቤቴስ፤

ባሌን ሃዲርሲካ

ኡሻቺካ ጊኬ።

12 ታኒ ኢዛ ኣዛዞታፔ ኬኢኬ፤

ኢዛ ቃላካ

ታ ሚዛ ቁማፔካ ኣዳ

ታ ዎዚናን ናጋዲስ።

13 «ኢዚ ባርካ ባና ዳንዳይ ዴስ፤

ኢዛራ ኤቄታናይ ዴና፤

ኢዚ ባ ዶሲዳይሳ ኡባ

ኦሶ ዳንዳዬስ።

14 ታ ቦላ ኢዚ ቆፒዳይሳ

ኡባ ፖላና፤

ሃይሳ ሚሳቲዛ

ዳሮ ቆፋቲ ዴቴስ።

15 ሄሳ ጊሻስ ኢዛ ሲንን

ኤቆይ ኬሂ ያሼስ፤

ታ ሃይሳ ቆፓዳ ያያዲስ።

16 ጾሲ ታስ

ዎዚናይ ዳቡራና ማላ

ኦዴስ፤

ኡባ ዳንዳይዛ ጾሳይ

ታና ዳጋንዴስ።

17 ጊርዲ ጊዳ ማይ

ታ ኣይፌታ ጎዚኮካ፤

ሳካና ማይ ታ ሃሳዮንታ ማላ

ታና ዲጊቤና።