1 ቴማኔ ዴሬ ኣስ ኤልፋዜይ ሂዝጊ ዛሪዴስ፤

2 «ኢዮቤ! ኢሲ ኣሲ ኔ ቦላ

ዎልቃ ሃሳይኮ

ኢዛዴ ኔ ዳንዳያን ኤዝጋኔ?

ሃሳያናፔ ኣቲን

ኦኒ ኣጋኔ?

3 ኔኒ ዳሮ ኣሳታ ታማርሳዳሳ፤

ዳቡርዳ ቄሴታካ ሚንዳሳ።

4 ካሴ ኔ ቃላቲ ጴቲዛይታ

ማዴቴስኮሺን፤

ኔኒ ኮኮሪዛ ጉልባቴታካ

ሚንሳኮሺን።

5 ሃኢ ጊዲኮ ሜቶይ

ኔ ቦላ ጋኪዳ ጊሻስ

ሂዶታይ ባይንዳዴ ጊዳዳሳ፤

ሜቶይካ ኔ ቦላ

ሚኒዳ ጊሻስ

ሂዶታ ቃንጻዳሳ።

6 ጾሳስ ኔ ያዪዛ ያሻይ

ኣማንዛዝ ጊዴኔ?

ኔ ሱሬ ኦጌቲካ

ኔስ ሂዶታታ ዴቴኔ?

7 ጺሎ ኣስ ጊዲ ዲሺን

ኢዛ ሜቶይ ጋኪዳዴይ፥

ሱሬ ኣስ ጊዲ ዲሼ

ቲምኢ ጊ ይዳዴይ፥

ዲኮ ኣኔ ቆፓ።

8 ታኒ ኣኬኪዳ ማላ፥

ኢታቴ ጎዪዲ ሜቶ ዜሪዛይቲ

ሄይታንቲ ባ ኦሮ

ሺሻና።

9 ኢስቲ ጾሳ ፔኖን ያና፤

ኢዛ ሃንቆ ዳምባላን

ኢስቲ ዲፒ ጊ ያና።

10 ኢታቲ ጋሞ ማላ ጻጋና፤

ባ ቃላ ቁ ኦዲ

ዋሳና፤

ጾሲ ጊዲኮ ኢስታስ

ኣቻ ሜንሬና።

11 ጋሞይ ሻንካቲዲ

ሚዛዝ ይዳ ዎዴ

ሃይቂዛ ማላ ኢስቲካ ሃይቃና፤

ጋሞ ማራቲካ ላሌቲዛ ማላ

ኢስታ ናይቲካ ላሌታና፤

12 ጋላሳፌ ኢሲ ጋላስ ጹራ ጊዲዳ

ኪታይ ታኮ ዪዴስ፤

ሄሳ ሄ ኪታዛ ሳሱኬን

ታ ሲያዲስ።

13 ኣሳይ ኦማርስ ዎልቃማ ስኮ

ሴሪዳ ዎዴ፥

ታና ኢታ ኣጉሞይ ኣጉንዴስ።✝4፡13 ኢዮ 33፡15

14 ባቦይኔ ኮኮርሲ ታና ኦይኪን፥

ታስ ሜቄቲ ኡባይ

ኮኮራና ማላ ኦዴስ።

15 ኣያናይ ታ ሲንራ ኣዴስ፤

ዳጋማፔ ዴንዲዳይሳን

ታ ሃሳይ ኤቂዴስ።

16 ሄንካ ኢሲ ሚሺ

ኤቂ ዲዛይሳ ቤያዲስ፤

ቲሺ ኦ ጼላዲስ ሺን

ኢዚ ኣዛኮ ሻካ

ኤራናዉ ዳንዳያቤኬ።

ሄሳፌ ጉዬ ጮኡ ጊዳሶሆፔ

ሂዝጊዛ ቃላ ሲያዲስ፥

17 ‹ጾሳ ሲንን ጺሎ ጊዲ

ቤታናስ ዳንዳይዛ ኣሲ ዲዜ?

ዎይኮ ባና ሜዳይሳ

ሲንን

ጌሻ ኣሲ ቤታኔ?

18 ጾሲ ባስ ኦዛይታን

ኣማኔቶንታ ኣጊኮ፥

ባ ኪታንቻታ ቦላካ

ኢዚ ሞሮ ሚሽ

ዴሚዛዝ ጊዲኮ፥

19 ሂስቲን ሃራይ

ሞንታ ዲሺን ላሌቲዛ

ኢስታ ዮቻይ ቢታፌ ጊዲዳ

ኡርቃፌ ኦሴቲዳ ኬ ጊዶን

ዲዛይታ ቦላ

ዋኒ ኣማኔታኔ?*4፡19 ኦላ ጌቴቲዛይሲ ኢሲ ኢሲ ባጋ ጋሞ ቃላን ሃራ ጌቴቴስ።

20 ማላዶፔኔ ኦማርሳፌ ጊዶን

ኢስቲ ሜቄሬታና፤

ኤሬቶንታ ዲሺን

ኢስቲ ሜርናስካ ያና።

21 ቶሌ ሽኬይ

ሾዴቲቺዳ

ዱንካኔ ማላ

ኢስቲ ኤራቴ ባይንዳ ሃይቃና።›