1 ታ ናዞ! ኔኒ ታ ቃላ ሲዪኮ፥

ታ ኣዛዞካ ኔኒ ኔ ዎዚናን ዎኮ፥

2 ኔ ሃይ ኣ ኤራቴኮ

ዛሪኮ፥

ኔ ዎዚና ኣኬካኮ

ኔ ዛሪኮ፥

3 ሻኪ ኤሪሲዛ ኤራቴ

ኔ ኮይኮ፥

ኔ ቃላ ቁ ሂስታዳ

ኣኬካ ጼይጊኮ፥

4 ኢዞካ ቢራ ኮይዛ ማላ

ኔ ኮይኮ፥

ቆታን ዲዛ ኣቆታ ማላ

ኔ ኢዞ ሚን ኮይኮ፥

5 ሄ ዎዴ ኔኒ

ጎዳስ ያሻቴ ኣኬካና፤

ጾሳካ ሎኤዳ ኤራና።

6 ጎዳይ ኣ ኤራቴ

ኢሚዛ ጊሻስ

ኢዛፔ ኤራቴኔ

ኣኬካይ ቤቴስ።

7 ኢዚ ሱሬታስ ጾኖ ሚንጄስ፤

ኢስታ ቦላ ዎሶይ ባይንዳይታስ

ጎንዳሌ ጊዴስ።

8 ሱሬ ፒርዳ ኦጌ ናጌስ፤

ባስ ኣማኔቲዛይታ

ሄሜ ሚንስ።

9 ሄ ዎዴ ኔኒ ጺሎቴ፥

ሱሬ ፒርዳ፥

ጌላይ ባይንዳ ፒርዳኔ

ሎኦ ኦጌ ኡባ ሻካ ኤራና።

10 ጋሶይካ ኣ ኤራቴ

ኔ ዎዚናን ጌላና፤

ኤራቴይካ

ኔ ሼምፖ ኡፋይሳና።

11 ሻኪ ኤሮይ ኔስ ጎንዳሌ ጊዳና፤

ኣኬካይካ ኔና ናጋና።

12 ኣ ኤራቴ ኔና

ኢታ ኣሳታ ኦጌፔ ኣሻና፤

ጌላ ሃሳይዛይታፔካ ኔና ናጋና።

13 ኢስቲ ማ ኦጌን ባናስ

ሱሬ ኦጌ ኣጊዛይታ፤

14 ኢስቲ ኢታ ኦሶን ኡፋዬቲዛይታ፤

ጌላ ኦጌን ሆምቦጪዛይታ።

15 ኢስታ ኦጌይ ጌላ፤

ኢስታ ሄሜታይ ሚርቄ።

16 ኣ ኤራቴ

ላይማ ማጫሳፌ ናጋና፤

ባ ኢንጻርሳን ጪሚዛሪፔ

ኔና ኣሻና።

17 ኢዛ ባ ዬላጋቴ

ኣዚና ኣጊዳሮ፤

ጾሳ ሲንን ጌሊዳ

ጫቆ ቃላ ካዳሮ።

18 ኢዚ ሶ ቤ ሃይቆስ ጋስ፤

ኢዚ ኦጌቲካ

ሞይቲሌታ ዱላታን ጋቴስ።

19 ኢዚኮ ጌሊዳ

ኦኒካ ጉዬ ሲሜና፤

ዴኦ ኦጌካ ዴሜና።

20 ሄሳ ጊሻስ ኔኒ

ሎኦ ኣሳታ ሌሚሶ ካላ፤

ጺሎታ ኦጌን ሄሜታ።

21 ሱሬ ኣሳቲ ቢታ ቦላ ጋምኣና፤

ዎሶይ ባይንዳ ኣሳቲካ

ኢዚ ቦላ ሚኒ ዳና።

22 ጊዶ ኣቲን ኢታቲ ቢታፌ ያና፤

ኣማኔቶንታይቲካ ቃሌታና።