1 Yoona ani insa’nenni welti Mageniinxe tuutake geerchonna Kiristoosixxe rakkoxxee dhuggaa kulaa kadennek, iittanni edi’a leellaaka ulfinna qoodemaannek ha’no giddo hexxeexxe Mageniinxe tuutaxxe geedhe’a gorsa uwwaannen. 2 Mageni ha’no’ni maganne uwweeka Mageniinka arda heqqe; heqqitinaa qicinna hunnatite kaddebaak fedhii ifixxenni, alfendaaxxe la’o’aate haafematite kaddebaag ergatenshatee affineexxee jabaxxe halchannite kaddowwaal. 3 Iittanni ha’no’ni maganne uwweemmeeka ardi’a eloke fakkeenna kadatite malee’e insa’ne hana goottommatite kaddoqqe’e. 4 Allalsanotik umi leellaaxxa yanna ba’abaaka kalcha adhdhitinaan.

5 Ha’no dargaggeeyye iittanni geedhetee ajajemme; duuchchiing weli’anni weli ulfeessati shaqqumma oddo’we. Yaane kinni «Mageni ifi dukaakara gareeraani; shaqqakeeri’a kinni badhaadha uwwaan.»

6 Tennexxee isi mureexxe yanna’ni ha’noo lummisaashsha Mageniinxe jabaxxe anga hunda ifi heeshshi asse. 7 Isi ha’no’aa hedaammaxxee ha’noo wixxixxi assitaaxxa iso’ni hunne.

8 Ifi hirtinaake kaddineexxi dammaqqe; naaphi ha’nok durriisi liqiinsaaka haseexxi baroodammake neenqishsha elqe kayya dowa’neen. 9 Butta duuchcha’ni hedheekir ha’nok dayyuwwi tenne fakkataaxa rakko adhdhaaxxa egendineexxi amanate’ni ti’ni hitine isoo xaa’ne. 10 Kiristoosinni ha’noo duuchchii woddike ulfinnibaa ha’noo ye’eeki, badhaadhi duuchchike Mageni heenooxxe yanna’a rakko adhdhitineechchi uduma isi umo ifingenninni wirri hiyyeexxi ha’noo jabessaan; ti’ni hitinaashsha asse ha’noo uurrisaan. 11 Hunna duuchchii woddanaa’ni duuchchii woddii’a isi’aa kaddowwaal. Hamiin.

12 Xuurammeesi dayyishsha asse uuda’enneke Silwaanosi darree’n tennee harumaaxxa erga ha’no’a borreesseennen; ha’no’a borreessenechchinna ha’no’aa gorsa uwwona’anna kunni dhugaatike Magenike badhaadha kadeexxa ha’no’n dhugaa kulatee hiyyeeten; konne badhaadha’n ti’ni hitine uurre. 13 Ha’noonni welti filendeexxi Baabiloon afendaaxxi Mageniinxi tuuta mitteba bukki hitineexxi nage’a ha’no’aa shiqishsha’neen. Iittanni belti anki Maariqoosi nage’a ha’no’aa shiqisa’neen. 14 Jaalalatixxe suunqecanni weli’anni weli nage’a aadhdhe; Kiristoosi’ni hexxineeke duuchchi’a nage’i ha’no’aa kadowwaal.