1 ታ እሻቶ፥ ታኒ ህንተ ሀይሳ አኬካና መላ ኮያይስ። ኑ ማይዛት ኡባይ ሻራፐ ጋርሳራ ሄመትዶሶና፤ ኡባይ አባ ፕንዶሶና።✝10:1 ከሳ 13:21-22፤ 14:22-29. 2 ኤንቲ ሙሰራ እስፋናዉ ሻራንነ አባን ፃማቀትዶሶና። 3 ኤንቲ ኡባይ እስ አያና ካ ምዶሶና።✝10:3 ከሳ 16:35. 4 ቃስ ኡባይ እስ አያና ኡሻ ኡይዶሶና። ኤንቲ ባንታና ካልያ አያና ዛላፈ ፑልትዳ ኡሻ ኡይዶሶና፤ ሄ ዛላይካ ክርስቶሳ።✝10:4 ከሳ 17:6፤ ታይቦ 20:11. 5 ሽን ፆሳይ ኤንታፈ ዳሮታን ኡፋይትቦና ግሾ፥ ኤንታ አሀይ መላ ቢታን ዎድ አትስ።✝10:5 ታይቦ 14:29-30.

6 ኤንቲ ኢታባ አሞትዳይሳዳ፥ ኑካ ኢታባ አሞቶና መላ ሄ ኡባይ ኑስ ሌምሶ ግድስ።✝10:6 ታይቦ 11:4. 7 ጌሻ ማፃፋን፥ "አሳይ ማናዉነ ኡያናዉ ኡትዶሶና፤ ቃስ የፃናዉ ደንድዶሶና" ጌተትዳይሳዳ ኤንታፈ እሶት እሶት ኤቃ ጎይንዳይሳ መላ ህንተ ኤቃ ጎይኖፍተ።✝10:7 ከሳ 32:6. 8 ኤንታፈ እሶት እሶት ላይማትዳይሳዳ ኑ ላይማታናዉ በሰና። ሄሳ ጋሶን ኤንታፈ እስ ጋላስ ላታማነ ሄ ሙኩላይ ሀይቅስ።✝10:8 ታይቦ 25:1-18. 9 ኤንታፈ እሶት እሶት ጎዳ ፓጭድ ሾሻን ዱከትድ ሀይቅዳይሳዳ ኑ ጎዳ ፓጫናዉ በሰና።✝10:9 ታይቦ 21:5-6. 10 ኤንታፈ እሶት እሶት ዙዙምድ ሀይቆ ኤህያ ኪታንቹዋን ይዳይሳዳ ህንተካ ዙዙሞፍተ።✝10:10 ታይቦ 16:41-49.

11 ሀ ኤንታ ቦላ ጋክዳ ኡባይ ኑ ናገታና መላ ኑስ ሌምሶ ግድስ። ቃስ ዎደ ዉርሰ ቦላ ደእያ ኑስ ትምርተ ግዳና መላ ሀ ኡባይ ፃፈትስ።

12 ሄሳ ግሾ፥ ታ ኤቃስ ግያ ኦንካ ኩንዶና መላ ባና ናጎ። 13 አሰ ኡባ ጋክያ ፓጨፐ አትሽን፥ ዱማ ፓጨይ ህንተና ጋክቤና። ህንተ ዎልቃይ ዳንዳኤይሳፈ አያ ፓጨን ህንተ ፓጨቶና መላ አድ እሞና ፆሳይ አማነትዳይሳ። ህንተና ፓጨይ ጋክያ ዎደ ሄ ፓጭያ እ ህንተና ዳንዳእሳና። ቃስ ሄ ፓጭያፐ ህንተ ከያና ኦግያ እ ጊግሳና።

14 ህዛ፥ ታ አልኦ እሻቶ፥ ኤቃ ጎይኖፈ ሃክተ። 15 ህንተ ዎዛናማ አስ ግድዳ ግሾ ታ ሀይሳ ኦዳይስ። ታኒ ገይስ ቱማ ግደይሳ ህንተ ህንተ ሁጰን ፕርድተ። 16 ኑኒ ፆሳ ጋላትድ ሻከትያ አንጆ ፁአይ ክርስቶሳ ሱራ እስፈተ ደኤይሳ ግደነዬ? ቃስ ኑኒ ባያ ኡይይ ክርስቶሳ አሹዋራ እስፈተ ደኤይሳ ግደነዬ?✝10:16 ማቶ 26:26-28፤ ማር 14:22-24፤ ሉቃ 22:19-20. 17 ኑኒ ዳሮ ግድኮካ ኡይይ እስኖ፥ ኑ ሄ እስ ኡይ ሻከትያ ግሾ እስ አሳተ።

18 አነ እስራኤለ አሳይ ኦዳይሳ አኬክተ። ያርሸትዳ ያርሹዋ መይሳት ያርሾ በሳራ እስፈተ ባወዬ?✝10:18 ሌወ 7:6. 19 ታኒ አይ ጋናዉ ኮያዳ ጋይና? ኤቃስ ያርሸትዳ ካይ ዎይኮ ኤቃይ ፓያባ ጉሰዬ? 20 ግደና፥ ኤንቲ ያርሸይ ፆሳስ ግዶናሽን፥ ቱና አያናታሳ። ሄሳ ግሾ፥ ህንተዉ ቱና አያናታራ እስፈተ ዳና መላ ኮይከ።✝10:20 ዛረ 32:17. 21 ህንተ ጎዳ ፁአፐ ኡይሸ፥ ቃስ ቱና አያናታ ፁአፐ ኡያናዉ ዳንዳኤከታ። ጎዳ ጋይታፐ ምሸ ቃስ ቱና አያናታ ጋይታፐ ማናዉ ዳንዳኤከታ። 22 ኑኒ ሄሳ ኦድ ጎዳ ይሎይኖ? ኑኒ እያፐ አያ ምኖዬ?✝10:22 ዛረ 32:21.

23 ህንተ፥ "ኡባባ ኦና መላ ድግያባይ ባዋ" ጌታ፥ ሽን ኡባይ ማደና። ህንተ፥ "ኡባባ ኦና መላ ድግያባይ ባዋ" ጌታ፥ ሽን ኡባይ ድቸና።✝10:23 2 ቆሮ 6:12. 24 እስ እስ አስ፥ ሀራ አስ ማድያባ ቆፓናዉ በሴስፐ አትሽን፥ ባና ማድያባ ፃላላ ቆፖፎ።

25 ህንተ ካሀ ስን ገልስያ ኦይሻ ደንና ግያን ባይዘትያ አሹዋ ጮ ሚተ። 26 አይስ ጊኮ፥ ሳእነ ሳአን ደእያ ኡባይ ጎዳባ።✝10:26 ማዝ 24:1.

27 እስ አማኖና አስ ህንተና እማታናዉ ኮይድ ፄግኮ ባናዉ ኮይኮ ቢተ። ህንተ ካሀን መትያ ኦይሻን ስና ህንተ ስን አያባ ኡባ ሚተ። 28 ሽን እስ አስ፥ "ሀይስ ኤቃስ ያርሸትዳባ" ጊኮ፥ ሄ ህንተዉ ኦድዳ አድያ ግሾነ ካሀ ግሾ ሄ ካ ሞፕተ። 29 ታኒ፥ ካሀ ግሾ ገይ፥ ሄ ህንተዉ ኦድዳ ኡራ ካሀ ጉሱፈ አትሽን፥ ህንተ ካሀ ግደና።

ሀራ አሳ ካሀ ግሾ ጋዳ ታኒ ታ ላአተ ቦላ አይስ ፕርዶ? 30 ታኒ ምያ ካ ፆሳ ጋላታዳ ሚኮ ባልዳዳ አይስ ቦረትያና?

31 ህዛ፥ ህንተ አይ ሚኮ አይ ኡይኮ፥ ዎይኮ አይ ኦኮካ ኡባባ ፆሳ ቦንቾስ ኦተ። 32 አይሁደታ ግድን ግርከታ ግድን ዎይኮ ፆሳ ዎሳ ኬ ግድን ኦደስካ በ ግዶፕተ። 33 ታኒ ኡባ ዎደ ዳሮታ አሻናዉ ኤንቲ ማደትያ ኦገ ኮያይስፐ አትሽን ታና ማድያ ኦገ ኮይከ።