1 ሳኦል እስፅፋኖሰ ሀይቁዋን ኡፋይትስ። ሄ ጋላስ የሩሳላመን ደእያ ዎሳ ኬን ግታ ጎድ ደንድስ። ሀዋረት አትሽን፥ አማነይሳት ኡባይ ይሁዳ ቢታንነ ሳማረ ቢታን ላለትዶሶና። 2 እስ እስ ፆሳ አሳት እስፅፋኖሰ ሞግዶሶና፤ ቃስ እያዉ ዳሮ ዬክዶሶና። 3 ሽን ሳኦል ዎሳ ኬ ይሳናዉ ኮዬስ። ሶ ሶ ዩይ ገልድ፥ አማንያ አደታነ ማጫሳታ ጎች ጎች ከስድ ቃሾ ኬ ገልሴስ።✝

4 ላለትዳ አማነይሳት ብዳ በሳ ኡባን ቃላ ኦድዶሶና። 5 ፍልጶስ ሳማረ ካታማ ብድ ክርስቶሳባ አሳስ ኦድስ። 6 ዳሮ አሳይ ፍልጶስ ኦድዳይሳ ስእዳ ዎደነ እ ኦያ ማላታታ በእዳ ዎደ እያ አኬክድ ስእዶሶና። 7 ቱና አያናት ዋስድ ዳሮ አሳፐ ከይዶሶና፤ ቃስ ዳሮ ጉንዳትነ ዎበት ብለትዶሶና። 8 ሄ ካታማን ደእያ አሳይ ዳሮ ኡፋይትዶሶና።

9 ሽን ስሞና ጌተትያ እስ ኡራይ ሄ ካታማን ደኤስ። እ፥ "ባና ግታ" ግድ ሳማረ አሳ ማሮተን ማላልስሸ ጋምእስ። 10 ጉፈ ግታ ጋካናዉ ደእያ አሳ ኡባይ፥ "ግታ ፆሳ ዎልቃይ ሀይሳ" ግድ እያባ ስኦሶና። 11 ዳሮ ዎደፐ ዶምድ ማሮትሸ ሳማረ አሳ ማላልስዳ ግሾ አሳይ እያባ ስኦሶና። 12 ሽን ፍልጶስ ፆሳ ካዎተባነ የሱስ ክርስቶሳ ሱንባ አደታስነ ማጫታስ ኦድን፥ ኤንቲ እያባ አማንድ ፃማቀትዶሶና። 13 ቃስ ስሞንካ ባ ሁጰን አማንድ ፃማቀትስ። ፍልጶሳራ እስፈ ብዳ በሳ ኡባን ኦሰትያ ግታ ማላታታ በእድ ማላለትስ።

14 የሩሳላመን ደእያ ሀዋረት ሳማረ አሳይ ፆሳ ቃላ ኤክዳይሳ ስእዳ ዎደ ጰፅሮሳነ ዮሃንሳ ኤንታኮ የድዶሶና። 15 ጰፅሮስነ ዮሃንስ ብድ፥ አማነይሳት ጌሻ አያና ኤካና መላ ኤንታዉ ፆሳ ዎስዶሶና። 16 አይስ ጊኮ፥ ሳማረ አሳት ጎዳ የሱሳ ሱን ፃላላን ፃማቀትዶሶናፐ አትሽን፥ ኤንታፈ እሱዋ ቦላካ ጌሻ አያናይ ዎቤና። 17 ሄ ዎደ ጰፅሮስነ ዮሃንስ ባንታ ኩሸ ኤንታ ቦላ ዎን፥ ኤንቲ ጌሻ አያና ኤክዶሶና።

18 ሀዋረት ባንታ ኩሸ ኤንታ ቦላ ዎን፥ ኤንታዉ ጌሻ አያናይ እመትዳይሳ ስሞን በእዳ ዎደ ጰፅሮሳስነ ዮሃንሳስ ሚሸ ኤህድ፥ 19 "ታንካ ታ ኩሸ ዎያ ኡባይ ጌሻ አያና ኤካና መላ ሀ ማታ ታዉ እመርከት" ያግስ።

20 ሽን ጰፅሮስ እያኮ፥ "ኔኒ ፆሳ እሞታ ሚሸን ሻማናዉ ቆፕዳ ግሾ ነ ሚሸይ ኔራ ዮ። 21 ነ ዎዛናይ ፆሳ ስንን ሱረ ግዶና ግሾ፥ ነዉ ሀይሳን ግሾይ ዎይኮ ቃድ ባዋ። 22 ህዛ፥ ሀ ነ ዎዛና ኢታተ ግሾ ናጋራፐ ስማ። ነ ዎዛናን ደእያ ኢታ ቆፋ ፆሳይ አቶ ጋና መላ ፆሳ ዎሳ። 23 ጋሶይካ፥ ኔኒ ኢታ ቃናተንነ ናጋራ ቃሾን ደኤይሳ ታኒ በአይስ" ያግስ።

24 ስሞን ዛሪድ፥ "ህንተ ግዳይሳፈ እሶይካ ታና ጋኮና መላ ታዉ ፆሳ ዎስተ" ያግስ።

25 ጰፅሮስነ ዮሃንስ ማርካትዳፐነ ጎዳ ቃላ ኦድዳፐ ጉየ የሩሳላመ ስምዶሶና። ሳማረን ደእያ ዳሮ ጉታታን ዎንገላ ኦድዶሶና።

26 ጎዳ ኪታንቾይ ፍልጶሳኮ፥ "ደንዳዳ የሩሳላመፐ ጋዛ ኤፍያ መላ ቢታ ኦግያኮ ባ። ሄ ኦገይ ዱገሀ ባጋራ ደኤስ" ያግስ። 27 ፍልጶስ ደንድድ ብስ። ህንደከ ጌተትያ ቶጰ ካዌስ እ ሚሸ ኡባ ናግያ ቶጰ አስ ደኤስ። እካ ጎይናናዉ የሩሳላመ ብስ። 28 ፓራ ጋረን ኡትድ፥ የሩሳላመፐ ባ ቢታ ስምሸ ናብያ እሳያሳ ማፃፋ ናባቤስ።

29 ጌሻ አያናይ ፍልጶሳኮ፥ "ሄ ጋርያኮ ባዳ እያ ማት ሺቃ" ያግስ።

30 ያትን ፍልጶስ ዎፅ ብድ ጋክያ ዎደ ሞርናይ ናብያ እሳያሳ ማፃፋፐ ናባብሽን ስእድ፥ "ነ ናባበይስ ነዉ ገሊ?" ያግስ።

31 ሞርናይ፥ "ታዉ ኦድ ገልስያ አስ ባይና ዋንድ ገላኔ?" ያግስ። ባራ ጋርያን ከይድ ኡታና መላ ፍልጶሳ ዎስስ። 32 ሞርናይ ናባብያ ማፃፋ ክፍለይ፥✝

"እ ዶርሳዳ ሹከታናዉ ላገትስ፤

ዶርሳ ማር ባ እክስያ ሜደይሳታ ስንን ስእ ገይሳዳ፥

እካ ባ ዶና ዶይቤና።

33 እ ካዉይስ፤ እያዉ ፅሎ ፕርድ ይስ፤

እያ ደኦይ ሀ ሳአፐ ቃንፀትዳ ግሾ፥

እያ ሼሻባ ኦነ ኦዳናይ?" ያጌስ።

34 ሞርናይ ዛሪድ ፍልጶሳኮ፥ "ናበይ ኦደባ ኦዲ? ባባ ኦድየ ዎይኮ ሀራ አሳባ ኦዲ? ታዉ ኦዳርኪ" ያግስ። 35 ፍልጶስ፥ ፆሳ ቃላ ሄ በሳፈ ዶምድ፥ የሱሳባ ኦድያ ዎንገላ እያዉ ኦድስ።

36 ኤንቲ ብሸ ሃ ደእያሶ ጋክዶሶና። ሞርናይ፥ "ሃ ሀይሳ በአ፤ ታ ፃማቀቶና መላ አይበ ድገይ?" ያግስ።

37 ፍልጶስ እያኮ፥ "ኔኒ ነ ኩመ ዎዛናፐ አማንኮ ዳንዳኣሳ" ያግስ።

እ ዛሪድ፥ "የሱስ ክርስቶሲ ፆሳ ናኣ ግደይሳ ታኒ አማናይስ" ያግስ።

38 ጋረይ ኤቃና መላ ሞርናይ ኪትን፥ ናምአይ ዎድ ሃን ገልዶሶና፤ ፍልጶስ እያ ፃማቅስ። 39 ኤንቲ ሃፈ ጋፃ ከይዳ ዎደ ጎዳ አያናይ ፍልጶሳ ቆፖና ኤክስ። ናምአን ሞርናይ ፍልጶሳ በእቤና፥ ሽን ባ ኦግያ ኡፋይትሸ ብስ። 40 ፍልጶስ አዛፆናን ባና ደምስ። ቃስ ቅሳረ ያና ጋካናዉ ካታማታን ዩይድ ዎንገላ ማርካትስ።