1 ናቡካዳናፆር ካዎትዳ ናምአን ላይን አሙሆ አሙህስ። ሄ አሙሆይ እያ ዳጋንን፥ ስኮይ እያ ኤኮና እፅስ። 2 ሄሳ ግሾ፥ እ አሙህዳ አሙሁዋ እያዉ ኦዳና መላ ማሮት፥ ብታንቾት፥ ሙሩነይሳትነ ፆልንቶ ታይበይሳት ያና መላ ካዎይ ኪትስ። ኤንቲ ይድ እያ ስንን ኤቅዶሶና። 3 ካዎይ ኤንታኮ፥ "ታና ዳጋንያ አሙሆ አሙሀስ፤ ሄ አሙሆይ አይበኮ ኤራናዉ ኮያይስ" ያግስ።

4 ፆልንቶ ታይበይሳት ሶረ ዶናን፥ "ካዋዉ፥ መርናዉ ካዎታ! ነ አሙሁዋ ኑስ ነ አይለታስ ኦዳ፤ ኑ ነዉ እያ ብርሸ ኦዳና" ያግዶሶና።

5 ካዎይ ኤንታኮ፥ "ህንተ ሀ አሙሁዋነ እያ ብርሸ ታና ኤርሶና እፅኮ፥ ታ ህንተና ቃንፃና፤ ህንተ ኬይ ቡረ የግያ በሲ ግዳናይሳ ታ ህንተዉ ምንዳ ኦዳይስ። 6 ሽን ህንተ አሙሁዋነ እያ ብርሸ ታዉ ኦድኮ፥ እሞታ፥ ዎይቶነ ዳሮ ቦንቾ ታፐ ደማና። ሄሳ ግሾ፥ አነ አሙሁዋነ እያ ብርሸ ታና ኤርስተ" ያግስ።

7 ኤንቲ ዛሪድ፥ "ካዎይ አሙሁዋ ኑስ ባ አይለታስ ኦዶ፤ ኑ እያ ብርሸ ኤርሳና" ያግዶሶና።

8 ካዎይ ዛሪድ፥ "ታ ምኖ ቆፋ ህንተ ኤርያ ግሾ ዎደ አዱሳናዉ ህንተ ኮየይሳ ታ ኤራይስ። 9 ህንተ አሙሁዋ ታዉ ኦዶና እፅኮ፥ እስ ፕርድ ህንተና ናጌስ። ሀኖታይ ላመታና ግድ ህንተ ኡፋይስ ኦያ ግሾ ታዉ ዎርዶነ ገነ ቃላ ኦዳናዉ ማቀትደታ። ሄሳ ግሾ፥ አሙሁዋ ታዉ ኦድተ። ያትኮ፥ ህንተ እያ ብርሸ ኤርሳናዉ ዳንዳኤይሳ ታ ኤራና" ያግስ።

10 ፆልንቶ ታይበይሳት ዛሪድ፥ "ካዎይ ኦይችያ ኦይሻ ዛራናዉ ዳንዳእያ እስ አስካ ቢታን ባዋ። አይ ግታነ ዎልቃማ ካዎይ ማሮታ፥ ብታንቾታነ ፆልንቶ ታይበይሳታ ሄሳ መላባ ኦይችድ ኤረና። 11 ካዎይ ኦይችዳ ኦይሾይ ዴፆ፤ አሳ ግዶን ዶና ፆሳታፐ አትሽን፥ ሄሳ ካዋስ ቆንጭሳናዉ ዳንዳኤይ ባዋ" ያግዶሶና።

12 ካዎይ ዳሮ ይሎትድ፥ ባብሎነን ደእያ ጭንጫታ ኡባ ዎናዳ ኪትስ። 13 ጭንጫታ ዎናዉ አዋጆይ ከይስ፤ ዳነላነ እያ ላገታ ዎናዉ አስ ኪተትስ።

14 ካዋ ናገይሳታ ሀላቃይ አርዮክ፥ ባብሎነን ደእያ ጭንጫታ ዎናዉ ከይያ ዎደ ዳነል እያ ጭንጫተንነ ሂላን ኦድስስ። 15 እ ካዋ ናገይሳታ ሀላቃ አርዮካ፥ "ካዎይ ሀይሳ መላ ኢታ አዋጆ አይስ ከስዴ?" ግድ ኦይችስ። አርዮክ ሀኖታ ዳነላስ ኦድስ። 16 ዳነል ካዋኮ ገልድ፥ አሙሁዋ ብርሸ ኤርሳናዉ ባዉ ዎደይ እመታና መላ ዎስስ።

17 ሄሳፈ ጉየ ዳነል ባ ሶ ስሚድ፥ ባ ሄ ላገታስ፥ አናንያስ፥ ምሳኤላስነ አዛርያስ ሀኖታ ኦድስ። 18 ኤንቲ ባብሎነን ደእያ ሀንኮ ጭንጫታራ እስፈ ሀይቆናዳ፥ ሳሎ ፆሳይ ማሮታ ኦድ፥ ሀ ፁራ ኤንታዉ ቆንጭሳናዳ ዎሳና መላ ኤንታዉ ኦድስ።

19 ሄ ቃማ ፁራይ ዳነላስ ቆንጭስ። ዳነል ሳሎ ፆሳ ሀይሳዳ ያግድ ጋላትስ፤

20 "ጭንጫተነ ዎልቅ ፆሳሳ ግድያ ግሾ፥

እያ ሱንይ መርናፐ መርና ጋካናዉ ጋላተቶ።

21 እ ዎደታነ አጌናታ ላሜስ፤

ካዎታ አራታን ኡትሴስ፤ አራታፐ ድጌስ።

ጭንጫታስ ጭንጫተ እሜስ፤

አኬካንቾታስ ኤራ እሜስ።

22 እ ፁራነ ጌምዳባ ቆንጭሴስ፤

እ ማን ደእያባ ኤሬስ፤

ፖኦይ እያራ ደኤስ።

23 ታ ማይዛታ ፆሳዉ፥

ታ ነና ጋላታይስ፤ ሳባይስ።

ነ ታዉ ጭንጫተነ ዎልቃ እማዳሳ፤

ኑኒ ነና ኦይችዳባ ታና ኤርሳዳሳ፤

ካዋ አሙሁዋ ኑና ኤርሳዳሳ"

ያግስ።

24 ሄሳፈ ጉየ፥ ዳነል ባብሎነን ደእያ ጭንጫታ ዎሳናዉ ካዉዋፐ ኪታ ኤክዳ፥ አርዮካኮ ብድ፥ "ጭንጫታ ዎፓ፤ ታና ካዋኮ ገልሳ፤ ታኒ እያ አሙሁዋ ብርሸ እያ ኤርሳና" ያግስ።

25 አርዮክ ኤለስድ ዳነላ ካዋኮ ገልስድ፥ ካዋኮ፥ "ይሁዳፐ ድኤትድ ይዳ አሳፐ ካዋ አሙሁዋ ብርሸ ኤርሳናዉ ዳንዳእያ አሰ ደማስ" ያግስ።

26 ካዎይ ብልፃሶራ ጌተትያ ዳነላ፥ "ታ አሙህዳ አሙሁዋነ እያ ብርሸ ታና ኤርሳናዉ ዳንዳአይ?" ግድ ኦይችስ።

27 ዳነል ሀይሳዳ ያግድ ዛርስ፦ "ካዋዉ፥ ነ ኦይችዳ ፁራ ቆንጭሳናዉ ዳንዳእያ ጭንጫ አስ፥ ማሮይ፥ ብታንቾይነ፥ ሙሩንያ አስ ባዋ። 28 ሽን ፁራ ቆንጭስያ እስ ፆሲ ሳሎን ደኤስ። ዉርሰ ዎደታን ሀናናባ እ፥ ነና በስስ። ነ አርሳን ዝንአዳ፥ ነ በእዳ አሙሆይነ ቆንጨይ ሀይሳ።

29 "ካዋዉ፥ ነ አርሳን ዝንአዳ፥ ስንፈ ያናባ ቆፓዳሳ። ሄ ዎደ ፁራ ቆንጭስያ ፆሳይ ስንፈ ሀናናባ ነና በስስ። 30 ሀ ፁራይ ታዉ ቆንጭዳይ፥ ታ ሀራ አሳፐ ጭንጫ ግድዳ ግሾ ግደና። ሽን ኔኒ ካዎይ፥ አሙሁዋ ብርሸ ኤራናዳነ ነ ሁጰን ስመረትያ ቆፋ አኬካና መላሳ።

31 "ካዋዉ፥ ነ ዳሮ ግታ፥ ጶልያነ ፄላናዉ ያሽያ ምስለይ ነ ስንን ኤቅዳይሳ በአዳሳ። 32 ሄ ምስልያ ሁጰይ፥ ዋላህ ባይና ዎርቃፈ፥ እያ ትራይነ ኩሸት ብራፐ፥ ኡሎይነ ዎድረት ናሰ ብራታፐ፥ 33 ሱይለይ ብራታፐነ ቶሆ ያቻ ባጋይ ብራታፐ ባጋይ ቢታፈ መትስ። 34 ኔኒ ምስልያ ፄልያ ዎደ፥ እስ ሹች አሳ ኩሸይ ቦቾና ቆለትድ፥ ብራታፐነ ቢታፈ መትዳ ምስልያ ቶሆ ያቻ ቦላ ዎድ ጋጭስ። 35 ሄ ዎደ ብራት፥ ኡርቅ፥ ናሰ ብራታይ፥ ብርነ ዎርቀይ ኡባይ ጋጨትድ፥ ቦነን ዉዱማን ደእያ ሱላ መላ ግድን፥ አይኮይካ አቶናሽን ጫርኮይ ፕትድ ኤፍስ። ሽን ምስልያ ቦላ ዎዳ ሹቻይ ዙማ ግድድ ሳኣ ኩምስ።

36 "አሙሆይ ሀይሳ፤ ሀእ ብርሸ ኑኒ ነዉ ኦዳና። 37 ካዋዉ፥ ኔኒ ካዎታ ካዎ። ሳሎ ፆሳይ ነዉ ካዎተነ ዎልቃ፥ ምኖተነ ቦንቾ እሚስ። 38 ኔኒ ቢታ ኡባ ሃራናዳ ኦስ፤ አሰ፥ ዶአነ ሳሎ ካፎ ነ ኩሸን ዎስ። ሄሳ ግሾ፥ ዎርቃ ሁጰይ ነና።

39 "ኔፐ ጉየ፥ ምኖተን ነና ጋኮና ሀራ ካዎተ ደንዳና። ካልድ፥ ቢታ ኡባ ሃርያ፥ ናሰ ብራታ ግድያ፥ ሄን ካዎተ ደንዳና። 40 ዉርሰን ኡባ ጋጭድ ሊቅስያ ብራታዳ ምንዳ ኦይዳን ካዎተ ደንዳና። ብራት ኡባ ጋጭድ ሊቅሰይሳዳ እ፥ ባፐ ካሰ ደንድዳ ካዎተታ ጋጭድ ሊቅሳና።

41 "ቶሆትነ ቶሆ ብራት ባጋይ ብራታፐ፥ ባጋይ ቢታፈ መትዳይሳ ነ በእዳይሳዳ፥ ሄ ካዎተይ ሻከትዳ ካዎተ ግዳና። ብራት ቢታራ ዋላከትን፥ ኔኒ በእዳይሳዳ ባጋይ ብራታዳ ምኖ ግዳና። 42 ቶሆ ብራት ባጋይ ብራታ፥ ባጋይ ቢታ ግድዳይሳዳ፥ ሀ ካዎተስ ባጋይ ምኖ፥ ባጋይ ሹጎ ግዳና። 43 ብራት ቢታራ ዋላከትን ኔኒ በእዳይሳዳ ሄ ናምኡ ባጋ አሳይ ገሎንነ ኤኮን ዋላከታና። ሽን ብራት ቢታራ ዋላከታናዉ ዳንዳኦናይሳዳ ኤንቲ እስኖ ግድድ ጋምአናዉ ዳንዳኦኮና።

44 "ሄ ካዎታ ላይን፥ ሳሎ ፆሳይ ኩንዶና፥ ሀራ አሳስ አድ እመቶና ካዎተ ኤሳና። ሄ ኤቅዳ ካዎተይ፥ ሄ ካዎተታ ኡባ ጋጭድ ይሳና፤ ሽን እ መርናዉ ኤቅድ ዳና። 45 አሳ ኩሸይ ቦቾና ዙማፐ ቆለትድ፥ ዎድ፥ ብራታፐ፥ ናሰ ብራታፐ፥ ቢታፈ፥ ብራፐነ ቢታፈ መትዳ ምስልያ ጋጭዳ ሹቻ ብርሸይ ሄ ካዎተ።

"ግታ ፆሳይ ስንፈ ሀናናባ ካዋ በስስ። አሙሆይ ቱማ፤ ብርሸይካ አማነትዳይሳ" ያግድ ዛርስ።

46 ሄሳፈ ጉየ፥ ካዎይ ናቡካዳናፆር ዳነላ ቦንችድ፥ ጉፋንስ፤ አሳይ እያ ስንን ያርሾ ያርሻና መላነ እፃነ ጩይሳና መላ ኪትስ። 47 ካዎይ ዳነላ፥ "ቱማ ነ ፆሳይ ፆሳታ ፆሰ፥ ካዎታ ጎዳነ ፁራ ቆንጭስያ ፆሰ። ኔኒ ሀ ፁራ ቆንጭሳናዉ ዳንዳእዳይ ሄሳ ግሾሳ" ያግስ።

48 ሄሳፈ ጉየ፥ ካዎይ ዳነላ አድ ቦንችስ፤ ዳሮነ አልኦ እሞታታ እያዉ እሚስ። ባብሎነ ቢታ ሃርያ አሰ ኦስ፤ ባብሎነን ደእያ ጭንጫታ ኡባ ቦላ ሀላቃ ኦድ ሹምስ። 49 ዳነል ኦይሻን፥ ካዎይ ስድራቃ፥ ምሳቃነ አብዳናጎ ባብሎነ ቢታ አይሰይሳታ ኦድ ሹምስ፤ ሽን ዳነል ካዎ ኬን ጋምእስ።