1 ናይቶ፥ ህንተ ጎዳባ ግድያ ግሾ ህንተና የልዳይሳታስ ኪተትተ። ሄስ ህንተዉ በሲያባ።✝6:1 ቆላ 3:20. 2 "ነ አይዉነ ነ አዋ ቦንቻ።" ሄስ ኡፋይሳ ቃል ደእያ ኮይሮ ኪታ።✝6:2 ከሳ 20:12፤ ዛረ 5:16. 3 "ነ ሄሳ ፖልያባ ግድኮ ኡባይ ነዉ እንጀታና፤ ነ ላይይ ሳአ ቦላ አዱቃና።"

4 አዋቶ፥ ህንተ ናይታ ጎዳ ቃላ ታማርሶንነ ኤንታ ካለሶን ድችተፐ አትሽን፥ ኤንታና ጫምሶፕተ።✝6:4 ቆላ 3:21.

5 አይለቶ፥ ክርስቶሳስ ኪተተይሳዳ ህንተ ሳአ ጎዳታስ ያሻን፥ ቦንቾንነ ሱረ ዎዛናን ኪተትተ።✝6:5 ቆላ 3:22-25. 6 ኤንታ ስንን ሳባ ደማናዉ ኤንቲ በእያ ዎደ ፃላላ ኦፍተ። ሽን ክርስቶሳ አይለታዳ ፆሳ ሸንያ ዎዛናፐ ፖልተ። 7 አሳስ ግዶናሽን፥ ጎዳስ ግድ ህንተ ኩመ ዎዛናፐ ኦተ። 8 አይለ ግድን ዎይኮ ጎዳ ግድን እሶይ እሶይ ባ ኦዳ ሎኦ ኦሱዋስ ጎዳፐ ዎይቶ ኤካናይሳ ኤሬታ።

9 ጎዳቶ፥ አሳ ሶምኦ በእድ ማዶና ጎዳይ፥ ሳሉዋን ደኤይሳ ኤሬታ። ሄሳ ግሾ፥ ህንተ አይለታ ማንደይሳ አግድ ኤንቲ ህንተዉ ቦንቾን ኪተተይሳ መላ ህንተ ኤንታዉ ሎኦባ ኦተ።✝6:9 ቆላ 4:1፤ ዛረ 10:17፤ ቆላ 3:25.

10 ዉርሰን፥ ጎዳንነ እያ ግታ ዎልቃን ምንተ። 11 ፃላሄ ጭሙዋ ኤቀታናዉ ዳንዳአና መላ ፆሳይ ህንተዉ እምዳ ኦላ ሚሽያ ኡባ ማእተ። 12 ኑ ኦላይ አሳራ ግዶናሽን፥ ሳሎን ደእያ ቱና አያና ኦላንቾታራ፥ ማታ አዋታራ፥ ሃረይሳታራነ ሀ ማ አላምያ ዎልቃታራ።

13 ሄሳ ግሾ፥ ኢታ ጋላሳ ተቃናዉነ ኡባ ፖልድ፥ ምንድ ኤቃናዉ ህንተ ዳንዳአና መላ ፆሳ ኦላ ሚሸታ ኡባ ማእተ። 14,15 ቱማ ፄሳን ዳንጮዳ ዳንጭድ፥ ፅሎተ ፁሩረዳ ትራን ዎድ፥ ሳሮተ ዎንገላ ህንተ ቶሁዋን ጫማዳ አድ ምንድ ኤቅተ።✝6:14-15 እሳ 11:5፤ እሳ 59:17፤ 52:7. 16 ሄ ኡባፈ አድ፥ ፃላሄይ የድያ ላፅያ ታማ ዶንገ ኡባ ቶይሳናዉ ዳንዳእያ አማኑዋ ኡባ ዎደ ጎንዳለዳ ኦይክተ። 17 ፆሳ አቶተ ብራታ ባርኔፃዳ ህንተ ሁጰን ዎተ፤ ቃስ ጌሻ አያና ማሻ እካ፥ ፆሳ ቃላ ኦይክተ።✝6:17 እሳ 59:17. 18 ዎሳ አጎፍተ፤ ሀራታስካ ጋናትተ፤ ኡባ ዎደ አያናን ዎስተ። ሄሳን፥ ጌሻታስ ሳለቶና ምንድ ኡባ ዎደ ዎስተ።

19 ታኒ ዎንገላ ፁራ ያሽ ባይና ቆንጭሳዳ ኦዳና መላ ፆሳይ ታዉ ቃላ እማና መላ ዎስተ። 20 ታኒ ሄሳ ኦናዉ ኪተታስ ሀእካ ቃሾን ደኤይ ሄ ዎንገላ ግሾሳ። ያንያ ግሾ፥ ታኒ ያሽ ባይና በሰይሳዳ ኦዳና መላ ታዉ ዎስተ።

21 ታኒ ዋና ደእያኮነ አይ ኦያኮ ህንተ ኤራና መላ ኑ ሲቆ እሻይ፥ ጎዳ ኦሱዋን አማነትዳ ኦሳንቾይ፥ ትክቆስ፥ ታባ ኡባ ህንተዉ ኦዳና።✝6:21 ሀዋ 20:4፤ 2 ፅሞ 4:12፤ ቆላ 4:7-8. 22 ኑኒ ኡባይ ዋንድ ደእያኮ ህንተዉ ኦዳና መላነ ህንተና ምንና መላ ታኒ እያ ህንተኮ ኪታስ።✝6:22 መ 21:10.

23 ፆሳ አዋፐ፥ ጎዳ የሱስ ክርስቶሳፐ ሳሮተይነ ሲቆይ አማኖራ እስፈ አማንያ ኡባስ ግዶ። 24 እርፆና ሲቆን ኑ ጎዳ የሱስ ክርስቶሳ ሲቅያ ኡባራ ፆሳ አ ኬሀተይ ግዶ።