1 ክርስቶስ የሱሳራ እስፍዳ ግሾ፥ ፆሳባ ግድዳ፥ ፍልጵስዩሳ ካታማን ደእያ ዎሳ ኬ ጭማታስነ ዳቆነታ ኡባስ። የሱስ ክርስቶሳ አይለ ግድዳ፥ ጳዉሎሳፐነ ፅሞትዮሳፐ ኪተትዳ ኪታ።✝

2 ኑ አዋ ፆሳፈነ ጎዳ የሱስ ክርስቶሳፐ አ ኬሀተይነ ሳሮተይ ህንተዉ ግዶ።

3 ታኒ ህንተና ቆፕያ ዎደ ኡባን፥ ታ ፆሳ ጋላታይስ። 4 ታኒ ህንተ ኡባስ ፆሳ ዎስያ ዎደ ኡፋይሳን ዎሳይስ። 5 ህንተ ኮይሮ ጋላሳፐ ሀእ ጋካናዉ፥ ዎንገላ ማርካተይሳን ታራ እስፈ ግድድ፥ ታና ማድዳ ግሾ፥ ፆሳ ጋላታይስ። 6 ህንተ ግዶን ሎኦ ኦሶ ዶምዳ ፆሳይ፥ ክርስቶስ የሱሲ ስምያ ጋላሳይ ጋካናዉ፥ ፖላናይሳ ኤራይስ።

7 ህንተ ኡባ ዎደ ታ ዎዛናን ደኤታ። ታኒ ኡባ ዎደካ ሄሳዳ ቆፓናዉ በሴስ። ሀእ ታኒ ቃሾን ደአሸነ ቃሸታናፐ ስን ዎንገላ ናጎንነ ዎንገላ ምን ኤሶን ፆሳይ ታዉ ቃድዳ ቃዳ ህንተካ ታራ ሻከትደታ። 8 ታኒ ህንተና ኡባ ክርስቶስ የሱሳ ሲቁዋን አይ መላ ላሞትያኮ ፆሳይ ታዉ ማርካ።

9 ህንተ ሲቆይ ቱማ ኤራተራነ አኬካራ እስፈ ጉጅ ጉጅ ድጫና መላ ፆሳ ዎሳይስ። 10 ሄሳን ህንተ ሎኦባ ሻክድ፥ ዶረይሳታ፥ ክርስቶስ ስምያ ጋላሳን ጌሻታነ ቦረቶናይሳታ ግዳና። 11 ህንተ ደኦይ ፆሳ ቦንቹዋስነ ጋላታስ የሱስ ክርስቶሳ ባጋራ በንትያ ፅሎተ አይፍያን ኩምድ አይፋና።

12 ታ እሻቶ፥ ታና ጋክዳ ኡባይ ዎንገላይ ዳልጋና መላ ቱማ ማድዳይሳ ህንተ ኤራና መላ ኮያይስ። 13 ታኒ ክርስቶሳ ግሾ ቃሸትዳይሳ፥ ካዎ ጋ ናገይሳትነ ሀይሳን ደእያ ሀራት ኡባይ ኤሮሶና።✝ 14 ታ ቃሹዋ ጋሶን ኑ እሻታፐ ዳሮት ጎዳን ኬህ አማነትዶሶና። ሄሳ ግሾ፥ ፆሳ ቃላ ያሽ ባይና ካሰፐ ምንድ ኦዳና መላ ምኖተ ደምዶሶና።

15 ግዶሽን፥ እሶት እሶት ቃናተንነ ፓላማን ክርስቶሳባ ኦዶሶና፥ ሽን ሀራት ሱረ ዎዛናፐ ኦዶሶና። 16 ሱረ ዎዛናፐ ኦደይሳት፥ ፆሳይ ታዉ ዎንገላ ናጋና መላ ሀዳራ እምዳይሳ ኤርያ ግሾ፥ ሲቆን ኦዶሶና። 17 ሽን ታና ቃናተይሳት ታ ቃሹዋ ቦላ ሀራ መቶ ኤሀናባ ኤንታዉ ዳንን ባንታና ዶስድ ክርስቶሳባ ኦዶሶናፐ አትሽን፥ ቱማ ዎዛናፐ ኦዶኮና።

18 ሄስ አይኮካ መተና። ቱማ ኦገን ግድን ዎይኮ ዎርዶ ኦገን ግድን ሄ ኡባን ክርስቶስ ሳባከቴስ። ታና ሄስ ኡፋይሴስ። ቃስ ሀራባይ ታና ኡፋይስያባይ፥ 19 ታኒ ህንተ ዎሳንነ የሱስ ክርስቶሳ አያና ማዱዋን አታናይሳ ኤርያ ግሾ ታና ኡፋይሴስ። 20 ታ ግታ አሞይነ ኡፋይሳን ናግያ ናጎይ ታ ዬላቶና አታናይሳ። ሽን ኡባ ዎደ ኦይሳዳ፥ ሀእካ ታኒ ፓፃ ደእን ዎይኮ ሀይቅን ያዮና ታ ኩመ አሳተን ክርስቶስ ቦንቸታና ጋዳ ምኖተን ኦዳይስ። 21 ታ ደእኮካ ክርስቶሳ ፃላላስ ደአይስ፤ ቃስ ታ ሀይቅኮካ ታዉ አዳ ዎ። 22 ሽን ታ ፓፃ ደእኮ አይፈይ ደእያ ኦሶ ኦና። ሽን ፓፃ ደኤይሳፈነ ሀይቆፐ አዉሳ ዶራነኮ ታዉ ኤረተና። 23 ታኒ ሀ ናምአታፐ አዉሳ ዶራነኮ ኡንኤታስ። ሀ ደኡዋፐ ሻከታዳ ክርስቶሳራ እስፈ ዳናዉ አሞታይስ፤ ክርስቶሳራ እስፈ ደኤይስ ኡባፈ አዳ ሎኦ። 24 ሽን ታኒ ህንተ ግሾ ፓፃ ደኤይስ ህንተዉ ዳሮ ኮሽያባ።

25 ሄሳ ታኒ ጌሻዳ ኤራይስ፤ ታኒ፥ ህንተ አማኖን ድጫናዳነ ኡፋይታናዳ ህንተራ ፓፃ ዳና። 26 ሄሳ ግሾ፥ ታኒ ህንተኮ ስማዳ ያ ዎደ፥ ክርስቶስ የሱሳራ ህንተ ደእያ ደኡዋን ታናን ደእያ ጬቀተይ ህንተዉ ዳራና።

27 ኡባፈ አድ፥ ህንተ ክርስቶሳ ዎንገላስ ቦንቾ ኤህያ ደኦ ደእተ። ታ ህንተና በእን ዎይኮ በኦና እፅን፥ ህንተ እስ ቆፋን ምን ኤቅድ፥ ሀራት ዎንገላን አማናና መላ እስ ዎዛናን ግድድ እስፈ ባፀተይሳ ታ ስአና። 28 ህንተ ሞርከታስ ያዮፍተ። ኤንቲ ህንተራ ኤቀትያባ ግድኮ ሄስ ህንተዉ አቶተስ፥ ኤንታዉ ዮስ ፆሳፈ ግድዳ ማላ። 29 ክርስቶሳስ ኦያ ቃዳይ ህንተዉ እመትዳይ፥ ህንተ እያ አማናና መላ ፃላላ ግዶናሽን ህንተ እያ ግሾ መቶ ኤካና መላሳ። 30 ሄሳ ግሾ፥ ህንተ ታ ዋይያ ካሰ በእደታ፤ ሀእካ ታ ዋየተይሳ ስኤታ። ህንተካ ታ ዋይያ መላ ዋየተታ።✝