ሳምሶን ማቾ ኤኩዋ
1 እስ ጋላስ ሳምሶን ትምና ዎስ፤ ያን እስ ፍልስፄመ ጌላእዉ በእስ። 2 እ ሶ ስሚድ ባ አዋነ ባ አይዉ፥ "ታኒ ትምናን እስ ፍልስፄመ ጌላእዉ በአስ፤ ሀእ እዮ ታዉ ኦይችድ እምተ" ያግስ።
3 ሽን እያ አዋነ አይያ፥ "ማቾ ኦይቻናዉ ሀ ቃፃረትቦና ፍልስፄመታኮ ባናዉ ነና አይ ኮሽዴ? ኑ ኮቻ ግዶን ዎይኮ ኑ አሳ ኡባ ግዶን ነዉ ሀንያ ማጫ ናአ ደማናዉ ዳንዳአብኪ?" ያግድ ኦይችዶሶና።
ሽን ሳምሶን ባ አዋኮ፥ "ታኒ እዮ ዶስዳ ግሾ፥ እዮ ኦይቻዳ ታዉ እማ" ያግስ። 4 ፍልስፄመታ ኦላናዉ ጎዳይ ጋሶ ኮይድ፥ ሄሳ ኤንታ ቦላ ኦይሳ ሳምሶና አዋይነ አይያ ኤርቦኮና። ሄ ዎደ ፍልስፄመት እስራኤለታ ሃሮሶና።
5 ሳምሶን ባ አዋራነ ባ አየራ ትምና ዎስ። ኤንቲ ትምና ዎይነ ጋደ ማታራ ካንድ አያ ዎደ እስ ዎዳላ ጋሞይ ጉድሸ እያ ቦላ ከይስ። 6 ሄ ዎደ ጎዳ አያናይ ሳምሶና ቦላ ዎልቃን ዎስ፤ እ ዴሻ ማር ዱሰረይሳዳ ባ ኩሸን አይኮካ ኦይኮና ጋሙዋ ዱሰረ የግስ። ባ ኦዳይሳ ባ አዋስነ ባ አየስ ኦድቤና። 7 ሄሳፈ ጉየ ብድ ጌላእዉ ኦድስስ፤ እዮ ዶስስ።
8 ጉ ዎደፐ ጉየ እዮ ኤካናዉ ያ ስሚድ ብስ። ኦግያ ብሸ ባ ዎዳ ጋሞ ባዉታ በአናዉ ኦገፐ ጋፃ ከይድ ብያ ዎደ ጋሞ ባዉታ ግዶን ማ ኤስ ኤስዳይሳ በእስ። 9 ሄ ኤሳፈ ጉራ ቃንፅ ኤክድ ምሸ ኦግያ ብስ። ባ አዋነ ባ አይዉ ጋክድ፥ ባ ኦይክዳ ኤሳፈ ጉራ እምን፥ ኤንትካ ምዶሶና። ሽን ሳምሶን ሄ ኤሳ ጋሞ ባዉታ ግዶፈ ኤክዳይሳ ኤንታዉ ኦድቤና።
10 እያ አዋይ ጌላእዉ በአናዉ እ ሶ ብን፥ ሳምሶን ያን ግብራ ጊግስስ። ሄሳ መላ ግብራይ ያጋኖን ናአተት ኦያ ሜዘትዳ ዎጋ። 11 ፍልስፄመ አሳይ እያ በእዳ ዎደ እያራ ጋምአና መላ ሀስታሙ ናአተታ ዶርድ የድዶሶና። 12 ሳምሶን ኤንታ፥ "አነ ህንተ ኤርያኮ እስ ቃንእሸ ታ ህንተና ኦይቻና። ያጋኖይ ቦንቸትያ ላፑን ጋላሳ ግዶን ሀ ቃንእሽያ ብርሸ ታዉ ህንተ ኦድያባ ግድኮ ታኒ ህንተዉ ሀስታሙ ሊኖ አፍላነ ሀስታሙ ኩመ ማኦ እማና። 13 ሽን ህንተ ታዉ ብርሸ ኦዳናዉ ዳንዳኦና እፅኮ ህንተ ታዉ ሀስታሙ ሊኖ አፍላነ ሀስታሙ ኩመ ማኦ እሜታ" ያግድ ኦይችስ።
ኤንቲ፥ "ኤሮ፥ ነ ቃንእሽያ ኑስ ኦዳ" ያግዶሶና።
14 እ፥
"መይሳፈ ሜተትያባይ በንትስ፤
ምኑዋ ጋርሳፈ ማልእያባይ ከይስ" ያግስ።
ሄ ጋላስ ጋካናዉ ኤንቲ ቃንእሽያ ብርሻናዉ ዳንዳእቦኮና።
15 ኦይዳን ጋላስ ኤንቲ ሳምሶና ማችዉ፥ "ነ አዝና ጭማዳ ቃንእሽያ ብርሸ እ ኑስ ኦዳና መላ ኦ። ሄስ ሀኖና እፅኮ፥ ኑኒ ነናነ ነ አዋ ኬ ታማን ፁጋና። ህንተ ኑና ፄግዳይ ኑና ማንቅሳናሴ?" ያግዶሶና።
16 ያትን፥ ሳምሶና ማችያ ዬካሸ እያኮ ሺቃዳ፥ "ኔኒ ታና ዶሳካ፤ ነ ታና ዳሮ እፃሳ። ኔኒ ታ ቢታ አሳ ቃንእሸ ኦይቻዳ ብርሸ ታዉ ኦዳባካ" ያጋሱ።
እ ዛሪድ፥ "ሄሳ ታኒ ታ አዋስነ ታ አየስ ኦዳብከ። ያትን፥ ነዉ አይስ ኦዶ?" ያግስ። 17 ያጋኖይ ቦንቸትያ ላፑን ጋላሳ ኡባን ዬካዳ ሸምፖ ድጋሱ። ላፑን ጋላስ ቃንእሽያ ብርሸ እዉ ኦድስ፤ እያ ባዳ ባ ቢታ አሳስ ኦዳሱ።
18 ያትን፥ ላፑን ጋላስ አው ዉላናፐ ስን ካታማ አሳይ፥
"ኤሳፈ አድ ማልእያባይ፥
ጋሞፈ አድ ምንያባይ አይቤ?"
ያግድ ቃንእሽያ ብርሸ ኦድዶሶና።
ሳምሶን ኤንታኮ፥ "ህንተ ታ ኡሰን ጎዮናባ ግድያኮ፥ ታ ቃንእሽያ ብርሸ ኤረከታሽን" ያግስ።
19 ሄሳፈ ጉየ፥ ጎዳ አያናይ እያ ቦላ ዎልቃን ዎን፥ አስቃሎና ዎድ፥ ሀስታሙ አስ ዎስ። ኤንታ ማኡዋ ቃር ኤክድ ቃንእሽያ ብርሽዳ አሳስ እሚስ። ሀንዳባ ኡባን ዳሮ ሸነትድ ባ አዋ ሶ ስምስ። 20 ሳምሶና ማችያ ዋና ላዛን ግድዳ እያ ላግያስ እመታሱ።