አይሰይሳታ ማፃፋ 10

ቶላ

1 አብመለከይ ሀይቅዳፐ ጉየ፥ ይሳኮራ ኮቸ ግድዳ ዶዳ ናኣ፥ ፑሀ ናአይ ቶል፥ እስራኤለ አሳ አሻናዉ ደንድስ። እ ደረይ ዳርያ ኤፍሬማ ቢታን ሳምራን ደእስ። 2 ቶል እስራኤለ አሳ ላታማነ ሄ ላይ አይስስ። ቶል ሀይቅድ፥ ሳምራን ሞገትስ።

ያእራ

3 ቶላፐ ካልድ፥ ጋላዳ አደይ ያእር ደንድስ። እ እስራኤለ አሳ ላታማነ ናምኡ ላይ አይስስ። 4 እያዉ ሀስታሙ ባቁሎ ቶግያ ሀስታሙ አደ ናይት ደኦሶና። ኤንታዉ ጋላዳ ቢታን ሀስታሙ ካታማት ደኦሶና። ሄ ካታማት ሀች ጋካናዉ ያእራ ካታማታ ጌተትድ ፄገቶሶና። 5 ያእር ሀይቅድ ቃሞናን ሞገትስ።

ዮፍታሄ

6 ቃስካ እስራኤለ አሳይ ጎዳ ስንን ኢታባ ኦዶሶና። ኤንቲ ባኣለነ አስታሮታ ኤቃታ፥ ሶረ ፆሳታ፥ ስዶና ፆሳታ፥ ሞአበ ፆሳታ፥ አሞነ ፆሳታነ ፍልስፄመ ፆሳታ ጎይንዶሶና። ኤንቲ ጎዳ አጋግዶሶና፤ እያ ጎይንቦኮና። 7 ጎዳይ እስራኤለ አሳ ቦላ ሀንቀትድ፥ ኤንታ ፍልስፄመ አሳስነ አሞነ አሳስ አድ እሚስ። 8 ሄ ላይ ፍልስፄመትነ አሞነት እስራኤለ አሳ ኡንኤዶሶና። ዮርዳኖሰ ሻፋፐ ዶሎሀ ባጋን፥ አሞረት ካሰ ደእዳ ጋላዳ ቢታን ደእያ እስራኤለ አሳ ኤንቲ ታማነ ሆስፑን ላይ ሃርዶሶና። 9 ቃስካ አሞነ አሳይ ይሁዳ፥ ብንያመነ ኤፍሬማ ኮቻታ ኦላናዉ ዮርዳኖሰ ሻፋ ፕንዶሶና፤ እስራኤለ አሳይ ዳሮ ኡንኤትዶሶና።

10 ሄሳፈ ጉየ፥ እስራኤለ አሳይ፥ "ኑኒ ነና ኑ ፆሳ አግድ፥ ባኣለ ጎይንድ፥ ናጋራ ኦዳ" ያግድ ጎዳኮ ዋስዶሶና።

11 ጎዳይ ኤንታኮ፥ "ግብፀት፥ አሞረት፥ አሞነት፥ ፍልስፄመት፥ 12 ስዶናት፥ አማለቃትነ ሞኣነት ህንተና ኡንኤን፥ ህንተ ታኮ ዋስን፥ ታኒ ህንተና ኤንታ ኩሸፐ አሻብክና? 13 ሽን ህንተ ታና አግድ ሀራ ፆሳታ ጎይንደታ፤ ህዛፐ ታኒ ህንተና አሽከ። 14 ብድ ህንተ ዶርዳ ፆሳኮ ዋስተ። ህንተና መቶይ ጋክያ ዎደ አነ ኤንቲ አሾ" ያግድ ዛርስ።

15 ሽን እስራኤለ አሳይ ዛሪድ ጎዳኮ፥ "ኑኒ ናጋራ ኦዳ። ነ ኮይዳባ ኑ ቦላ ኦ፤ ሽን ሀያና ሀች ኑና አሻ" ያግዶሶና። 16 አላጋ ፆሳታ ባንታ ግዶፈ ድግድ፥ ጎዳ ጎይንዶሶና። ጎዳይ እስራኤለ አሳ ኡንኤተ በእድ ምሸትስ።

17 ሄሳፈ ጉየ፥ አሞነ ኦላንቾት ኦላስ ጊግድ፥ ጋላዳን ሺቅዶሶና። እስራኤለ አሳይ እስፈ ሺቅድ ጋላዳን ምፅጳን ዱንካንዶሶና። 18 ጋላዳ ቢታ ሀላቃት ባንታ ግዶን፥ "አሞነ ኦላንቾታራ ኮይሮትድ ኦላ ጋሄታናይ ኦኔ? ሄ አደይ ጋላዳ ቢታን ደእያ አሳ ኡባስ ሀላቃ ግዳና" ያግዶሶና።