ሳምሶን ፍልስፄመታ ሀሎ ከይስ
1 ጉ ዎደፐ ጉየ፥ ግስተ ጫካ ዎደ ሳምሶን ባ ማችዉ በአናዉ እስ ኡርገ ኮለ ኤክድ ብስ። ናኤ አዋኮ፥ "ታኒ ታ ማችያ ደእያ ክፍልያ ገላናዉ ኮያይስ" ያግስ።
ሽን እ አዋይ እ ገሎናዳ ድግስ። 2 እ አዋይ ሳምሶናኮ፥ "ኔኒ እዮ እፅዳባ ዳንን እዮ ነ ላዛንስ እማስ። ሽን እ፥ ካሎ ምችያ ኢፐ አዳ ማላ ሎኦ ግደኬ? እዮ ኤካ" ያግስ።
3 ሳምሶን፥ "ታኒ ሀእ ፍልስፄመ አሳ ቦላ ኢታባ ኦኮ ባላ ግድከ" ያግስ። 4 ሄሳፈ ጉየ፥ ብድ ሄ ፄቱ ዎርካናታ ኦይክድ ናምኣ ናምአ ጎይና እስፈ ጋ ቃችድ ጎይናታፐ ግዶን ፆምፐ ዎድ ቃችስ። 5 ፆምፕያን ታማ ኦይድ ቡሮ ጫከትቦና ፍልስፄመታ ካ ግዶ ዎርካናታ የድስ። ታማይ ጫከትዳ ካ፥ ኤቆን ደእያ ካ፥ ዎይንያነ ሻማሁዋ ምስ።
6 ፍልስፄመት፥ "ሀይሳ ኦዳይ ኦኔ?" ያግድ ኦይችዶሶና።
አሳይ፥ "ሄሳ ኦዳይ ሳምሶና። ትምና አስ ግድዳ እያ ቦሎይ፥ እያ ማችዉ እያ ላዛንስ እምዳ ግሾ ሄሳ ኦስ" ያግዶሶና። ፍልስፄመት ብድ እዮነ እ አዋ ታማን ፁግዶሶና።
7 ሳምሶን ኤንታኮ፥ "ህንተ ሄሳ ኦዳ ግሾ ታ ሀሎ ከዮና አግከ" ያግስ። 8 እ ኤንታ ዎልቃማ ኢታ ሾች ሾጭድ ዳሮታ ዎስ። ሄሳፈ ጉየ ብድ፥ ኤታማ ጎንጎሉዋን ደእስ።
9 ፍልስፄመ አሳይ ይድ ይሁዳን ዱንካንድ ለሀ ካታማ ኦልስ። 10 ይሁዳ አሳይ፥ "አይስ ኑና ኦላናዉ ይደቲ?" ያግድ ኦይችዶሶና።
ኤንቲ፥ "ኑኒ ሳምሶና ኦይክድ ቃቻናዉነ እ ኑ ቦላ ኦዳይሳዳ እያ ቦላ ኦናዉ ይዳ" ያግድ ዛርዶሶና። 11 ያትን፥ ይሁዳፐ ሄ ሙኩሉ አሳይ ኤታማ ጎንጎሉዋ ብድ፥ ሳምሶና፥ "ኑና ሃረይ ፍልስፄመ ግደይሳ ኤርኪ? ያትን፥ ኑ ቦላ ሀይሳ መላ ፓላባ አይስ ኦይ?" ያግዶሶና።
እ ዛሪድ፥ "ኤንቲ ታ ቦላ ኦዳይሳዳ ታንካ ኤንታ ቦላ ኦስ" ያግስ።
12 ኤንቲ ዛሪድ፥ "ኑኒ ይዳይ ነና ቃችድ፥ ፍልስፄመታስ አድ እማናሳ" ያግዶሶና።
ሳምሶን ዛሪድ፥ "ህንተ ኑ ነና ዎኮ ግድ ታዉ ጫቅተ" ያግስ።
13 ኤንቲ፥ "ኤሮ፥ ኑኒ ነና ቃችድ ኤንታዉ አድ እማናፐ አትሽን፥ ዎኮ" ያግድ ዛርዶሶና። ሄሳ ግሾ፥ ናምኡ ኦራ ዎዶሮን ቃችድ ጎንጎሉዋፐ ከስድ ኤፍዶሶና።
14 ሳምሶን ለሀ ብዳ ዎደ ፍልስፄመት ቡራቅሸ እያኮ ይዶሶና። ጎዳ አያናይ እያ ቦላ ዎልቃን ዎስ። እያ ኩሸይ ቃሸትዳ ዎዶሮይ ሻሎይ ታማ በእድ ዱፀረተይሳዳ ዱፀረት ዎስ። 15 ማታ ዎደ ሀይቅዳ ሀረ ጋጮ ደምድ፥ እያራ ሙኩሉ አስ ዎስ። 16 ሳምሶን፥
"ሀረ ጋጮን፥
አሀ ቦላ አሀ ዶራስ።
ሀረ ጋጮን
ሙኩሉ አስ ዎስ" ያግስ። 17 ሃሳያ ዉርስዳፐ ጉየ፥ ባ ኦይክዳ ጋጩዋ ሆልድ ሄ በሳ ራማት-ለሀ15:17 ራማት-ለሀ፦ ሀ ሱን ብርሸይ "ጋፓታ ደረ" ጉሱ። ያግድ ፄግስ።
18 ሳምሶን ዳሮ ሳሞትድ፥ "ኔኒ ሀይሳ መላ ግታ ፆኖ ታዉ ነ አይልያስ እማዳሳ። ያትን፥ ታኒ ሀእ ሳሞን ሀይቆ? ሀ ቃፃረቶና አሳ ኩሸን ዎ?" ያግድ ፆሳኮ ዋስስ። 19 ፆሳይ ለሀን ደእያ አፎ ካካ ጳልቅን እያፐ ሃ ከይስ። ሳምሶን ሄ ሃ ኡይድ አልዳ ዎደ እያዉ ሸምፖይ ስምስ። ሄሳ ግሾ፥ ሄ በሳ አይን-ሀቆረ15:19 አይን-ሀቆረ፦ ሀ ሱን ብርሸይ ፄገይሳታ ፑልቶ ጉሱ። ያግድ ፄግስ። ሄ በሳይ ሀች ጋካናዉ ለሀን ደኤስ።
20 ፍልስፄመት ቢታ ሃርያ ዎደ ሳምሶን እስራኤለ ላታሙ ላይ አይስስ።