እስ ሌወነ እያ ላገዉ
1 እስራኤለ ቢታን ካዎይ ባይና ዎደ ደረይ ዳርያ ኤፍሬማ ቢታን፥ ሃሆ በሳን፥ ሌወ ኮቸ ግድዳ እስ ኡራይ ደኤስ። ሄ ኡራይ ይሁዳ ቢታን፥ ቤተለመ ካታማፐ እስ ላገ ባዉ ኤህስ። 2 ሽን እያራ ኦየታዳ ይሁዳ ቢታን ቤተለመ ካታማን ደእያ ባ አዋ ሶ ባዳ ያን ኦይዱ አጌና ኡታሱ። 3 እ አዝናይ እዮ ጭማትድ ሶ ዛራናዉ ባ አይልያነ ናምኡ ሀረታ ኤክድ ብስ። እ ያ ጋክያ ዎደ እያ ሞካ ኤካዳ ባ አዋ ሶ ገልሳሱ፤ እ አዋይ እያ በእዳ ዎደ ኡፋይትድ ሞክስ። 4 ናኤ አዋይ እያ የዶና እፅን፥ ያን እያራ ምሸነ ኡይሸ ሄ ጋላስ ጋምእስ። 5 ኦይዳን ጋላስ ዎንታ ጉራ ደንድድ፥ ባናዉ ጊግዶሶና። ሽን ናኤ አዋይ ባ ናኤ አዝናኮ፥ "ጉ ካ ማዳ ጋሽታዳ ባ" ያግስ። 6 ናምኡ አሳት ኡትድ እስፈ ምዶሶናነ ኡይዶሶና። ሄሳፈ ጉየ ናኤ አዋይ እያኮ፥ "ሀያና፥ ሀች ኡፋይታዳ ሀይሳን አቃ" ያግስ። 7 ሌወይ ባናዉ ደንድን፥ ናኤ አዋይ ቦና መላ ዎስን ቃስካ ያን አቅስ።
8 እቻሻን ጋላስ ዎንታ ጉራ ባናዉ ደንድን፥ ናኤ አዋይ፥ "ሀያና፥ ጉ ካ ማዳ፥ ጋሽታዳ ኦማርስ ባ" ያግስ። ኤንቲ ናምአይካ እስፈ ካ ምዶሶና።
9 ሌወይ ባ ላገራነ ባ አይልያራ ባናዉ ከይን፥ ናኤ አዋይ፥ "ሄኮ፥ ሳእ ቃምስ፤ ሀእካ አቅተ፤ ዎንታ ጉራ ደንድድ ህንተ ሶ ቢተ" ያግስ።
10 ሽን እ ያን አቃናዉ ኮይቦና ግሾ ባ ላገዉ፥ ባ አይልያነ ናምኡ ጫነትዳ ሀረታ ኤክድ ያቡሰ ጌተትያ የሩሳላመ ካታማ ጋክዶሶና። 11 ኤንቲ ያቡሰ ማትያ ዎደ ሳእ ዳሮ ኦማርስን፥ አይለይ፥ "ሀይሳን፥ ያቡሰታ ካታማን አቅኮ ዋናኔ?" ያግድ ባ ጎዳ ኦይችስ።
12 ሽን እያ ጎዳይ፥ "ሀይሳን፥ እስራኤለ አስ ባይና አላጋ ካታማ ቦኮ። ግብአ ካታማ ጋካናዉ ባና" ያግስ። 13 ቃስካ ባ አይልያኮ፥ "ሃያ፥ ኑኒ ግብአን ዎይኮ ራማን አቅያ በሲ ደማና" ያግስ። 14 ሄሳ ግሾ ባንታ ኦግያ ኦይክድ ብዶሶና። ብንያመ ቢታን ግብአ ካታማ ኤንቲ ማትያ ዎደ አው ዉልስ። 15 ኤንቲ ግብአ ካታማ ገልድ አቃናዉ ያ ብዶሶና። ሄ ካታማ አሳይ ዱላታ ኡትያ በሳን ኡትዶሶና፤ ሽን ኤንታ ባ ሶ ኤፍድ አይስያ አስ በንትቤና።
16 ኤንቲ ያን ኡትዳሽን፥ ሳእ ኦማርስን ጋደፐ ባ ሶ ስምያ እስ ጭማ አደይ ኤንታ ማታራ አስ። ሀ አደይ ካሰ ደረይ ዳርያ ኤፍሬማ ቢታፈ ይዳ አስ፤ ሽን ሀእ ግብአ ካታማን ደኤስ። ሄ ቢታን ብንያመ ኮቻፈ የለትዳ አሳይ ደኦሶና። 17 ሄ ጭማ አደይ፥ ካታማ አሳይ ዱላታ ኡትያ በሳን ኡትዳ አድያ በእድ፥ "አዉፐ ያዲ? አዉ ባይ?" ያግድ ኦይችስ።
18 ሌወይ ዛሪድ፥ "ኑኒ ይሁዳ ቢታን ቤተለመ ካታማፐ ይዳ። ሀእ ደረይ ዳርያ ኤፍሬማ ቢታን፥ ሃሆ በሳን ደእያ ፆሳ ኬነ ኑ ሶ ቦስ። ኑና ባ ሶ ኤፍድ አይስያ አስ ደምቦኮ። 19 ኑ ሀረታስ ኡቱልነ ካለይ ደኤስ፤ ታዉ፥ ታ ላገስነ ታ አይልያስ ግድያ ካነ ዎይነ ኡሽ ደኤስ፤ ኑስ ኮሽያባ ኡባ ኦይክዳ" ያግስ።
20 ጭማ አደይ፥ "ሳሮይ ህንተዉ ግዶ፤ ታ ሶ የተ፤ ታ ሶን አቅተ፤ ህንተ ኮያባ ኡባ ታ ህንተዉ እማና። ሀ ካታማ ዳባባን ህንተ አቃናዉ በሰና" ያግስ። 21 ኤንታ ባ ሶ ኤፍስ፤ ኤንታ ሀረታስ ምያባ የግስ። እማት ባንታ ቶሁዋ ሜጨትድ ካሆ ምዶሶና።
22 ኤንቲ ኡፋይትሽን፥ ካታማፐ ኢታ አሳት ይድ፥ ኬ ተቅድ፥ ፐንግያ ቆፀ ዶምዶሶና። ኤንቲ ጭማ አድያኮ፥ "ሀ ነ ሶ ገልዳ አድያ ሃ ከሳ፤ ኑኒ እያራ ጋሄታናዉ ኮዮስ" ያግዶሶና።
23 ሄ ኬ ጎዳይ፥ "ሀነና፤ ታ እሻቶ፥ ሄሳ መላ ፓላባ ኦፕተ፤ ሀ አደይ ታ እማ። 24 ሄኮ፥ ታ ጌላኦ ናእያነ እያ ላገያ ሀይሳን ደኦሶና። ታኒ ኤንታ ህንተዉ ካረ ከሳና፤ ህንተ ኤንታ ቦላ ኮይዳባ ኦተ፤ ሽን ሀ አድያ ቦላ ሄሳ መላ ኢታባ ኦፍተ" ያግስ።
25 ሽን አሳት እ ግዳይሳ ስኦና እፅዶሶና። ሌወይ ባ ላገዉ ካረ ሆልስ። ሳእ ዎንታና ጋካናዉ ቃማ ኩመ ታራን ታራን ኢራ ዎልቃን ጋሄትድ፥ እዮ ፓፃ ካእሸ አይስዶሶና፤ ሳእ ዎንታና ሀንሽን እዮ የድ አግዶሶና። 26 ዎንታናዉ ጎንተይ ዞእያ ዎደ ያዳ፥ እ ጎዳይ አቅዳ ጭማ አድያ ኬ ፐንገን ኩንዳሱ፤ ፃልቀይ ዶላና ጋካናዉ ያን ዝንአሱ።
27 ዎንታ እ ጎዳይ ደንድድ፥ ባ ኦግያ ባናዉ ፐንግያ ዶይድ ከይያ ዎደ እያ ላገያ ኬ ፐንገን ባ ኩሽያ ምጫዳ ጉፋንዳሮ በእስ። 28 እ ጎዳይ፥ "ደንዳ፤ አነ ቦስ" ያግስ። ሽን እያ አይኮካ ዛራቡኩ። ያትን፥ እ አሀ ሀረን ጫንድ ባ ሶ ብስ። 29 እ ባ ሶ ጋክዳ ዎደ ማሻ ኤክድ፥ ባ ላገ አሀ ታማነ ናምኡ በሳን ቃንፀረድ፥ እስ እስ ቃንፁዋ ታማነ ናምኡ እስራኤለ ኮቻታስ የድስ።
30 ሄሳ በእዳ ኡባይ፥ "እስራኤለ አሳይ ግብፀ ቢታፈ ከዮደፐ ሀች ጋካናዉ ሀይሳ መላባይ ሀንቤና፤ ኑካ በእቦኮ። አነ ሀይሳ ቆፕ በእድ፥ አኬካን ዞረትድ፥ አይ ኦነኮ ኑስ ኦድተ" ያግዶሶና።