ዛብሄላነ ስልማና
1 ኤፍሬማ አሳይ ገድዮናኮ፥ "ምድያመታ ኦላናዉ ባሸ ኑና አይስ ፄጋብኪ? ኑ ቦላ ሄሳ መላባ አይስ ኦዲ?" ያግድ ይሎትዶሶና።
2 ሽን ገድዮን፥ "ህንተ ኦዳይስ ታ ኦዳይሳፈ አኔ? ታ ኮቻይ አብኤዘር ሺሽዳ ካፈ ህንተ ኤፍሬማ ኮቻት ቆርዳ ቡይ አኔ? 3 ምድያመ ሀላቃታ፥ ኦሬባነ ዘባ ፆሳይ ህንተ ኩሸን አድ እሚስ። ህንተ ኦዳይሳ መላ ታኒ አይ ኦናዉ ዳንዳእያና?" ያግስ። እ ያግን ኤንቲ ዛርብዶሶና።
4 ገድዮንነ እያራ ደእያ ሄ ፄቱ አሳይ ዮርዳኖሰ ሻፋ ፕንዶሶና። ኤንቲ አይ ዳቡርኮካ ባንታ ሞርከታ የደ አግቦኮና። 5 ኤንቲ ሱኮታ ጋክዳ ዎደ ገድዮን ሄ ካታማ አሳኮ፥ "ታ አሳይ ዳቡርዳ ግሾ፥ ሀያና ጉ ካ እመርከት። ታኒ ምድያመ ካዎታ ዘባነ ሳልሞና የደሸ ደአይስ" ያግስ።
6 ሱኮታ ካታማ ሀላቃት፥ "ዘባነ ሳልሞና ኔኒ ድአባካሽን ነ ኦላንቾታስ አይስ ካ እማኔ?" ያግዶሶና።
7 ገድዮን፥ "ሎኦ አይኮይ ባዋ፤ ጎዳይ ዘባነ ሳልሞና ታ ኩሸን አድ እምያ ዎደ ታኒ ባዞ አጉንንነ ፁንዱቀን ህንተና ዋና" ያግስ። 8 ያፐ ደንድድ ፓኑኤላ ብድ፥ ያን ደእያ አሳካ ሄ ኦይሻ ኦይችን፥ ፓኑኤላ አሳይ ሱኮታ አሳይ ዛርዳይሳዳ ዛርዶሶና። 9 እ ፓኑኤላ አሳኮ፥ "ታኒ ፆናዳ ሳሮ ስምያ ዎደ ህንተ ካታማ ናግያ ሀ አዱሳ ግምብያ ላላና" ያግስ።
10 ሄ ዎደ ዘብነ ሳልሞን ዶሎሀ ባጋፈ ይዳ ኦላንቾታፐ አትዳ 15,000 ኦላንቾታራ ቃርቆራን ደኦሶና። ኤንታፈ 120,000 ኦላንቾት ኦላን ሀይቅዶሶና። 11 ገድዮን ኖባፐነ ዮግባፐ ዶሎሀ ባጋን ደእያ ባዞ ኦግያራ ብድ፥ ያን ደእያ ኦላንቾት ቆፖና ደእሽን ኦላ ደንስ። 12 ናምኡ ምድያመ ካዎት ዘብነ ሳልሞን ባቃትዶሶና፤ ሽን ገድዮን ኤንታ የደ ጋክድ ድእስ። ኤንታ ኦላንቾት ኡባይ ዎልቃማ ዳጋማን ኩንድዶሶና። 13 እዮኣሳ ናአይ ገድዮን ሄሬሳ ባጋራ ኦላፐ ስምስ። 14 ሱኮታፐ እስ ናአተ ናኣ ኦይክድ ኦይችስ። ሄ ናአይ ላፑን ታማነ ላፑን ሱኮታ ሀላቃታነ ጭማታ ሱን ፃፍድ እያዉ እሚስ። 15 ሄሳፈ ጉየ፥ ገድዮን ሱኮታ ይድ፥ " ‘ዘባነ ሳልሞና ኔኒ ድአባካሽን፥ ዳቡርዳ ነ አሳስ አይስ ካ እማኔ?’ ግድ ታ ቦላ ቀልቅስደታ፤ ሽን ዘባነ ሳልሞና ሀይሳ በእተ" ያግስ። 16 ገድዮን ባዞ አጉንነ ፁንዱቀ ኤክድ ሱኮታ ሀላቃታ ዋስ። 17 ቃስ ፓኑኤላን ካታማ አዱሳ ግምበ ሻኩዋ ላልድ ካታማን ደእያ አደታ ዎስ።
18 ያትድ ገድዮን ዘባነ ሳልሞና፥ "ህንተ ታቦረን አይ መላ አስ ዎደቲ?" ያግድ ኦይችስ።
ኤንቲ፥ "ነ መላ አስ፤ ኤንቲ ካዎ ናአ ዳኖሶና" ያግድ ዛርዶሶና።
19 ገድዮን፥ "ኤንቲ ታ እሻታ፤ ኤንቲ ታ አየ ናይታ። ደኦ ፆሲ ኤርያ መላ ኤንታ ህንተ ዎናባ ግድያኮ ታ ህንተና ዎከሽን" ያግስ። 20 ባ ባይራ ናኣ የተራኮ፥ "ደንዳዳ፥ ሀይሳታ ዎ" ያግስ። የተር ቡሮ ዮጋ ግድያ ግሾ ያይድ ባ ማሻ ሾድቤና።
21 ዘብነ ሳልሞን ገድዮናኮ፥ "ህዛ ነ ኑና ዎ፤ አደ ኦሶ ኦናዉ አደ ኮሼስ" ያግዶሶና። ያትን፥ ገድዮን ኤንታ ዎስ፤ ኤንታ ግማለታ ቆን ደእያ አሌቆ ኡባ ኤክስ።
22 እስራኤለ አሳይ ገድዮናኮ፥ "ኔኒ ኑና ምድያመታፐ አሽዳ ግሾ ኔኒ፥ ነ ናአይነ ነ ናኣ ናአይ ኑና ሃርተ" ያግስ።
23 ሽን ገድዮን፥ "ታኒ ህንተና ሃርከ፤ ታ ናአይካ ህንተና ሃረና፤ ጎዳይ ህንተና ሃራና" ያግስ። 24 እ ኤንታኮ፥ "ታ ህንተና እስባ ኦይቻይስ፤ ህንተ ኡባይ ድእድ ኤህዳ ሀይ ዎርቅያፈ ታዉ እምተ" ያግስ። (እስማኤላ አሳስ ሀይን ዎርቃ አሶይ ዎጋ።)
25 እስራኤለ አሳይ ዛሪድ፥ "ኤሮ፥ ኡፋይትድ እማና" ያግዶሶና። አፍላ ሂፅድ፥ አሳ ኡባይ ድእድ ኤህዳ ሀይ ዎርቅያ የግዶሶና። 26 ገድዮን ኤክዳ ሀይ ዎርቀይ ላታሙ ክሎ ግራመ ዴፄስ። ሄስካ፥ ሀራ አሌቆታ፥ ቆን አያ ጎዝዳታ፥ ምድያመ ካዎት ማእያ ኦቻ ቴራ ዳንያ ማኦታነ ኤንታ ግማለታ ቆያፐ ኤከትዳ አሌቆታ ጉጆናሽና። 27 ገድዮን ዎርቃ ኤቃ ምስልያ ጊግስድ፥ ባ ደእያ ኦፍራ ካታማን ዎስ። እስራኤለ አሳ ኡባይ ጎዳ አግድ ሄ ኤቃ ምስልያ ጎይንዶሶና፤ ሄስ ገድዮናስነ እያ ሶ አሳስ ፅሄ ግድስ።
28 ሄሳዳ ሀንድ፥ ምድያመ አሳይ እስራኤለ አሳስ ሃረትስ፤ ኤንቲ እስራኤለ አሳ ቦላ ናምአን ደንድቦኮና። ገድዮን ሀይቃና ጋካናዉ ኦይታሙ ላይ ቢታይ ዎፑ ግድ ደእስ።
ገድዮና ሀይቁዋ
29 የሩባኣላ ጌተትያ ገድዮን፥ እዮኣሳ ናአይ ባ ሶ ስሚድ ደእስ። 30 ገድዮን ዳሮ ማቾ ኤክዳ ግሾ፥ እያዉ ላፑን ታሙ አደ ናይት የለትዶሶና። 31 ሴከማን ደእያ ላገያ እያዉ አደ ናኣ የልን፥ እያ ሱን አብመለከ8:31 አብመለከ፦ ሀ ሱን ብርሸይ ታ አዋይ ካዎ ጉሱ። ያግድ ሱንስ። 32 እዮኣሳ ናአይ ገድዮን ሎኦ ጭምድ ሀይቅስ፤ ባ አዋ እዮኣሳ ዱፎን ሞገትስ። ሄ ዱፎይ አበዜራ ኮቻት ደእያ ኦፍራን ደኤስ።
33 ገድዮን ሀይቅዳፐ ጉየ፥ እስራኤለ አሳይ ጎዳ አግድ ባኣለ ፆሳታ ጎይንዶሶና። ባኣል-ብሪታ8:33 ባኣል-ብሪታ፦ ሀ ሱን ብርሸይ ባኣለ ጫቆ ጉሱ። ጌተትያ ኤቃ ባንታዉ ፆሰ ኦዶሶና። 34 እስራኤለ አሳይ ባንታ ዩሹዋን ደእያ ሞርከታ ኡባፈ ኤንታ አሽዳ ጎዳ ባንታ ፆሳ ሀሳይቦኮና። 35 እስራኤለ አሳስ ኦዳ ሎኦ ኦሱዋ ግሾ የሩባኣላ ጌተትያ ገድዮና ሶ አሳስ ሎኦ ኩሸ ዛርቦኮና።