1 አብራሃመይ ማምረ ግታ ምታ ጋርሳን ባ ዱንካንያ ፐንገን ሴታ ጋላስ ኡትዳሽን ጎዳይ እያዉ ቆንጭስ። 2 አብራሃመይ ቁ ግድ ፄልያ ዎደ እያ ማታን ኤቅዳ ሄ አሳታ በእስ። እ ኤንታ በእድ ኤንታራ ጋሄታናዉ ባ ዱንካንያ ፐንገፈ ደንድድ ኤንታኮ ዎፅ ብድ ኤንታ ስንን ዝግስ። 3 ያን ስሚድ፥ "አቤት ታ ጎዳዉ፥ ታ ነ ስንን ሳባ ደምዳባ ግድኮ ታና ነ አይልያ አጋዳ አፋ። 4 ጉ ሃ ዪኮ ህንተ ቶሆይ ሜጨትኮ ሀ ም ኩያን ሸምፕ ኤክተ። 5 ህንተ ታኮ ህንተ አይልያኮ ይዳ ግሾ ፃልድ ህንተ ብያ በሲ ባና መላ ታኒ ህንተዉ ምያባ ኤሀና" ያግስ።

ኤንትካ፥ "ዳሮ ሎኦ፥ ነ ግዳይሳዳ ኦ" ያግዶሶና።

6 አብራሃመይ ኤለስድ ሳርኮ ዱንካንያ ግዶ ገልድ፥ "ኤለሳዳ ሄ ጋባተ ሎኦ ለ ኤካ ሙኑቃዳ ኡይ ኡካ" ያግስ። 7 አብራሃመይ ቃስ ባ መሄታ ግዶ ዎፅ ብድ ሎኦ ቡልዱቡልዳ ማራ ዶርድ ባ እስ አይልያስ እምን እ ኤለስድ ሹክድ ጊግስስ። 8 ያትድ አብራሃመይ መቃ ማነ ጊግስዳ ማራ አሹዋ እማታ ስን አስ፤ ኤንቲ ምሽን እ ም ጋርሳን ኤንታ ማታን ኤቅስ።

9 ኤንቲ አብራሃመኮ፥ "ነ ማችያ ሳራ አዉኔ?" ያግድ ኦይችዶሶና።

እካ፥ "ህን ዱንካንያ ግዶና" ያግስ።

10 ጎዳይ እያኮ፥ "ዎንቶ ላይ ሀኖደ ቱማ ታ ኔኮ ስማና፤ ነ ማችያ ሳራ አደ ናአ የላና" ያግስ።

ሳራ ሄ ዎደ እያፐ ጉየ ባጋራ ደእያ ዱንካንያ ፐንገን ኤቃዳ ሄሳ ስአዉሱ። 11 አብራሃመይነ ሳር ባንታ ላይን ዳሮ ጭምዶሶና። ሳራ ናአ የልያ ዎደፐ አሱ። 12 ሄሳ ግሾ፥ ሳራ ባ ዎዛናን፥ "ታንነ ታ ጎዳይ ናምአይካ ጭምዳፐ ጉየ ዋንድ ሀ ኡፋይሳይ ሀናኔ?" ያጋዳ ሚጫሱ።

13 ጎዳይ አብራሃመኮ፥ " ‘ታኒ ጭምዳፐ ጉየ ናአ የላነ’ ጋዳ ሳራ አይስ ሚጫይ? 14 ጎዳስ ዳንዳኤቶናባይ ቱማ ደእዬ? ታ ነዉ ግዳይሳዳ ዎንቶ ላይ ሀኖደ ታ ስማዳ ያና፤ ሄ ዎደ ሳራ አደ ናአ የላና" ያግስ።

15 ሳራ ያሸትዳ ግሾ፥ "ታኒ ሚጫብከ" ጋዳ ላሀሱ።

ሽን እ፥ "ነ ቱማ ሚጫዳሳ" ያግስ።

16 አሳት ባናዉ ደንድሸ ሶዶመ ዱገ ፄልዶሶና። አብራሃመይ ኤንታና ሞይዛናዉ ኤንታራ ከይስ። 17 ፆሳይ እያኮ፥ "ታ ኦናዉ ሀንያባ አብራሃመፐ ቆሳነዬ? 18 አብራሃመይ ቱማ ግታነ ዎልቃማ ካዎተ ግዳና። ሀ ቢታ ካዎተት ኡባይ እያን አንጀታና። 19 ፅሎተነ ሱረ ፕርዳ ኦድ ጎዳ ኦግያ ናጋና መላ ባ ናይታነ እያፐ ጉየራ ያ ባ ሶ አሳ ዞራና መላ ታኒ እያ ዶራስ። ሄስካ፥ ፆሳይ አብራሃመስ እማና ግዳ ኡፋይሳ ፖላናሳ" ያግስ።

20 ጎዳይ አብራሃመኮ፥ "ሶዶመ ቦላነ ጋሞራ ቦላ ዋስያ ዋሶይ ዳርስ፤ ኤንታ ናጋራይካ ዳሮ ዴፅስ። 21 ሄሳ ግሾ፥ ኤንታ ኦሶይ ኤንታ ዋሱዋ መለኮ በአናዉ ታኒ ዱገ ዎና፤ ቃስ ሄሳ መላ ኢታ ግዶናኮ ሻካ ኤራና" ያግስ።

22 ሄሳፈ ጉየ፥ ናምኡ አሳት ሶዶመኮ ስሚድ ብዶሶና፥ ሽን አብራሃመይ ጎዳ ስንን ኤቅዳሱዋን ደኤስ። 23 አብራሃመይ ጎዳኮ ሺቅድ፥ "ቱማ ኔኒ ፅሎታ ኢታታራ እስፈ ይሳኔ? 24 ሄ ካታመን እሻታሙ ፅሎ አሳት ደእኮ ነ ይሳኔ? ያን ደእያ እሻታሙ ፅሎ አሳታ ግሾ ሄ ካታማ አሽኪ? 25 ሄሳ መላ ኦሶይ ኔፐ ሃኮ፤ ፅሉዋ ኢታራ ዎል ጋዳ ዎይስ፥ ፅሉዋነ ኢታ እስ አይፍያን ፄለይስ ኔፐ ሃኮ። ሀ ቢታ ኡባ ፕርድያ ኔኒ ፅሎ ፕርድኪ?" ያግስ።

26 ጎዳይ፥ "ታ ሶዶመን እሻታሙ ፅሎታ ደምያኮ ሄ በሳ ኡባ ኤንታ ግሾ ጋዳ አሻና" ያግስ።

27 አብራሃመይ ዛሪድ፥ "ታኒ ቢታነ ብዶ ግዳዳ ታ ጎዳራ ኦደታናዉ ምነታክቻስ፤ 28 እሻታሙ ፅሎታፐ እቻሻት ፓጭኮቺ? ኔኒ ሄ እቻሻታ ግሾ ጋዳ ሄ ካታማ ኡባ ይሳነዬ?" ያግስ።

ጎዳይ፥ "ታኒ ኦይታማነ እቻሹ ፅሎታ ደምኮ ሄ ካታማ ይስከ" ያግስ።

29 አብራሃመይ ዛሪድ፥ "ያን ኦይታሙ ፃላል ደእኮቺ?" ያግስ።

እካ፥ "ኦይታማታ ግሾ ጋዳ ሄ ካታማ ይስከ" ያግስ።

30 ቃስካ አብራሃመይ ዛሪድ፥ "ሀይ ታ ጎዳዉ፥ ታና ሀንቀቶፋ፥ ታኒ ጉጃዳካ ኦደታና። ሀስታሙ ፃላል ደእኮቺ?" ያግስ።

ጎዳይ ዛሪድ፥ "ታኒ ያን ሀስታሙ ደምኮ ይስከ" ያግስ።

31 አብራሃመይ፥ "ታኒ ጎዳራ ኦደታናዉ ምነታክቻስ፤ ኦን ኤር ያን ላታሙ ፃላል ደእኮች" ያግስ።

ጎዳይካ፥ "ሄ ላታማታ ግሾ ጋዳ ይስከ" ያግስ።

32 አብራሃመይ ቃስካ፥ "ሀይ ታ ጎዳዉ፥ ታና ሀንቀቶፋ ታ እስ ቶሆ ኦደታና፥ ያን ታሙ ፃላላ ደምኮቺ?" ያግስ።

እካ፥ "ታማታ ግሾ ጋዳ ታኒ ሄ ካታማ ይስከ" ያግስ።

33 ጎዳይ አብራሃመራ ኦደትድ ኦንግዳፐ ጉየ ብስ፤ አብራሃመይካ ባ ሶ ስምስ።