1 ሄሳ ግሾ፥ ይሳቅ ያይቆባ ፄግድ፥ "ካናነ ቢታ ማጫ ናይታፐ ማቾ ኤኮፋ። 2 ደንዳዳ ነ አየ አዋ ባቱኤላኮ ማሰጰፆመ ቢታ ባዳ ያፐ ነ አየ እሻ ላባ ማጫ ናይታፐ ማቾ ኤካ። 3 ኡባ ዳንዳእያ ፆሳይ ነና አንጆ፥ እ ነዉ ናይታ እሞ፥ ዳሮ ደረ ግዳና ጋካናስ እ ነና ዳርሶ። 4 ኔኒ ሀእ በተተን ኡትዳ ሀ ቢታ ነባ ኦና መላ ነዉነ ነ ሼሻስ ፆሳይ አብራሃመ አንጁዋ እሞ" ያግ አንጅድ ኪትስ። 5 ያግድ ይሳቅ ያይቆባ የድስ። ያይቆብ ማሰጰፆመ ቢታ ላባኮ ብስ። ላቢ ያይቆባነ ኤሳዌ አየ እርብቃ እሻነ አራመ አድያ ባቱኤላ ናአ።

6 ይሳቅ ያይቆባ አንጅድ ማሰጰፆመ ቢታፈ ማቾ ኤካና መላ እያ የድዳይሳ፥ እ ያይቆባ አንጅዳ ዎደ፥ "ካናነ ማጫስ ኤኮፋ" ግድ ኪትዳይሳነ፥ 7 ያይቆብ ባ አዋስነ ባ አየስ ኪተትድ ማሰጰፆመ ቢታ ብዳይሳ፥ ኤሳዌይ ኤርስ። 8 ኤሳዌይ ሄሳን ካናነ ቢታ ማጫስ ባ አዋ ይሳቅ አይ መላ እፅያኮ ኤርስ። 9 ሄሳ ግሾ፥ ኤሳዌይ አብራሃመ ናአ እስማኤላኮ ብድ፥ እያ ናእዉ ማህላቶ፥ ነባዮታ ምችዉ፥ ባ ማቸታ ቦላ ጉጅድ ኤክስ።

10 ያይቆብ በርሳበፐ ካራነ ባናዉ ከይስ። 11 እ፥ እስ በሲ ጋክያ ዎደ አው ዉልን፥ ቃማ ያን አቅስ። ሄ በሳን ደእያ ሹቻታፐ እሱዋ ቦርኮትድ ሄ በሳን ስክስ። 12 እ አሙሆ አሙህድ ኮዶ እሶይ ሳአን ኤቅን ፄራይ ሳሎ ጋክዳይሳነ፥ ፆሳ ኪታንቾት እያ ቦላራ ፑደ ከየይሳታነ ዱገ ዎይሳታ በእስ። 13 ሄ ኮዱዋስ ፄራን ጎዳይ ኤቅድ፥ "ታኒ ጎዳ፥ ነ አዋ አብራሃመ ፆሳ፥ ይሳቃ ፆሳ፥ ሀ ኔኒ ዝንእዳ ቢታ ነዉነ ነ ሼሻስ እማና። 14 ነ ሼሻ ሳአ ሻፈዳ ዳርሳና። ኔኒ ዶሎሀ ባጋ፥ ዉሎሀ ባጋ፥ ፑደሀ ባጋነ ዱገሀ ባጋ ዳልጋና። ቢታ ቦላ ደእያ አሳ ኡባይ ነ ባጋራነ ነ ሼሻ ባጋራ አንጀታና። 15 ታኒ ኔራ ደአይስ። ኔኒ ብያ በሳ ኡባን ታኒ ነና ናጋና። ታኒ ነና ሀ ቢታ ጉየ ዛራዳ ኤሀና። ታኒ ነዉ ኦና ግዳይሳ ፖላና፥ ነና አግከ" ያግስ።

16 ያይቆብ ስኮፈ ባርክድ፥ "ታ ኤራብከፈ አትሽን፥ ቱማ ጎዳይ ሀ በሳን ደኤስ" ያግስ። 17 እ ባብድ፥ "ሀ በሳይ ዋን ያሽ! ሀ በሳይ ፆሳ ኬፈ አትሽን፥ ሀራሶ ግደና። ሀይስ ሳሎ ፐንገ" ያግስ።

18 ዎንተ ጋላስ ዎንታ ጉራ ያይቆብ ደንድድ፥ ፆሳስ ዱማያናዉ ባ ቦርኮትዳ ሹቻ ኤክድ ቱሳ ኤስድ እያ ቦላ ዛይተ ትግስ። 19 ያይቆብ ሄ በሳ ቤተለ (ፆሳ ኬ) ግድ ፄግስ። ሽን ሄ ካታማይ ሄሳፈ ካሰ ሎዛ ጌተቴስ።

20 ያይቆብ፥ "ታ ብያ ኦግያን ነ ታና ናግኮ፥ ታዉ ካነ ማኦ እምኮ፥ 21 ነ ታና ታ አዋ ሶ ሳሮ ዛርኮ፥ ነ ታ ፆሳ ግዳና። 22 ታኒ ዱማያናዉ ቱሳ ኤስዳ ሀ ሹቻይ ፆሳ ኬ ግዳና። ቱማ ኔኒ ታዉ እምያባ ኡባፈ ታማፈ እሱዋ ነዉ እማና" ያግድ ፆሳስ ጫቅስ።