1 ናምኡ ላይፈ ጉየ፥ ግብፀ ካዎይ አሙሆ አሙህስ። ሄ አሙሁዋን እ ናይለ ሻፋ ጋፃን ኤቅስ። 2 ላፑን ኦርደነ ሞ ሚዛት ናይለ ሻፋፐ ከይድ፥ ማታ ምሽን በእስ። 3 ኤንታፈ ካልድ፥ ሀራ ላፑን ግልቃ ሚዛት ናይለ ሻፋፐ ከይድ፥ ሻፋ ጋፃን ደእያ ሀራ ሚዛታ ማታን ኤቅዶሶና። 4 ሄ ግልቃ ሚዛት ላፑን ኦርደነ ሞ ሚዛታ ምትዶሶና። ሄሳፈ ጉየ፥ ካዎይ ባርክስ።

5 እ ዛር ስክድ፥ ሀራ አሙሆካ አሙህስ። ላፑን ሎኦነ ሙሩታ ሞርኤት እስ ማቃ ቦላ ከይዶሶና። 6 ኤንታፈ ካልድ፥ ሌኦነ ዶሎሀ ባጋ ጫርኮን ሹልዳ ሀራ ላፑን ሞርኤት ከይዶሶና። 7 ሄ ሌእዳ ሞርኤት ሎኦነ ሙሩታ ሞርኤታ ምትዶሶና። ሄሳፈ ጉየ፥ ካዎይ ባርክድ አሙሆ ግደይሳ ኤርስ። 8 ሳአይ ዎንትን ስኮፈ እ ደንድያ ዎደ እያ ዎዛናይ ያርክስ። ሄሳ ግሾ፥ ግብፀን ደእያ ብታንቾታነ ኤራንቾታ ኡባ ካዎይ ፄግስድ ኤንታዉ ባ አሙሁዋ ኦድስ። ሽን እያዉ ሄ አሙሁዋ ብርሽያ አስ ይስ።

9 ኡሻ ካፖይ ሄ ዎደ ግብፀ ካዋኮ፥ "ታኒ ታ ናቁዋ ሀች ሀሳያይስ። 10 እስ ዎደ ካዎይ ባ አይለታ ሀንቀትድ፥ ታናነ ካ ካፑዋ ቃሾ ኬን የግስ። 11 ያን ደእሸ ኑ ናምአት አሙሆ አሙህዳ። ሄ አሙሆታስ ዱማ ዱማ ብርሸይ ደኤስ። 12 ሄ ዎደ ናገይሳታ ካፑዋ አይለይ፥ እብራወ ፓንይ፥ ኑራ ቃሾን ደኤስ። ኑኒ ኑ አሙሁዋ እያዉ ኦድን፥ እ ኑስ ሁጰን ሁጰን አሙሁዋ ብልስ። 13 ያንን፥ ሄ ሀኖት እ ኑስ ብልዳይሳዳ ሀንዶሶና። ሄስ አይበ ጊኮ፥ ታኒ ታ ሹማተኮ ስማስ፥ ሀንኮይ ካቀትስ" ያግስ።

14 ያትን፥ ግብፀ ካዎይ ዮሰፋ ፄግስስ። ኤንቲ እያ ቃሾ ኬፈ ኤለስድ ኤህዶሶና። እ ሜደትድ ባ ማኡዋ ላምድ፥ ካዋኮ ገልስ። 15 ካዎይ ዮሰፋ፥ "ታኒ አሙሆ አሙሀስ፥ ሽን ታዉ እስ አስካ ብላናዉ ዳንዳእቤና። ታኒ፥ ነ አሙሆ ብላናዉ ዳንዳኤይሳ ስአስ" ያግስ።

16 ዮሰፍ፥ "ታኒ ሄሳ ዳንዳእከ፥ ሽን ፆሳይ ካዋስ ሎኦነ ልከ ብርሸ እማና" ያግስ።

17 ካዎይ፥ "ታኒ ታ አሙሆራ ናይለ ሻፋ ጋፃን ኤቅዳሽን፥ 18 ላፑን ኦርደነ ሞ ሚዛት ናይለ ሻፋፐ ከይድ፥ ማታ ሞሶና። 19 ኤንታፈ ካልድ፥ ሀራ ላፑን ግልቃነ ላፍዳ ሚዛት ከይዶሶና። ታኒ ሄሳ መላ ግልቃ ሚዝ ግብፀ ቢታን ኡባካ በአ ኤርከ። 20 ሄ ግልቃነ ላፍዳ ሚዛት ኮይሮ ከይዳ ላፑን ሞ ሚዛታ ምትዶሶና። 21 ሽን ኤንታ ምትዳፐ ጉየ ካሰይሳዳ ግልቅ ኡትዳ ግሾ፥ ኤንቲ ምትዳባ ኦንካ ኤራናዉ ዳንዳእቤና። ሄሳፈ ጉየ ታኒ ባርካስ።

22 "ታኒ ታ አሙሁዋን ቃስ ላፑን ሎኦነ ሙሩታ ሞርኤት እስ ማቃ ቦላ ከይዳይሳታ በአስ። 23 ኤንታፈ ካልድ፥ ሌኦነ ዶሎሀ ባጋ ጫርኩዋን ሹልዳ ሀራ ላፑን ሞርኤት ከይዶሶና። 24 ሄ ሌእዳ ሞርኤት ላፑን ሎኦ ሞርኤታ ምዶሶና። ታኒ ሀ አሙሁዋ ብታንቾታስ ኦዳስ፥ ሽን ታዉ አሙሁዋ ብርሽያ አስ በንትቤና" ያግስ።

25 ሄሳፈ ጉየ ዮሰፍ ግብፀ ካዋኮ፥ "ካዋ አሙሆታ ብርሸይ እስኖ። ፆሳይ ባ ኦና ሀንያባ ካዋስ ቆንጭስስ። 26 ሄ ላፑን ሎኦ ሚዛት ላፑን ላይታ፥ ቃስ ላፑን ሎኦ ሞርኤት ላፑን ላይታ፥ ሀ አሙሆታ ብርሸይ እስኖ። 27 ሄ ላፑን ግልቃነ ላፍዳ ሚዛት ላፑን ላይታ፥ ቃስ ዶሎሀ ባጋ ጫርኩዋን ሹልዳ፥ ሌኦ ላፑን ሞርኤት ላፑን ኮሻ ላይታ።

28 "ታኒ ካዋስ ኦድዳይሳዳካ፥ ፆሳይ ባ ኦና ሀንያባ ካዋ በስስ። 29 ላፑን ዳሮ ካሎ ላይት ግብፀ ቢታ ኡባን ያና። 30 ሽን ሄሳፈ ጉየ፥ ላፑን ኮሻ ላይት ካልድ ያና። ሄ ዎደ ግብፀ ካሎይ ኡባይ ዶገታና፥ ኮሽ ቢታ ጫጫና። 31 ኮሻይ ዳሮ ኢታ ግድያ ግሾ ሄ ቢታ ካሎይ ዶገትድ አታና። 32 ናምኡ ኦግያን ካዋስ ሄ አሙሆይ በንትዳይ ፆሳይ ባ ቆፕዳባ ኦናዉ ቃንፅዳ ግሾሳ። ሄሳ ፆሳይ ማታ ዎደን ኦና።

33 "ሀእ ህዛ፥ ኔኒ ኤራንቾነ ጭንጫ አስ ኮያዳ ግብፀ ቢታን ሹማ። 34 ላፑን ካሎ ላይን ካፅያ ካፈ እቻሹ ኩሽያፐ እሱዋ ሺሻና አሳታ ሹማ። 35 ኤንቲ ያ ካሎ ላይን ካ ሺሽድ፥ ባንታ አዋተን ካታማን ካታማን ምንጅድ ዎና መላ ኪታ። 36 ቢታይ ኮሻን ዮና መላ ሀ ካይ ግብፀ ቢታን ላፑን ላይን ደንዳና ኮሻስ ምንጀትድ ደኦ" ያግስ።

37 ያትን ሄ ኦዳይ ግብፀ ካዋስነ እያ ሞርናታስ ሎኦ ግድድ በንትስ። 38 ሄሳ ግሾ፥ ካዎይ ኤንታኮ፥ "ዮሰፋፐ አያ ሀራ ፆሳ አያናራ ደእያ አስ ደማናዉ ዳንዳኦኮ" ያግስ።

39 ሄሳፈ ጉየ፥ ካዎይ ዮሰፋ፥ "ፆሳይ ሀይሳ ኡባ ነና ኤርስዳ ግሾ፥ ነ መላ ኤራንቾይነ ጭንጫ አስ ኦንካ ባዋ። 40 ታኒ ነና ታ ቢታን ሹማስ። ታ አሳ ኡባይ ነዉ ኪተታና። ታፐ ሀር ኔፐ አያ ኦንካ ባዋ። 41 ሄኮ፥ ታኒ ነና ግብፀ ቢታ ኡባ ቦላ ሹማስ" ያግስ። 42 ሄሳፈ ጉየ፥ ካዎይ ባ ፓራምያ ምግዱዋ ባ ብራያፈ ከስድ፥ ዮሰፋ ብራን አስ። ቦንቾ ማኦነ ቆ ዎርቃ እያ ማይዝስ። 43 ካዎይ ባ ናምአን ፓራ ጋርያ ዮሰፋ ቶግስስ። ቦንቾ ዎታዳረይ፥ "ዝግተ! ዝግተ!" ያግሸ እያፐ ስንራ ሄመቴስ። ሄሳዳ ኦድ፥ ካዎይ እያ ግብፀ ቢታ ኡባ ቦላ ሹምስ።

44 ሄሳፈ ጉየ፥ ካዎይ ዮሰፋ፥ "ታኒ ካዎ ግድኮካ ነ ኪቶና ኦንካ ግብፀ ቢታ ኡባን ባ ኩሽያ ዎይኮ ባ ቶሁዋ ቃፆፎ" ያግስ። 45 ካዎይ ዮሰፋ፥ "ፃፍናት-ፓእና" ግድ ሱንስ። እ እያዉ ኦና ካታማ ካህንያ ጶፅፋራ ናእዉ አስናቶ ማቾ እሚስ። ያንን፥ ዮሰፍ ግብፀ ቢታ ኡባ ቦላ ማታ ኤክስ።

46 ዮሰፍ ግብፀ ካዋስ ኦሶ ኦይክያ ዎደ፥ እያዉ ላይ ሀስታማ። ዮሰፍ ካዋ ስንፈ ከይድ፥ ግብፀ ቢታ ኡባ ግዶን ሄመትስ። 47 ሄ ላፑን ካሎ ላይን ቢታን ዳሮ ካ ካፅስ። 48 ዮሰፍ ግብፀ ቢታን ሄ ላፑን ካሎ ላይ ካ ኡባ ሺሽድ፥ ካታማታን ምንጅስ። እስ እስ ካታማ ዩሹዋን ደእያ ጋድያፐ ካ ኡባ ሄ ካታማታን ሺሽስ። 49 ዮሰፍ አባ ሻፍያ መላ ዳሮ ካ ሺሽስ። ካ ዳሮተፈ ደንዶይሳን ማካናዉ ዳንዳኤትቦና ግሾ፥ ማክ ማክ ቆለይሳ አጋግስ።

50 ኮሻ ላይ ያናፐ ስን፥ ኦና ካታማ ካህነ ጶፅፋራ ናኤ አስናትፐ ዮሰፍ ናምኡ አደ ናይታ የልስ። 51 ዮሰፍ ባ ባይራ ናኣ ሱን፥ "ፆሳይ ታና ታ መቱዋነ ታ አዋ ሶ አሳ ኡባ ዶግስስ" ግድ ምናሰ*41:51 ምናሰ፦ እብራወ ዶናን ሀ ሱን ብርሸይ "ዶግሴስ" ጉሱ። ግድ ሱንስ። 52 ናምአን ናኣ ሱንካ፥ "ፆሳይ ታ መቶትዳ ቢታን ታዉ ናአ እሚስ" ግድ ኤፍሬማ*41:52 ኤፍሬማ፦ እብራወ ዶናን ሀ ሱን ብርሸይ "ናአ እሜስ" ጉሱ። ግድ ሱንስ።

53 ግብፀ ቢታን ደእያ ሄ ላፑን ካሎ ላይት አዶሶና። 54 ዮሰፍ ኦድዳይሳዳ ላፑን ኮሻ ላይት ካል ይዶሶና። ሀራ ቢታ ኡባን ኮሽ ከይስ፥ ሽን ግብፀ ቢታ ኡባን ካይ ደኤስ። 55 ግብፀ ቢታይ ኡባይ ኮሻትዳ ዎደ፥ አሳይ ካስ ካዋኮ ዋስዶሶና። ካዎይ ግብፀ አሳ ኡባ፥ "ዮሰፋኮ ብድ፥ እ ኦደይሳ ኦተ" ያግድ ኪትስ።

56 ኮሻይ ግብፀ ቢታ ኡባ ጋክዳ ዎደ፥ ዮሰፍ ካ ምንጅዳ ሻለታ ኡባ ዶይድ፥ ካ ግብፀ አሳስ ባይዝስ። 57 ቢታ ኡባን ኮሽ ሱልዳ ግሾ፥ ሳአን ደእያ አሳ ኡባይ ካ ዮሰፋፐ ሻማናዉ ግብፀ ይዶሶና።