1 አሳይ ሳአ ቦላ ዳርዳ ዎደ ኤንታዉ ማጫ ናይት የለትዶሶና። 2 "ፆሳ ናይታ" ጌተትያ መተት ሄ ማጫ ናይት ማላ ሎኦ ግደይሳ በእድ ኤንታፈ ባንታዉ ዶርዳይሳታ ማችዶሶና። 3 ጎዳይ፥ "አሳስ ደኦ እምያ ታ አያናይ አሳን መርናዉ ዴና። አስ ሀይቀይሳ ግድያ ግሾ፥ ህዛፐ እያ ላይይ እስ ፄታነ ላታማ ግዳና" ያግስ። 4 ሄ ዎደነ ሄሳፈ ጉየ፥ ፆሳ ናይት አሳ ማጫ ናይታ ኤክን፥ ናይት የለትዳ ዎደ፥ ዎጋ አዱሳ አሳት ሳአ ቦላ ደእዶሶና። ኤንቲ በን ዎደ ኦላስ ምኖነ ኤረትዳ አሳታ።

5 ጎዳይ ሄ ዎደ ሳአ ቦላ ደእያ አሳ ኢታተ ዳርዳይሳነ ኤንታ ዎዛናይ ኡባ ዎደ ቆፕያባይ ኢታ ፃላላ ግድዳይሳ 6 በእድ፥ አሰ ሀ ሳአ ቦላ መዳይሳን አዛንስ፤ ባ ዎዛናን ዳሮ ቂሮትስ። 7 ታኒ አሰ አይስ መድና ጋዳ ቂሮታስ። ሄሳ ግሾ፥ ጎዳይ፥ "ታኒ መዳ አሰ፥ መሄ፥ ዶአ፥ ሳአራ ጎሸትያ መተታነ ሳሎ ካፎታ ሳአ ቦላፈ ይሳና" ያግስ። 8 ሽን ኖሄይ ጎዳ ስንን ሳባ ደምስ።

9 ኖሄ ታርከይ ሀይሳፈ ካልድ ፃፈትዳይሳ። ኖሄይ ባ ዎደ ደእያ አሳ ግዶፈ ፆሳ ኡፋይስያነ ሱረ አስ። 10 ኖሄይ ሴማ፥ ካማነ ያፈታ ጌተትያ ሄ አደ ናይታ የልስ።

11 ሄ ዎደ ቢታይ ኩመ ፆሳ ስንን ቱንስ፤ ቢታ ኡባይ ጌላተን ኩምስ። 12 ፆሳይ ሀ ቢታ ፄልያ ዎደ ሳአን ደእያ አሳ ኡባይ ባንታ ኦግያ ቱንስድ ደኤይሳ በእስ።

13 ሄሳ ግሾ፥ ፆሳይ ኖሄ ሀይሳዳ ያግድ ኪትስ፤ "ታኒ አሳ ኡባ ይሳና ሀናይስ። ኤንታ ጋሶን ቢታይ ጌላተን ኩምዳ ግሾ፥ አሰ ቢታፈ ይሳና። 14 ሄሳ ግሾ፥ ምኖ ምፈ ነዉ ማርካበ ኬፃ። ሄ ማርካብያ ግዶን ዳሮ ቆልአታ ከሳ። ያታዳ ሶራነ ካረራ ማደ መላባን ሜሻ። ኖሄ ማርካበያ 15 ማርካብያ ሀይሳዳ ያታዳ ኬፃ፤ አዱሳተ 300 ዋ፥ ጎምፓ 50 ዋ፥ ጌሳ 30 ዋ ኦ። 16 ማርካብያስ ካራ መ፤ ካራፐነ ጎዳፐ ግዶን እስ ዋ ግድያ በሲ ዶያ አጋ። ፐንግያ ማርካብያስ ምየ ባጋራ ከሳ፤ ማርካብያ ሄ ፖቀ ከሳዳ ኬፃ።

17 "ታኒ ሳሎፐ ጋርሳን ሸምፖራ ደእያ መተ ኡባ ይሳናዉ ዮ ሃ የዳዳ ሀ ሳኣ ቦላ ደእያባ ኡባ ይሳና። 18 ሽን ታኒ ታ ጫቁዋ ኔራ ጫቃና። ኔኒ፥ ነ ማችዉ፥ ነ አደ ናይታነ ኤንታ ማቸታ ኤካዳ ማርካብያ ግዶ ገላ። 19 ኤንቲ ኔራ ደኦን ዳና መላ፥ ደኦይ ደእያ መተ ኡባፈ ቆሞን ቆሞን አደነ ማጫ ናምአ ናምአ ኦዳ፥ ማርካብያ ግዶ ገልሳ። 20 ዱማ ዱማ ቆሞ ካፎታፐ፥ ዱማ ዱማ ቆሞ መሄታፐነ ሳአራ ጎሸትያ ዱማ ዱማ ቆሞ መተ ኡባፈ ናምአ ናምአ ግድድ ደኦን ዳና መላ ኔኮ ዮ። 21 ቃስ ህንተነ ዶአት ማናዉ ዱማ ዱማ ቆሞ ምያ ካ ኤፋዳ፥ ማርካብያ ግዶን ቆላ" ያግስ።

22 ኖሄይ ኡባባካ ፆሳይ ኪትዳይሳዳ ኦስ።