ናአይ ኪታንቾታፐ ቦላ
1 ካሰ ፆሳይ፥ ኑ አዋታስ ናበታ ባጋራ ዱማ ዱማ ኦገን ዳሮ ዎደ ኦድስ። 2 ሽን ሀ ዉርሰ ዎድያን ኡባ እያ ላትስዳ ቃስ አላመ እያ ባጋራ መዳ ባ ናኣ ባጋራ ኑስ ኦድስ። 3 ናአይ ፆሳ ቦንቹዋ ጶለነ ኩመ ፆሳ ፆሳተ ኤክድ፥ ባ ዎልቃማ ቃላን ሀ አላምያ ካትስድ ኦይክስ። አሳ ኤንታ ናጋራፐ ጌሽዳፐ ጉየ ኡባፈ ቦላ ፆሳ ኡሻቻ ባጋን ሳሉዋን ኡትስ።
4 እያዉ እመትዳ ሱንይ ኪታንቾታ ሱንፈ ቦላ ግደይሳዳ እ ኤንታፈ ቦላ። 5 ህዛ፥ ፆሳይ ኪታንቾታፐ ኦደኮ፥
"ኔኒ ታ ናአ፤
ታ ሀች ነዉ አዋ ግዳስ" ግዴ?
ዎይኮ ቃስ ኦደኮ፥
"ታኒ እያዉ አዋ ግዳና፤
እካ ታዉ ናአ ግዳና" ግዴ?1:5 ማዝ 2:7፤ 2 ሳሜ 7:14፤ 1 ታር 17:13.
6 ቃስ ፆሳይ ባ ባይራ ናኣ ሀ አላምያ ኪትሸ፥
"ፆሳ ኪታንቾት ኡባይ እያዉ ጎይኖ"
ያግስ።1:6 ዛረ 32:43. 7 ፆሳይ ኪታንቾታባ ኦድሸ፥
"ፆሳይ ባ ኪታንቾታ ጫርኮ፥
ባ አይለታ ታማ ላጮ ኦስ"
ያጌስ።1:7 ማዝ 104:4. 8 ሽን ባ ናአባ ኦድሸ፥
"ፆሳዉ፥ ነ አራታይ መርናዉ ደኤስ።
ነ ካዎተ ነ ፅሎተን አይሳሳ።1:8 ማዝ 45:6-7.
9 ኔኒ ፅሎተ ዶሳዳሳ፤ ኢታ እፃዳሳ።
ፆሳይ፥ ነ ጎዳይ፥ ነና ነ ላገታፐ አድ ዶርስ፥
ኡፋይሳ ዛይተ1:9 ኡፋይሳ ዛይተ፦ እ ካዎትያ ዎደ አሳይ ኡፋይሳን እልልድ እያ ካዎይሳ በሴስ። ነና ትይስ"
ያጌስ። 10 ፆሳይ ዛሪድ፥
"ጎዳዉ፥ ኮይሮ ኔኒ ሳአ መዳሳ፤
ሳሎት ነ ኩሸ ኦሶ።1:10 ማዝ 102:25-27.
11 ሄሳት ኡባይ ያና፤
ሽን ኔኒ ዳና።
ኤንቲ ኡባይ አፍላዳ ዉራና።
12 ኔኒ ኤንታ ሳሌናዳ ፃፃና፤
ቃስ ኤንቲ አፍላዳ ላመታና።
ሽን ኔኒ ኡባ ዎደ ነና፤
ነ ላይይካ ዉረና"
ያጌስ። 13 ሽን ፆሳይ ኪታንቾታፐ ኦደኮ፥
"ታኒ ነ ሞርከታ ነ ቶሆይ
የያሶ ኦና ጋካናዉ፥
ሀይሳን ታፐ ኡሻቻ ባጋን ኡታ" ግዴ?1:13 ማዝ 110:1.
14 ኪታንቾት ኡባይ አቶተ ደማናዉ ደእያ አሳታ ማዳናዉ ፆሳይ ኪትዳ አያናታ ግዶኮናዬ?