1 እስ እስ ካህነ ሀላቅ አሳ ግዶፈ ዶረትድ፥ ፆሳራ ጋያባን አሳ ግሾ እሞታነ ናጋራ ያርሾ ያርሻናዉ ሹመቴስ። 2 እ ባ ሁጰን ዳቡራንቾ ግድያ ግሾ፥ ኤሮናይሳታስነ ባለይሳታስ ቃታናዉ ዳንዳኤስ። 3 እ ባ ናጋራ ግሾነ አሳ ኡባ ናጋራ ግሾ ያርሾ ያርሻናዉ በሰይ ሄሳሳ።5:3 ሌወ 9:7.
4 ኦንካ ሀ ቦንቹዋ ባዉ ኤካናዉ ዳንዳኤና፥ ሽን አሮን ካህነ ሀላቃ ግዳናዉ ፄግዳይሳዳ ፆሳን ፄገታናዉ በሴስ።5:4 ከሳ 28:1. 5 ሄሳዳካ፥ ክርስቶስ ካህነ ሀላቃ ግድያ ቦንቹዋ ባዉ ኤክቤና። ሽን ፆሳይ እያ፥
"ኔኒ ታ ናአ፤
ሀች ታ ነዉ አዋ ግዳስ"
ያጌስ።5:5 ማዝ 2:7. 6 ቃስ ሀራሶን፥
"ማልከፃደቅ ካህነ ግድዳይሳዳ፥
ኔኒ መርናዉ ካህነ ግዳና"
ያጌስ።5:6 ማዝ 110:4.
7 የሱሲ አሰ ግድድ ሀ አላምያን ደእያ ዎደ ባና ሀይቆፐ አሻናዉ ዳንዳእያ ፆሳ ዳሮ ዬሆንነ አፉን ዎስስ። እ፥ እያ ቦንችድ ኪተትዳ ግሾ ፆሳይ እያ ዎሳ ስእስ።5:7 ማቶ 26:36-46፤ ማር 14:32-42፤ ሉቃ 22:39-46. 8 የሱሲ ፆሳ ናአ ግድኮካ ባ ዋየትዳ ዋያን ኪተተ ታማርስ። 9 ሄሳንካ፥ የሱሲ ባ ኦሱዋ ፖልዳፐ ጉየ ባዉ ኪተትያ ኡባይ መርና አቶተ ደማና መላ ጋሶ ግድስ። 10 ፆሳይ ማልከፃደቃ ሹምዳይሳዳ ካህነ ሀላቃ ኦድ እያ ሹምስ።
ህንተ አማኑዋን ዳቡሮፕተ
11 ሀ ኑ ኦዳ ቦላ ጉጅ ኦዳናባይ ዳሮባይ ደኤስ፥ ሽን ህንተ አኬካይ ጉ ግድያ ግሾ ህንተዉ ኦድ ገልሳናዉ ዋይሴስ። 12 ህንተ ሀኖደ አስታማረ ግዳናዉ በሴስ፥ ሽን ፆሳ ቃላ ኮይሮ ትምርትያ ህንተና ዛር ታማርስያ ሀራ አስ ኮሼስ። ህንተ ምኖ ካ ማናዉ ዳንዳኦና ግሾ ማ ኮሼስ።5:12 2 ቆሮ 3:2. 13 ማ ፓሄትያ ኦንካ ዮጋ ናአ ግድያ ግሾ፥ ሎኦነ ኢታ ሻክ ኤረና። 14 ሽን ምኖ ካ ሎኦነ ኢታ ሻክ ኤርያ ካሃማ አሳሳ።