እብራወ ኪታ 6

1 ህዛ፥ ክርስቶሳባ ታማርስያ ኮይሮ ትምርትያ አግድ ክርስቶሳን ካሃማተኮ ቦስ። ሀይቆ ኦሶፐ ስሞባነ ፆሳ አማኖባ ኮይሮ ትምርትያኮ ጉየ ስሞኮ። 2 ሄሳዳካ፥ ፅንቃተታባ፥*6:2 ፅንቃተታባ፦ ሀ በሳን ፅንቃተታባ ጌተትዳይ ዱማ ዱማ ጌሾ ዎጋታባ ኦዳናሳ። ኩሸ ዎሶባ፥ ሀይቆፐ ደንዶባነ መርና ፕርዳባ ዛር ታማሮኮ። 3 ፆሳይ ጊኮ ኑ ሄሳ ኦና።

4 እስ ቶሆ ፖኦይ ፖእዳይሳታ፥ ሳሎ እሞታ ኤክዳይሳታ፥ ጌሻ አያናን ሻከትዳይሳታ፥ 5 ሎኦ ፆሳ ቃላነ ስንፈ ያና አላምያ ዎልቃ በእዳይሳታ፥ 6 ጉየፐ ካድዳይሳታ ናጋራፐ ናምአን ዛራናዉ ዳንዳኤተና። አይስ ጊኮ፥ ኤንቲ ባንታ ዩዋስ ፆሳ ናኣ ዛር ካቅያ መላ ማስቃልያ ቦላ እያ ካቆሶናነ አሳ ስንን ካዉሾሶና።

7 ኡባ ዎደ እ ቦላ ቡክያ እራ ኡያዳ፥ ጎይዳ ኡራ ማድያ ካ እምያ ቢትያ ፆሳን አንጀትዳሮ። 8 ሽን አጉንነ ክንቾተ ዶልያ ቢትያ አይብባካ ማዱኩ፤ እዉ ባደይ ማታትስ፤ ዉርሰን ፁገታና።✝6:8 መ 3:17-18.

9 ኑ ሲቆ እሻቶ፥ ኑኒ ሀይሳዳ ኦድያባ ግድኮካ፥ ህንተና አቶተኮ ካለያ ሎኦባይ ህንተዉ ደኤይሳ ኤሮስ። 10 ፆሳይ ሱረ ፕርደይሳ። ፆሳይ፥ ህንተ ኦዳ ኦሱዋነ ካሰ ግድን ሀእካ አማነይሳታ ማድድ፥ እያዉ ደእያ ሲቁዋ በስዳይሳ ዶገና። 11 ህንተ ኡባይ ኡፋይሳን ናገይሳ ደማና ጋካናዉ ሀ ምኖተ ዉርሰ ጋካናዉ በሳና መላ ኑ አሞቶስ። 12 ህንተ አማኖንነ ዳንዳአን ናግያ ኡፋይሳ ላትያ አሳ ዳናና መላፐ አትሽን፥ አዛላ ግዳና መላ ኮዮኮ።

ፆሳ ኡፋይሳ ቃላይ ስሰና

13 ፆሳይ አብራሃመስ እማና ግድ ጫቅዳ ዎደ ባፐ አያ ሀር ግት ባይና ግሾ ባ ሁጰን ጫቅስ። 14 እያኮ፥ "ታኒ ነና አንጃና፤ ነ ዘረካ ዳርሳና" ያግስ።✝6:14 መ 22:16-17. 15 አብራሃመይ ዳንዳአን ናግድ ፆሳይ እማና ግዳ ኡፋይሳ ኤክስ።

16 አስ ጫቅሸ ባፐ ግታትያ ኡራን ጫቄስ፤ ሄ ጫቆይ ጌተትዳባ ምንድ፥ ፓላማ ኡባ ተቄስ። 17 ሄሳ ግሾ፥ ፆሳይ ባ ላመቶና ቆፋ ኡፋይሳ ቃላ ላተይሳታስ ቆንጭሳናዉ ኮይዳ ግሾ ጫቆን ምንስ። 18 ፆሳይ ዎርዶተና። እያ ኡፋይሳ ቃላይነ ጫቆይ፥ ናምአይካ ላመቶኮና። ሀ ናምኡባታን ኑ ስንን ደእያ ኡፋይሳ ኦይካናዉ ዳንዳአና መላ ገሸ ደማናዉ እያኮ ባቃትዳ ኑኒ፥ ዎልቃማ ምን ደማና።

19 ሀ ኡፋይሳይ ኑ ሸምፑዋ፥ ማርካበይ ቃፆናዳ ምን ኦይክያ ብራታ መላ። ሄ ኡፋይሳይ ማጋራጁዋፈ ጉየ ባጋን ደእያ ጌሻ በሳ ገልስ።✝6:19 ሌወ 16:2. 20 የሱሲ ማልከፃደቃ ሹማተዳ መርናዉ ካህነ ሀላቃ ግድድ፥ ኑ ግሾ ኑፐ ስንትድ ሄ በሳ ገልስ።✝6:20 ማዝ 110:4.