1 ሙሰ ህገይ ያናዉ ደእያ ሎኦባታስ ኩያፐ አትሽን፥ ባ ሁጰን ዋና ግደና። ሄሳ ግሾ፥ ላይን ላይን ፓጨይ ባይና ያርሸትያ ያርሾይ ጎይናናዉ ሺቅያ አሳ ፖሎ ኦናዉ ዳንዳኤና። 2 ህገይ ኤንታ ፖሎ ኦናዉ ዳንዳእዳባ ግድያኮ ኤንቲ ያርሾ ያርሸይሳ አጋናሽን። ቃስ ጎይናናዉ ሺቅያ አሳይ ባንታ ናጋራፐ ጌያና፤ ኤንታ ካሀይካ ኤንታና ባላ ግድ ሞተና። 3 ሽን ሄ ያርሾት ላይን ላይን ናጋራ ቆፍሶሶና። 4 አይስ ጊኮ፥ ኮርማ ሱነ ዴሻ ሱ ናጋራ ድጋናዉ ዳንዳኤና።
5 ሄሳ ግሾ፥ ክርስቶስ ሀ አላምያ ይዳ ዎደ ሀይሳዳ ያግስ:10:5 ማዝ 40:6-8.
"ኔኒ ያርሾነ እሞ ኮያባካ፤
ሽን ታዉ አሾ ጊግሳዳሳ።
6 ኔኒ ፁሳ ያርሾንነ
ናጋራ ያርሾን ኡፋይታባካ።
7 ሄ ዎደ፥ ‘ታ ግሾ ማፃፋን ፃፈትዳይሳዳ፥
ጎዳዉ፥ ታኒ ነ ሸንያ ኦናዉ ያስ’ ያጋስ"
ያግስ። 8 ያርሾይ ያርሸታና መላ ህገይ ኪትያባ ግድኮካ፥ ክርስቶስ ኮይሮ፥ "ኔኒ ያርሾነ እሞ፥ ፁሳ ያርሾነ ናጋራ ያርሾ ኮያባካ፤ ኤንታን ኡፋይታባካ" ያግስ። 9 ካልድካ እ፥ "ጎዳዉ፥ ሄኮ ታኒ ነ ሸንያ ኦናዉ ያስ" ያግስ። ሄሳ ግሾ፥ ክርስቶስ ናምአንዋ ኤሳናዉ ኮይሮይሳ ሻርስ። 10 የሱስ ክርስቶሲ ፆሳ ሸንያ ኦድ፥ ዛረና ኦገን እስ ቶሆ ባ አሹዋ ያርሽዳ ግሾ ኑኒ ጌይዳ።
11 ካህነ ኡባይ፥ ናጋራ ድጋናዉ ዳንዳኦና ሄ ያርሾታ ጋላስ ጋላስ ያርሽሸ ኤቅድ ባ ኦሱዋ ኦስ።10:11 ከሳ 29:38. 12 ሽን ክርስቶስ ኡባ ዎደስ ግድያ እስ ናጋራ ያርሹዋ ያርሽድ፥ ፆሳፈ ኡሻቻ ባጋን ኡትስ።10:12 ማዝ 110:1. 13 ሄ ዎድያፐ ዶምድ እያ ሞርከት እያ ቶሆይ የያባ ኦና ጋካናዉ ናጌስ። 14 እ ዛረና ኦገን እስ ቶሆ ባና ያርሽዳ ያርሹዋን ጌሻታ መርናዉ ፖሎ ኦስ።
15 ቃስ ጌሻ አያናይ ኑስ ሀይሳ ማርካቴስ። ኮይሮ ሀይሳዳ ያግስ፦
16 "ሄ ጋላሳታፐ ጉየ፥
ታኒ ኤንታራ ጫቅያ ጫቆይ ሀይሳ፦
ታኒ ታ ህግያ ኤንታ ቆፋን ዎና፤
ኤንታ ዎዛናን ፃፋና"
ያጌስ።10:16 ኤርም 31:33. 17 ካልድካ፥
"ታኒ ኤንታ ናጋራነ
ኤንታ ኢታ ኦሱዋ ዛራ ቆፕከ"
ያጌስ።10:17 ኤርም 31:34. 18 ህዛ፥ ናጋር አቶ ጌተትዳፐ ጉየ ናጋራስ ያርሸትያ ያርሾ ኮሸና።
አነ ፆሳኮ ሺቆስ
19 ህዛ፥ ታ እሻቶ፥ ኑኒ የሱሳ ሱ ባጋራ ኡባፈ ጌሻ በሳ ገላናዉ ኑስ ምኖተ ደኤስ። 20 ኑ ገላናይ ክርስቶስ ባ ማጋራጁዋ፥ ሄስካ ባ አሹዋ ባጋራ ኑስ ዶይዳ ኦራነ ደኦ ግድዳ ኦግያና። 21 ኑስ ፆሳ ኬ ቦላ ሹመትዳ ግታ ካህነ ሀላቃይ ደኤስ። 22 ኑኒ ኢታ ካሀፐ ጌያናዉ ኑ ዎዛና ዉርፀትድ፥ ኑ አሳተ ፅሎ ሃን ሜጨትድ፥ ሱረ ዎዛናንነ ፖሎ አማኖን ፆሳኮ ሺቆስ።10:22 ሌወ 8:30፤ ህዝ 36:25.
23 ኑስ ኡፋይሳ ቃላ እምዳ ፆሳይ አማነትዳይሳ ግድያ ግሾ ኑ ማርካትያ ኡፋይሳ ኡሻች ሀድርስ ጎና ምንድ ኦይኮስ። 24 እሶይ እሱዋ ሲቆስነ ሎኦ ኦሶስ ዋት ደንነኮ አነ ቆፖስ። 25 እሶት እሶት ሜዘ ኦድ ሺቀይሳ አግዳይሳዳ ኑኒ እስፈ ሺቀይሳ አጎኮ። ሽን ጎዳ ጋላሳይ ማታትዳይሳ ህንተ በእያ ግሾ ሄሳ ካሰይሳፈ አድ ኦተ።
26 ኑኒ ቱማ ኤራተ ኤክዳፐ ጉየ ኤርሸ ናጋራ ኦኮ፥ ህዛፐ ኑ ናጋራ ግሾ ያርሸታና ያርሾይ ባዋ። 27 ሽን ህዛ አትዳይ ያሽያ ፕርዳነ ፆሳ ሞርከታ ፁጋናዉ ጊግዳ ዎልቃማ ታማ።10:27 እሳ 26:11. 28 ሙሰ ህግያ ኪተቶና እፅዳ ኦንካ ናምኡ ዎይኮ ሄ አስ እያ ቦላ ማርካትኮ ቃይ ባይናሽን ሀይቄስ።10:28 ዛረ 17:6፤ 19:15. 29 ያትን፥ ፆሳ ናኣ ካዳ ኡራይ፥ ባና ጌሽዳ ፆሳ ጫቆ ሱ ቱናባዳ ቆፕዳ ኡራይ፥ ቃስ አ ኬሀተ አያና ጫይዳ ኡራይ፥ አይ መላ ኢታ ፕርዳ ኤካናዉ በሲያኮ አነ ቆፕተ።
30 ህዛ፥ "ሀሎ ከሶይ ታባ፥ ታ ኩሸ ዛራና" ግዳይሳ ኑ ኤሮስ። ቃስካ፥ "ጎዳይ ባ አሳ ፕርዳና" ያግስ። 31 ደኦ ፆሳ ኩሸን ኩንደ ዳሮ ያሼስ።
32 ህንተዉ ፆሳ ፖኦይ ፖእዳፐ ጉየ ህንተ ዳሮ ዋየን፥ ግታ ባፀን ገንጭዳ በን ዎድያ ቆፕተ። 33 እስ እስ ቶሆ ህንተ አሳ ስንን ጫየትደታ፤ ጎደትደታ፤ እስ እስ ቶሆ ሄሳ መላ ዋየይ ጋክዳ አሳራ እስፈ ዋይደታ። 34 ቃሾን ደእያ አሳስካ ቃትደታ። ህንተዉ ሎኦነ ዮና ሻሎይ ሳሎን ደኤይሳ ህንተ ኤርዳ ግሾ ህንተ ሻሎይ ቦንቀትያ ዎደ ኡፋይሳን ዳንዳእደታ።
35 ሄሳ ግሾ፥ ግታ ዎይቶይ ደእያ ህንተ ምኖተ የጎፍተ። 36 ፆሳ ሸንያ ፖልድ፥ እ ህንተዉ እማና ግዳ ኡፋይሳ ኤካና ጋካናዉ ገንጫናዉ ኮሼስ። 37 ህዛ፥ ጌሻ ማፃፋን፥
"እ፥ ያና ግዳይስ ያና፤ ጋምኤና።10:37 እብራ 2:3-4.
38 ሽን ታ ፅሎይ፥ ታናን አማነትድ ዳና፤
ኦንካ ጉየ ስምኮ ታና ኡፋይሰና"
ያጌስ። 39 ኑኒ አማንድ አትያ አሳ ባጋፈ አትሽን፥ ጉየ ስሚድ ይያ አሳ ባጋ ግዶኮ።