1 ህዛ፥ ፆሳይ ኑና ባ ሸምፖ በሳ ገልሳና ግዳ ቃላይ ቡሮ ስንፈ ደእያ ግሾ፥ ህንተፈ ኦንካ ሄ ሸምፖ በሳ ገሎና አቶና መላ ናገቶስ። 2 ኤንታዉ ዎንገላይ ሳባከትዳይሳዳ፥ ኑስካ ሳባከትስ። ሽን ኤንቲ ስእዳባ አማንድ ኤክቦና ግሾ ኤንታ ጎእቤና። 3 ግዶሽን፥ አላመይ መቶሳፐ ዶምድ ፆሳ ኦሶይ ፖለትዳይሳ ግድኮካ፥ ፆሳይ፥
"ታኒ ታ ሀንቁዋን ጫቃዳ፥
ታ ሸምፖ በሳ ኡባካ ገሎኮና"
ግዳይሳዳ፥ ኑኒ አማንዳይሳት እያ ሸምፖ በሳ ገላና።4:3 ማዝ 95:11. 4 ላፑን ጋላሳባ እስ በሳን፥ "ፆሳይ ላፑን ጋላሳን ባ ኦሶ ኡባፈ ሸምፕስ" ያግስ።4:4 መ 2:2. 5 ቃስካ ሄ በሳን፥ "ኤንቲ ታ ሸምፖ በሳ ኡባራካ ገሎኮና" ያግስ።4:5 ማዝ 95:11. 6 ኮይሮ ዎንገላ ስእዳይሳት ኪተቶና እፅድ ሸምፖ በሳ ገልቦኮና። ያንያ ግሾ፥ ሀእካ ሄ ሸምፖ በሳ ገላና እስ እስ አሳት ደኦሶና። 7 ሄሳ ግሾ፥ ፆሳይ፥ "ሀች" ግድ ፄግሸ እስ ጋላስ ኑስ ቃንፅስ። ዳሮ ዎደፐ ጉየ ፆሳይ ዳዊታ ባጋራ፥
"ፆሳይ ግያባ ሀች ህንተ ስእያ ዎደ፥
ህንተ ዎዛና ምንፍተ"
ያግድ ኦድስ።4:7 ማዝ 95:7-8. 8 እያሱይ ኤንታዉ ሸምፑዋ እምዳባ ግድያኮ፥ ፆሳይ ሀራ ጋላሳባ ጉየፐ ኦደናሽን።4:8 ዛረ 31:7፤ እያ 22:4. 9 ህዛ፥ ፆሳ አሳስ ሳምባታ ሸምፖይ ናገትድ ደኤስ። 10 ፆሳ ሸምፖ በሳ ገልያ ኦንካ፥ ፆሳይ ባ ኦሱዋፐ ሸምፕዳይሳዳ እካ ባ ኦሱዋፐ ሸምፓና።4:10 መ 2:2. 11 ሄሳ ግሾ፥ ኦንካ ሄ አሳ ኪተተ እፁዋ ካልድ፥ ኩንዶናዳ ፆሳ ሸምፖ በሳ ገላናዉ ምኖስ።
12 ፆሳ ቃላይ ደኦነ ኦይሳ። ናምኡ ባጋራ ቃራትዳ ማሻፈካ አድ ኦጮ። እ ሸምፖ፥ አያና፥ ፃጶነ ኮልዘ ጋካናዉ ካንድ ጫዴስ። ቃስ አሳ ዎዛናን ደእያ ጌምዳ ቆፋነ አሙዋ ሻክድ ፕርዴስ። 13 ፆሳ ስንፈ ቆሰትያባይ አይባ መተካ ባዋ። እያ አይፈ ስንን ኡባባይ ቆንጨነ ካሎ ደኤስ። ኑኒ ዛሮ እማናዉ በሰይ እያ ስንና።
የሱሲ ግታ ካህነ ሀላቃ
14 ህዛ፥ ሳሎ ከይዳ ግታ ካህነ ሀላቃይ፥ ፆሳ ናአይ የሱሲ፥ ኑስ ደእያ ግሾ፥ ኑ አማኑዋ ምንድ ናጎስ። 15 ኑ ካህነ ሀላቃይ ኑ ዳቡርያ ዎደ ኑስ ቃታናዉ ዳንዳኤይሳ። እ ኑዳ ኡባባን ፓጨትስፐ አትሽን፥ ናጋራ ኦቤና። 16 ህዛ፥ ማሮተ ኤካናዉነ ማደ ኮሽያ ዎደ አ ኬሀተ ደማናዉ አ ኬሀተይ ደእያሱዋ ፆሳ አራታኮ ያዮና ሺቆስ።