1 ጎዳ አይለይ ሙሰይ ሀይቅዳፐ ጉየ፥ ጎዳይ ሙሰ ማድያ ናወ ናኣ እያሱ፥ ሀይሳዳ ያግስ፤ 2 "ታ አይለይ፥ ሙሰይ ሀይቅስ። ሄሳ ግሾ፥ ኔራነ ሀ አሳ ኡባይ ደንድድ፥ ታኒ እስራኤለ አሳስ እማናዉ ደእያ ቢታ ገላናዉ፥ ዮርዳኖሰ ሻፋ ፕንተ። 3 ታኒ ሙሰስ ኦድዳይሳዳ፥ ህንተ ቶሆይ የያሶ ኡባ ህንተዉ እማስ። 4 ህንተ ዛዋይ ዱገሀ ነገበ መላ ቢታፈ ደንድድ፥ ፑደሀን ደእያ ልባኖሰ ዙማ ጋካናሳ። ቃስ ዶሎሃ ባጋን ደእያ ኤፍራፂሳ ዎጋ ሻፋፐ ደንድድ፥ ህተታ ቢታ ኡባ ኤክድ ዉሎሀ ባጋን ደእያ መደትራነ አባ ጋካናሳ። 5 እያሱ፥ ነ ላይ ኡባን ኦንካ ኔራ ኤቀታናዉ ዳንዳኤና። ታኒ ሙሰራ ግድዳይሳዳ፥ ኔራካ ግዳና። ታኒ ነና የግከ፤ አግከ። 6 አይኮይ ባዋ ምና። ታኒ ኤንታ ማይዛታስ እማና ጋዳ ጫቅዳ ቢታ ኔን ሀ አሳ ላትሳና። 7 አይኮይ ባዋ ምና። ታ አይለይ ሙሰይ ነዉ እምዳ ህግያ ኡባ ምንዳ ናጋ። ኔን ብያ በሳ ኡባን ነዉ እንጀታና መላ እያፐ ኡሻች ዎይኮ ሀድርስ ጎፓ። 8 ሀ ህገ ማፃፋይ ነ ዶናፐ ሻከቶፎ። እያን ፃፈትዳባ ኡባ ምንዳ ናጋናዉ ጋላስነ ቃማ እያ ቆፓ። ሄሳ ነ ኦኮ፥ ነዉ ኡባባይ እንጀታናነ ፖለታና። 9 ነ ብያ በሳ ኡባን ታኒ ጎዳይ ነ ፆሳይ ኔራ ደእያ ግሾ፥ ባቦፋ፤ ህርጎፋ፤ ያጋዳ ነዉ ኦዳይስ" ያግስ።

10 ሄሳፈ ጉየ፥ እያሱይ ደርያ ሀላቃታ ሀይሳዳ ያግስ፤ 11 "አሳይ ዱንካንድ ደእያ ጉታ ብድ፥ ሄ ጋላሳ ጋርሳን፥ ‘ጎዳይ፥ ህንተ ፆሳይ፥ ህንተዉ እምያ ቢታ ላታናዉ ዮርዳኖሰ ሻፋ ፕንያ ግሾ፥ ህንተዉ ሽንቀ ጊግስተ’ ያግድ ደርያስ ኦድተ" ያግስ።

12 እያሱይ፥ ሮቤላነ ጋዳ ኮቻታ ቃስ ምናሰ ኮቻታፐ ባጋ ሀይሳዳ ያግስ፤ 13 "ጎዳይ፥ ህንተ ፆሳይ፥ ህንተና ሸምፕሳና፥ ሀ ቢታ ህንተዉ እማና ያግድ፥ ጎዳ አይለይ ሙሰይ ኦድዳይሳ ቆፕተ። 14 ህንተ ማቸት፥ ህንተ ናይትነ ህንተ መሄይ ዮርዳኖሰ ሻፋፐ ሀፍንን ሙሰይ ህንተዉ እምዳ ቢታን ደእሾና። ሽን ህንተ ኦላንቾት ባንታ ኦላ ሚሽያ ኦይክድ፥ ህንተ አሳፐ ስንትድ፥ ኦለታናዉ ዮርዳኖሰ ሻፋ ፕኖና። 15 ጎዳይ ህንተና ሸምፕስዳይሳዳ፥ ኤንታካ ሸምፕሳና ጋካናዉነ ጎዳይ ህንተ ፆሳይ ኤንታዉ እምያ ቢታ ኤንቲ ላታና ጋካናዉ፥ ኤንታ ማድተ፤ ኦለትተ። ያትድ፥ ስም ይድ፥ ዮርዳኖሰ ሻፋፐ ሀፍንን ዶሎሀ ባጋን፥ ጎዳ አይለይ ሙሰይ እምዳ ህንተ ቡዞ ቢታን ደእተ" ያግስ።

16 ኤንቲ ዛሪድ እያሱኮ፥ "ነ ኑና ኪትዳ ኡባ ኑኒ ኦና፤ ነ ኪትያሶ ኡባ ባና። 17 ኑኒ ሙሰስ ኡባባን ኪተትዳይሳዳ፥ ነዉካ ኪተታና። ጎዳይ፥ ነ ፆሳይ ሙሰራ ግድዳይሳዳ፥ ኔራካ ግዶ። 18 ኔራ ኤቀተይነ ነ ኪታ እፅያ ኦንካ ደእኮ፥ ሀይቆ። ግዶሽን ኔን ምና" ያግዶሶና።