እያሱ ማፃፋ 11

ፑደሀ ካዎታ ፆነተ

1 ሀዞራ ካዎይ ያብን፥ እስራኤለታ ፆኑዋ ስእዳ ዎደ ማዶና ካዋ ዮባባስ፥ ሽምሮና ካዋስ፥ አዝፋ ካዋስ፥ 2 ፑደሀ ገዘን ደእያ ካዎታስ፥ ከነሬታ አባፈ ዱገሀ ባጋን ዮርዳኖሰ ዛንጋራን ደእያ ካዎታስ፥ ናፋት-ዶራፐ ዉሎሀ ባጋራ ጋን ደእያ ካዎታስ ኪታ የድስ። 3 ቃስ ዶሎሀነ ዉሎሀ ባጋን ደእያ ካናነታስ፥ አሞረታስ፥ ህተታስ፥ ፓርዘታስ፥ ደረይ ዳርያ ቢታን ደእያ ያቡሰታስነ ምፅጳን አርሞና ዙማፐ ጋርሳን ደእያ ህወታስ ኪትስ። 4 ኤንቲ ኡባይ፥ ባንታ ኦላንቾታ፥ ፓራታነ ፓራ ጋረታ እስፈ ጋድ ይዶሶና። ኤንታ ታይቦይ አባ ጋፃን ደእያ ሻፈ መላ። 5 ሄ ካዎት ኡባይ ባንታ ዎልቃ እስፈ ጋድ፥ እስራኤለታ ኦላናዉ መሮመ ሃ ማታን ዱንካንዶሶና።

6 ጎዳይ እያሱኮ፥ "ነ ኤንታዉ ባቦፋ፤ ታኒ ዎንቶ ሀኖደ ኤንታ ኡባ ዎዳ እስራኤለ አሳስ አ እማና። ኔን ኤንታ ፓራታ ጋድያ ቃንፃና፤ ኤንታ ፓራ ጋረታካ ታማን ፁጋና" ያግስ። 7 እያሱይነ እያ ኦላንቾት ኡባይ ኤንቲ ቆፖና ደእሽን መሮመ ሃ ማታን ኤንታ ቦላ ከይድ ኦልዶሶና። 8 ጎዳይ ኤንታና እስራኤለታ ኩሸን አድ እምስ። እስራኤለት ኤንታ ኦልድ፥ ግታ ስዶናነ ማስሮታ ጋካናዉ፥ ቃስ ዶሎሀ ባጋን ደእያ ምፅጳ ዛንጋራ ጋካናዉ ኤንታና የደዶሶና። ኤንታፈ እስ አስካ አሾና ኡባ ዎዶሶና። 9 እያሱይ፥ ጎዳይ ኪትዳይሳዳ ኡባ ቦላ ኦስ፤ ኤንታ ፓራታ ጋድያ ቃንፅስ፤ ኤንታ ጋረታ ፁግስ።

10 ያትድ፥ እያሱይ ጉየ ስሚድ፥ ሀዞራ ኦል ኦይክድ፥ ካዉዋካ ማሻን ዎስ። ሄ ዎደ ሀዞራ ካዎተይ ሀራ ካዎተ ኡባስ ሁጰ። 11 እስራኤለ አሳይ ሀዞራን ደእያ አሳ ኡባ ማሻን ዎዳ ግሾ ሸምፖራ አትዳ አስ ባዋ። ሄ ካታማይ ታማን ፁገትስ።

12 ጎዳ አይለይ ሙሰይ ኪትዳይሳዳ፥ እያሱይ ሄ ካታማታነ ኤንታ ካዎታ ኡባ ድእስ። እስ አስካ አሾና አሳ ኡባ ማሻን ዎስ። 13 ግዶሽን፥ እያሱይ ፁግዳ ሀዞራ ካታማፐ አትሽን፥ ዞዘ ቦላ*11:13 ዞዘ ቦላ፦ ሄስ መ ዞዘ ግዶናሽን ካታማት ኦላን ላለትን ካሰ ቢታ ደንናሽን እያ ቦላ ኬፅሽን ዶረትድ ዞዘ ግድስ ጉሱ። ኬፀትዳ ካታማታ እስራኤለ አሳይ ፁግቦኮና። 14 እስራኤለ አሳይ ሄ ካታማታፐ ቦንቅዳ፥ ሚሽያነ መሄ ኡባ ባንታዉ ኤክዶሶና። እስ አስካ አሾና አሳ ኡባ ማሻን ዎዶሶና። 15 ጎዳይ ባ አይልያ ሙሰ ኪትዳይሳዳ፥ ሙሰይ እያሱ ኪትስ፤ እያሱይካ ኪታ ፖልስ። ጎዳይ ሙሰ ኪትዳባፐ እስባካ እያሱይ አሽቤና፤ ኡባ ኦስ።

16 እያሱይነ እያ ኦላንቾት ደረይ ዳርያ ቢታ፥ ነገበ መላ ቢታ፥ ጎሸና ቢታ ኡባ፥ ዉሎሀ ባጋን ደእያ ጋነ ዮርዳኖሰ ዛንጋራ ኦልድ ኦይክስ። 17 እ ሳይረ ካንስያ ሀላቃ ዙማፐ ብድ፥ አርሞና ዙማፐ ጋርሳ ባጋን ደእያ ልባኖሰ ዛንጋራነ ባኣል-ጋደ ጋካናዉ ደእያ ቢታታ ኦይክስ። ኤንታ ካዎታ ኡባ ሾጭስ፤ ድእድ ዎስ። 18 እያሱይ ዳሮ ዎደ ሄ ካዎታ ኡባራ ኦለትስ። 19 ጋባኦናን ደእያ ህወታፐ አትሽን፥ ሀራ ካታም እስራኤለታራ ሳሮ ዳናዉ ጫቅዳይ ባዋ። እስራኤለት ሀራ ካታማታ ኡባ ኦላን ፆንድ ኦይክዶሶና። 20 ጎዳይ ሙሰ ኪትዳይሳዳ፥ እያሱይ ኤንታ ማሮት ባይና ኡባ ዎና መላ ጎዳይ ኤንታ ዎዛና ሙምስድ እስራኤለታ ኦላና መላ ደንስ።

21 ሄ ዎደ እያሱይ ብድ ደረይ ዳርያ ከብሮናን፥ ዳብራን፥ አናባን፥ ደረይ ዳርያ ይሁዳንነ እስራኤለን ደእያ አዱሳታ፥ አናቀ ኮቻታ ዎድ ኦንግስ። እያሱይ ኤንታነ ኤንታ ካታማታ ኩመ ይስስ። 22 አናቀ ኮቻታፐ ኦንካ እስራኤለ ቢታን አትቤና፥ ሽን ጋዛን፥ ጋታንነ አሽዶዳን ጉት አትዶሶና። 23 ጎዳይ ሙሰ ኪትዳይሳዳ እያሱይ ቢታ ኡባ ኦይክድ፥ እስራኤለ አሳ ኮቻን ኮቻን ሻክድ ላትስስ።

ሄሳፈ ጉየ ቢታይ ኦላፐ ሸምፕስ።