እያሱ ማፃፋ 17

1 ዮሰፋ ባይራ ናኣ ምናሰ ኮቻስ እመትዳ ላታ ቢታይ ካልድ ደኤይሳ፤ ጋላዳ አዋይ ማክር ምናሰ ባይራ ናአ። ማክር ምኖ ኦላንቾ ግድዳ ግሾ፥ ጋላዳነ ባሳነ ቢታ ኤክዶሶና። 2 ዮርዳኖሰ ሻፋፐ ዉሎሀ ባጋራ ደእያ ቢታይ ሀንኮ አትዳ ምናሰ ኮቻስ፥ አብኤዘራስ፥ ሄለቃስ፥ አስርኤላስ፥ ሴከማስ፥ ሄፌራስነ ሻምዳአስ እመትስ። ሀይሳቲ ዮሰፋ ናኣ ምናሰ ኮቻታ።

3 ሄፌራ ናኣ ሰሎጳዳ፥ ጋላዳ ናኣ ሄፌራ፥ ማክራ ናኣ ጋላዳ፥ ምናሰ ናኣ ማክራ። ሰሎጳዳስ ማጫ ናአፐ አትሽን፥ አደ ናእ ባዋ። ሄ ማጫ ናይታ ሱንይ ማህሎ፥ ኖኦ፥ ሆግሎ፥ ምልኮነ ትርፆ። 4 ኤንቲ ካህንያ አላዛራኮ፥ ናወ ናኣ እያሱኮነ ደርያ ጭማታኮ ብድ፥ "ኑ ዳቦታዳ ኑስካ ላታ ቢታ እማና መላ ጎዳይ ሙሰ ኪትስ" ያግዶሶና። ያትን፥ ጎዳይ ኪትዳይሳዳ ኤንታ ዳቦታዳ ኤንታዉካ ላታ ቢታ እምስ። 5 ምናሰ ኮቻት ዮርዳኖሰ ሻፋፐ ዶሎሀ ባጋን ደእያ ጋላዳነ ባሳነ ቦላ ጉጅድ ታሙ ቢታታ ሳማን ኤክዶሶና። 6 ሄሳ ግሾ፥ ምናሰ ኮቻፈ ማጫ ናይት አደ ናይታራ እስፈ ላታ ቢታ ሻከትዶሶና። ጋላዳ ቢታይ አትዳ ምናሰ ኮቻስ ግድስ።

7 ምናሰ ኮቻ ቢታ ዛዋይ አሴራፐ ብድ፥ ሴከማፐ ዶሎሀ ባጋን ደእያ ምክማታታ ጋኬስ። ሄ ዛዋይ ያፐ ካንድ፥ ዱገሀ ባጋን አንታፑሀን ደእያ ደርያ ጉጄስ። 8 ታፑሀ ቢታይ ምናሰ ኮቻሳ፥ ሽን ምናሰ ዛዋን ደእያ ታፑሀ ካታማይ ኤፍሬማ ኮቻሳ። 9 ቃስ ሄ ዛዋይ ያፐ ብድ፥ ቃና ሻፋን ዛዋቴስ። ምናሰ ካታማታ ግዶን ኤፍሬማ ካታማትካ ደኦሶና። ሽን ምናሰ ዛዋይ ቃና ሻፋፐ ፑደሀ ባጋራ ብድ መደትራነ አባን ኤቄስ። 10 ሻፋፐ ዱገሀ ባጋን ደእያ ቢታይ ኤፍሬማሳ፤ ቃስ ፑደሀ ባጋን ደእያ ቢታይ ምናሰሳ። ምናሰ ቢታ ዛዋይ መደትራነ አባ ጋኬስ። እያዉ ፑደሀ ባጋራ አሴር፥ ቃስ ዶሎሀ ባጋራ ይሳኮር ዛዋቴስ። 11 ይሳኮራነ አሴራ ቢታታ ግዶን፥ ቤት-ሳና፥ ይብላማ፥ ዶራ፥ ኤንዶራ፥ ታናካነ ማግዶ ጌተትያ ካታማትነ ጉታት ምናሰሳ። 12 ሽን ምናሰ ኮቻት ሄ ካታማታን ደእያ አሳታ ከስድ ካታማታ ኦይካናዉ ዳንዳእቦኮና። ሄሳ ግሾ፥ ካናነት ያን ዱስ ኦይክዶሶና። 13 እስራኤለ አሳይ ዎልቃን ምንኮካ፥ ካናነት ዎልቃ ኦሶ ኦና መላ ኡንኤዶሶናፐ አትሽን፥ ኤንታ ኩመ ጎድድ ከስቦኮና።

14 ዮሰፋ ኮቻይ፥ "ጎዳይ ኑና አንጅድ፥ ዳርስስ፤ ያትን፥ አይስ እስ ሳማ ፃላላ ላታ ቢታ ኑስ እማዲ?" ያግድ እያሱ ኦይችዶሶና።

15 እያሱይ ዛሪድ፥ "ህንተ ዳሮ ግድኮ፥ ደረይ ዳርያ ኤፍሬማ ቢታይ ህንተዉ ጉፅዳባ ግድኮ፥ ፓርዘትነ ራፋይመት ደእያ ቢታ ብድ ዎራ ቄፅተ" ያግስ።

16 ዮሰፋ ኮቻይ፥ "ሄ ደረይ ዳርያ ቢታይካ ኑስ ግደና። ቃስ ቤት-ሳና ካታማንነ እያ ጉታን ደኤይሳታስነ እዝራኤለ ዛንጋራን ደእያ ካናነታስ ብራታ ፓራ ጋረት ደኦሶና" ያግዶሶና።

17 ያትን እያሱይ ዮሰፋ ኮቸ ግድዳ ኤፍሬማነ ምናሰ፥ "ህንተ ዳሮነ ዎልቃማ፤ ህንተዉ እስ ሳማ ፃላላ ግዳናዉ በሰና። 18 ሄሳ ግሾ፥ ደረይ ዳርያ ቢታይ ህንተባ ግዳና። ሄ ገዘይ ዎራ ግድኮካ ቄፅድ፥ ጋፃ ጋካናዉ ህንተባ ኦተ። ካናነታስ ብራታ ፓራ ጋረት ደእኮካ፥ ቃስ ኤንቲ አይ ምኖ ግድኮካ ህንተ ኤንታ ጎድድ ከሳናዉ ዳንዳኤታ" ያግስ።