እያሱ ማፃፋ 5

እስራኤለ አሳ ቃፃረተ

1 ዮርዳኖሰ ሻፋፐ ዉሎሀ ባጋን ደእያ አሞረታ ካዎትነ መደትራነ አባ ላንቀን ደእያ ካናነታ ካዎት ኡባይ፥ እስራኤለ አሳይ ፕናና ጋካናስ ዮርዳኖሰ ሻፋ ጎዳይ ዋት መልስዳኮ ስእዳ ዎደ ኤንታ ዎዛናይ ትልእን፥ እስራኤለ አሳራ ኤቀታናዉ ፃላተ ይዶሶና።

2 ሄ ዎደ ጎዳይ እያሱኮ፥ "ሳሎ ሹቹ ቃራያዳ እስራኤለ አደ አሳ ናምአን ቃፃራ" ያግስ። 3 እያሱይ ቃራ ሳሎ ሹቻ ኤክድ፥ "ቃፃራ ደረ" ጌተትያ በሳን እስራኤለታ ቃፃርስ። 4 እ ሄሳ ኦዳይ፥ ግብፀፈ ከይዳ አደታን ላይ ኦላስ ጋክዳ ኡባይ መላ ቢታን ሀይቅ ዉርዳ ግሾሳ። 5 ግብፀፈ ከይዳ አደ አሳ ኡባይ፥ ቃፃረትዶሶና፥ ሽን ግብፀፈ ብሸ መላ ቢታን የለትዳ አደ ናይት ቃፃረትቦኮና። 6 ግብፀፈ ከይያ ዎደ ላይ ኦላስ ጋክዳ አደ አሳ ኡባይ ጎዳስ ኪተቶና እፅዳ ግሾ፥ ኤንቲ ሀይቅድ ዉራና ጋካናስ እስራኤለት መላ ቢታን ኦይታሙ ላይ ዩይዶሶና። ጎዳይ፥ ኑስ እማና ግድ ኤንታ ማይዛታስ ጫቅዳ ኤስነ ማ ጎግያ አራዳ ቢታ ሀይቅዳ ኤንታ ናይት ላቶና መላ ካሰ ጫቅስ።✝5:6 ታይቦ 14:28-35. 7 ሄሳ ግሾ እያሱይ ቃፃርዳይ ጎዳይ ኤንታ በሳን ደንዳ ኤንታ ናይታ። ኤንቲ ኦገ ቦላ የለትዳ ግሾ ቃፃረትቦኮና።

8 አሳ ኡባይ፥ ቃፃረትዳፐ ጉየ፥ ኤንታ ማዱንይ ፓፃና ጋካናዉ ኤንቲ ዱንካንዳ በሳን ጋምእዶሶና። 9 ጎዳይ እያሱኮ፥ "ሀች ታኒ ግብፀታ ቦርያ*5:9 ግብፀ ቦርያ፦ ግብፀ ቦርያ ጌተትዳይ ኤንቲ ግብፀን አይለተን ደእዳይሳ በሳና። ህንተፈ ድጋስ" ያግስ። ሄሳ ግሾ፥ ሄ በሳ ሱንይ ሀች ጋካናዉ ጋልጋላ*5:9 ጋልጋላ፦ እብራወ ዶናን ጋልጋላ ጉሳይ "ድግስ" ዎይኮ "ጎንዶርስስ" ጉሱ። ጌተትድ ፄገቴስ።

10 እስራኤለ አሳይ እያርኮ ደንባን ጋልጋላ ጌተትያ በሳን ዱንካንድ፥ ኮይሮ አጌናን ታማነ ኦይዳን ጋላሳን ኦማርስ ፓስካ ባልያ ቦንችዶሶና። 11 ፓስካፐ ጉየ፥ ዎንተ ጋላስ፥ ሄ ጋድያን ዶልዳ ካ አይፍያ፥ ኡይነ ትያ ጫጫ ምዶሶና። 12 ሄ ጋድያን ሞክዳ ካ ኤንቲ ምዳ ዎንተ ጋላስ ማናይ ዎይሳ አግስ። ሄ ዎደፐ ዶምድ እስራኤለ አሳይ ማና ደምቦኮና። ሄሳፈ ጉየ ኤንቲ ካናነን ካፅዳ ካ ምድ ደእዶሶና።

እያርኮ ኩንደ

13 እያሱይ እያርኮ ማታን ደእያ ዎደ ማሻ ኦይክድ ባ ስንን ኤቅዳ እስ አደ በእስ። እያሱይ እያኮ ሺቅድ፥ "ኔን ኑ ባጋየ ዎይኮ ኑ ሞርከታ ባጌ?" ያግድ ኦይችስ።

14 አደይ ዛሪድ፥ "ታኒ ኦደ ባጋካ ግድከ። ሽን ታ ጎዳ ቶራ ሞጮና ግዳዳ ያስ" ያግስ።

እያሱይ ሳአን ኩንድ ጎይንድ፥ "ታ ጎዳዉ፥ ታ ኦናባ ታዉ ኦዳ" ያግስ።

15 ጎዳ ቶራ ሞጮናይ እያሱኮ፥ "ኔን ኤቅዳ በሳይ ጌሽ ግድያ ግሾ፥ ነ ቶሁዋፐ ጫማ ከሳ" ያግስ። ያትን እያሱይ እ ግዳይሳዳ ኦስ።