እያሱ ማፃፋ 19

ስሞና ላታ

1 ናምአን ሳማይ ስሞና ኮቻ ኤንታ ኮቻን ኮቻን ጋክስ። ኤንቲ ላትዳ ቢታይ ይሁዳ ኮቻት ላትዳ ቢታ ግዶን ደኤስ። 2 ኤንቲ ላትዳ ካታማት፥ በርሳበ ዎይኮ ሴባ፥ ሞላዳ፥ 3 ሀፃር-ሹኣላ፥ ባላ፥ ኤፀማ፥ 4 ኤልቶላዳ፥ ባቱላ፥ ሆርማ፥ 5 ፅቅላጋ፥ ቤት-ማርካቦታ፥ ሀፃር-ሱሳ፥ 6 ቤት-ላባኦታነ ሻሩሀ። ኤንቲ ኩመ ታማነ ሄ ካታማ። ኤንታ ዩሹዋን ደእያ ጉታት ኤንታ ቦላ ጉዠቶሶና። 7 ቃስ ሀራ በሳን አይና፥ እርሞና፥ ኤተራነ አሻና ጌተትያ ኦይዱ ካታማታነ ኤንታ ዩሹዋን ደእያ ጉታታ ኦይክዶሶና። 8 ስሞና ቢታይ ዱገሀ ባጋን ደእያ ባእላት-ባኤራ ዎይኮ ራማ ካታማታነ ኤንታ ዩሹዋን ደእያ ጉታታ ኡባ ጋኬስ። ስሞና ኮቻይ ባንታ ኮቻን ኮቻን ላትዳ ቢታይ ሀይሳ። 9 ይሁዳ ኮቻታ ጋክዳ ቢታይ ዳልጋ ግድዳ ግሾ፥ እያፐ ሻከትድ፥ ስሞና ኮቻታስ እመትስ።

ዛብሎና ላታ

10 ሄን ሳማይ ዛብሎና ኮቻ ኤንታ ኮቻን ኮቻን ጋክስ። ኤንቲ ላትዳ ቢታይ ሳርዳ ጋኬስ። 11 ያፐ ደንድድ ዛዋይ ዉሎሀ ባጋን ደእያ ማርአላ ካንድ፥ ዳባሼታ ቦችሸ፥ ዮቅናማ ማታን ደእያ ሃ ጋኬስ። 12 ሳርዳፐ ዶሎሀ ባጋ ምርቀትድ፥ ክስሎት-ታቦራ ካንድ ዳብራታንነ ያፋን ዛዋቴስ። 13 ያፐ ዉሎሀ ባጋራ ካንድ፥ ጋት-ሄፌራነ እት-ቃፅናና ጋክድ፥ እርሞናኮነ ነአኮ ምርቀቴስ። 14 ፑደሀ ባጋ ዛዋይ ሀናቶነ ዩይድ፥ ይፍታሄ ዛንጋራን ዛዋቴስ። 15 ሄ ዛዋይ ቃፃታ፥ ናህላላ፥ ሽምሮና፥ ይዳላነ ቤተለመ ጌተትያ ካታማታ ኦይኬስ። ኤንቲ ኩመ ታማነ ናምኡ ካታማ፤ ኤንታ ዩሹዋን ደእያ ጉታት ኤንታ ቦላ ጉዠቶሶና። 16 ዛብሎና ኮቻት ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።

ይሳኮራ ላታ

17 ኦይዳን ሳማይ ይሳኮራ ኮቻ ኤንታ ኮቻን ኮቻን ጋክስ። 18 ኤንታ ዛዋይ እዝራኤለ፥ ካሱሎታ፥ ሱኔማ፥ 19 ሀፋራይማ፥ ሽኦና፥ አናሃራታ፥ 20 ራብታ፥ ቅሶና፥ አቤፃ፥ 21 ራመታ፥ ኤንጋንማ፥ ኤንሀዳነ ቤት-ጳፀፃ ኦይኬስ። 22 ሄ ቢታ ዛዋይ ታቦረ፥ ሻሀፁማነ ቤት-ሳሜሳ ቦችሸ ብድ፥ ዮርዳኖሰ ሻፋን ዛዋቴስ። ኤንቲ ኩመ ታማነ ኡሱፑን ካታማ፤ ኤንታ ዩሹዋን ደእያ ጉታት ኤንታ ቦላ ጉዠቶሶና። 23 ይሳኮራ ኮቻይ ባንታ ኮቻን ኮቻን ላትዳ ቢታ ግዶን ደእያ ካታማትነ ኤንታ ዩሹዋን ደእያ ጉታት ሀይሳታ።

አሴራ ላታ ቢታ

24 እቻሻን ሳማይ አሴራ ኮቻ ኤንታ ኮቻን ኮቻን ጋክስ። 25 ኤንታ ቢታ ዛዋይ፥ ሄልቃታ፥ ሀላ፥ በፀና፥ አዝፋ፥ 26 አላመለከ፥ አማዳነ ምሻላ ኤኬስ። ዉሎሀ ባጋራ ቃርመሎሳንነ ስሆር-ልብናታን ዛዋቴስ። 27 ቃስ ዶሎሀ ባጋራ ቤት-ዳጎናኮ ምርቀትድ፥ ዛብሎናነ ይፍታህኤላ ዛንጋራ ቦችሸ ብድ፥ ፑደሀ ባጋራ ቤት-ኤመቃነ ንኤላ ጋኬስ። ቃስ ፑደሀ ባጋራ ካቡላ፥ 28 ኤብሮና፥ ረሆባ፥ ሀሞናነ ቃና ካንድ፥ ስዶናን ዛዋቴስ። 29 ሄ ዛዋይ ራማ ዩይድ፥ ግምበን ድረትዳ ፅሮሳ ካታማ ጋክድ፥ ሆሳኮ ምርቀትድ፥ መደትራነ አባን ዛዋቴስ። ቃስ ማሀላባ፥ አክዚባ፥ 30 ኡማ፥ አፌቃነ ረሆባ ጌተትያ ካታማታ ጋክድ ዛዋቴስ። ኤንቲ ኩመ ላታማነ ናምኡ ካታማ፤ ኤንታ ዩሹዋን ደእያ ጉታት ኤንታ ቦላ ጉዠቶሶና። 31 አሴራ ኮቻይ ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።

ንፍታለመ ላታ

32 ኡሱፑን ሳማይ ንፍታለመ ኮቻ ኤንታ ኮቻን ኮቻን ጋክስ። 33 ኤንታ ዛዋይ ሄለፋፐነ ዛናንመ ዎላፐ ብድ፥ አዳም-ነቀባ፥ ያብንኤላነ ላቁማ ካንድ፥ ዉርሰይ ዮርዳኖሰ ሻፋን ኤቄስ። 34 ቃስ ሄ ዛዋይ ዉሎሀ ባጋራ አዝኖት-ታቦራኮ ምርቀትድ፥ ሁቆቃን ኤቄስ። ሄ ዛዋይ ዱገሀ ባጋን ዛብሎና፥ ዉሎሀ ባጋን አሴራ፥ ዶሎሀ ባጋን ዮርዳኖሰ ሻፋ ካንድ ይሁዳን ጋኬስ። 35 ግምበን ድረትዳ ካታማት፥ ፅድማ፥ ፄራ፥ ሀማታ፥ ራቃታ፥ ከነሬታ አባ፥ 36 አዳማ፥ ራማ፥ ሀፆራ፥ 37 ቄደሻ፥ ኤድራአ፥ ኤንሀፆራ፥ 38 ይርኦና፥ ማግደላ፥ ሆረማ፥ ቤት-አናታነ ቤት-ሳሜሳ ካታማታ ኦይኬስ። ሄ ካታማት ኩመ ታማነ ኡዱፉና፤ ኤንታ ዩሹዋን ደእያ ጉታት ኤንታ ቦላ ጉዠቶሶና። 39 ንፍታለመ ኮቻይ ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።

ዳነ ላታ

40 ላፑን ሳማይ ዳነ ኮቻ ኤንታ ኮቻን ኮቻን ጋክስ። 41 ኤንቲ ላትዳ ካታማት ፆርአ፥ ኤሽታኦላ፥ እርሸመሻ፥ 42 ሻአልብማ፥ ኤሎና፥ ይታላ፥ 43 ኤሎና፥ ትምና፥ ኤቅሮና፥ 44 ኤልታቃ፥ ግብቶና፥ ባላታ፥ 45 የሁዳ፥ በነባራቃ፥ ጋት-ርሞና፥ 46 ማያርቆና፥ ራቆናነ ዮጰ ካታማ ዩሹዋን ደእያ ሄራታ ኦይኬስ። 47 ዳነ ኮቻይ ኤንታ ላታ ቢታይ ኤንታፈ ኤከትን፥ ላሸማ ካታማ ብድ፥ ኦላን ፆንድ፥ ሄ ካታማን ደእያ አሳ ማሻን ዎድ፥ ሄ ቢታ ባንታባ ኦዶሶና። ሄ ካታማ ሱን ላምድ፥ ባንታ አዋ ዳነ ሱንን ዳነ ግድ ሱንዶሶና። 48 ዳነ ኮቻት ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።

49 እስራኤለ አሳይ ቢታ ሻሁዋ ኦንግዳ ዎደ፥ ናወ ናኣ እያሱስ ላታ ቢታ እምዶሶና። 50 ጎዳይ ካሰ ኪትዳይሳዳ እያሱይ ደረይ ዳርያ ኤፍሬማን ደእያ ትምናት-ሳራ ካታማ እማና መላ ኦይችን፥ እያዉ እምዶሶና። ሄ ካታማ ዛር ጊግስድ፥ ያን ደእስ። 51 ካህነይ አላዛር፥ ናወ ናኣ እያሱይነ እስራኤለ ሶ አሳ ሀላቃት ሴሎን፥ ጎዳ ስንን ፆሳ ዱንካንያ ፐንገን ሳማ የግድ፥ ሻክዳ ላታ ቢታይ ሀይሳ። ኤንቲ ቢታ ያት ሻክድ ኦንግዶሶና።