እያሱ ማፃፋ 8

ጋየ ካታማ ኩንደ

1 ጎዳይ እያሱኮ፥ "ያዮፋ፤ ህርጎፋ፤ ኦላንቾታ ኡባ ኔራ ኤካዳ፥ ጋየ ካታማ ኦላናዉ ከያ። ጋየ ካዋ፥ እያ አሳ፥ እያ ካታማነ እያ ቢታ ታ ነ ኩሸን አዳ እማስ። 2 ኔን እያርኮ ቦላነ እያ ካዋ ቦላ ኦዳይሳዳ ጋየ ቦላነ እያ ካዋ ቦላ ኦና። ሽን ህንተ ሀእ ኦልድ ድእያ ሻሎነ መሄ ህንተዉ ኤክተ። ካታማፐ ጉየ ባጋራ ቆፖና መን ገላናዉ ጊገታ።"

3 ሄሳ ግሾ፥ እያሱይነ ኦላንቾት ኡባይ፥ ጋየ ካታማ ኦላናዉ ደንድዶሶና። እያሱይ ባ ኦላንቾታ ግዶፈ ሀስታሙ ሙኩሉ ግድያ ምኖ ኦላንቾታ ዶርድ ቃማ የድሸ፥ 4 ኤንታና ሀይሳዳ ያግድ ኪትስ፤ "ብድ ካታማፐ ጉየ ባጋራ ቆሰትድ ናግተ። ካታማፐ ሃክድ ቦናሽን፥ መን ገላናዉ ጊግድ ናግተ። 5 ታነ ታራ ደእያ አሳ ኡባይ፥ ካታማኮ ሺቃና። ሄ ዎደ ጋየ ካታማ አሳይ ኑና ኦላናዉ ያ ዎደ ካሰይሳዳ ኑ ኤንታ ስንፈ ጉየ ስሚድ ባቃታና። 6 ኤንቲ ከሰይሳዳ ኑ ኤንታ ስንፈ ባቃትያ ዳንን፥ ኑፐ ባቃቶሶና ግድ፥ ካታማፐ ኑ ኤንታ ሃሳና ጋካናዉ ኑና ካላና። 7 ሄ ዎደ ህንተ ቆሰትዳ በሳፈ ከይድ ካታማ ኦይክተ። ጎዳይ ህንተ ፆሳይ ካታማ ህንተ ኩሸን አድ እማና። 8 ካታማ ኦይክዳፐ ጉየ፥ ጎዳይ ኪትዳይሳ መላ ታማን ፁግተ። ታ ህንተና ኪታስ" ያግስ።

9 ሄሳፈ ጉየ እያሱይ ኦላንቾታ ኪትስ። ኤንቲ ብድ ጋየ ካታማፐ ዉሎሀ ባጋን ቤተለፐነ ጋየፐ ግዶን ቆሰትድ ናግዶሶና። ሽን እያሱይ ሄ ቃማ አሳራ አቅስ።

10 ዎንተ ጋላስ ጉራ እያሱይ ደንድድ፥ ኦላንቾታ ፄግስ። ያትድ፥ እነ እስራኤለ ጭማት ኦላንቾታ ካለድ ጋየ ካታማ ብዶሶና። 11 እያራ ደእያ ኦላንቾት ኡባይ፥ ስን ብድ ጋየ ካታማ ማትድ፥ ካታማፐ ፑደሀ ባጋን ዱንካንዶሶና። ኤንታፈነ ጋየ ካታማፐ ግዶን ዛንጋር ደኤስ። 12 እያሱይ እቻሹ ሙኩሉ ኦላንቾታ ዶርድ፥ ካታማፐ ዉሎሀ ባጋራ፥ ቤተለፐነ ጋየፐ ግዶን ቆስድ ዎስ። 13 ኦላንቾታፐ ባጋ ካታማፐ ፑደሀ ባጋራ፥ ቃስ ካታማ መንድ ገላና ኦላንቾታ ዉሎሀ ባጋራ በሰ በሰ ኦይስ። ሄ ቃማ እያሱይ ሄ ዛንጋራን አቅስ።

14 ጋየ ካታማ ካዎይ ሄሳ በእዳ ዎደ፥ ባ ኦላንቾታ ኡባ ኤክድ፥ እስራኤለ አሳራ ኦለታናዉ ደምባ ቢታ ከይዶሶና። ሽን ካዎይ ካታማፐ ጉየ ባጋራ ቆሰት ኡትዳ ኦላንቾት ደኤይሳ ኤርቤና። 15 እያሱይነ እስራኤለ አሳ ኡባይ ፆነትዳባ ዳንድ፥ ኤንታ ስንፈ መላ ቢታ ስሚድ ባቃትዶሶና። 16 ጋየ ካታማን ደእያ አሳ ኡባይ፥ ኤንታ የደናዉ ፄገረት ከይድ፥ እያሱ ጎድሸ ካታማፐ ሃክድ ብዶሶና። 17 ጋየ ዎይኮ ቤተለን ደእያ አሳ ኡባይ፥ እስራኤለ አሳ የደናዉ ካታማ የግድ ከይን ካታማ ፐንገያ ናግያ አስ ይዳ ግሾ፤ ዶያ አትስ።

18 ሄሳፈ ጉየ ጎዳይ እያሱኮ፥ "ነ ቶራ ጋየ ካታማ ቦላ ደን። ታኒ ጋየ ካታማ ነ ኩሸን አዳ እማና" ያግስ። ያትን እያሱይ ባ ቶራ ካታማ ቦላ ደንስ። 19 እያሱይ ባ ቶራ ደንዳ ዎደ ቆሰትዳ ኦላንቾት ባንታ በሳፈ ደንድድ፥ ካታማ ገል ኦይክድ፥ ኤለስድ ታማን ፁግዶሶና።

20 ጋየ ካታማ አሳይ ጉየ ስሚድ ፄልያ ዎደ፥ ካታማ ጩያይ ሳሎ ደንድሽን በእዶሶና። መላ ቢታ ባቃትዳ እስራኤለ አሳይ፥ ባንታና የደያ አሳ ቦላ ጉየ ስምዳ ግሾ፥ ኤንቲ አዉ ባጋራካ ከስ ኤካናዉ ዳንዳእቦኮና። 21 እያሱነ እያራ ደእያ አሳ ኡባይ፥ ቆሰት ኡትዳ ኦላንቾት ካታማ ኦይክዳይሳነ ጩያይ ሳሎ ደንድዳይሳ በእዳ ዎደ ጉየ ስሚድ፥ ጋየ ካታማ አሳ ዎዶሶና። 22 ካታማ ገልድ ኦይክዳ ኦላንቾትካ ካታማፐ ኤንታ ቦላ ከይዶሶና። ያትን፥ ጋየ አሳይ እስራኤለ ኦላንቾታን ኡባ ባጋራ ተቀትዳ ግሾ፥ እሶይካ አቶና ዎይኮ ከስ ኤኮና ኡባ ዎድ ዉርስዶሶና። 23 ሽን ጋየ ካታማ ካዋ ደእድ፥ እያሱኮ ኤህዶሶና።

24 እስራኤለ አሳይ ጋየ ካታማ አሳ ኤንታና የደዳ በሳን ማሻን ዎድ ኦንግዳፐ ጉየ፥ ኡባይ ጉየ ካታማ ስሚድ፥ ካታማን አትዳ አሳ ኡባ ማሻን ዎዶሶና። 25 ሄ ጋላስ ጋየ ካታማን ሀይቅዳ አደይነ ማጭ ታማነ ናምኡ ሙኩላ። 26 እያሱይ ጋየ ካታማን ደእያባ ኡባ ኦንጋና ጋካናዉ ካታማ ቦላ ደንዳ ቶራ ዱገ ዎቤና። 27 ሽን ጎዳይ እያሱ ኪትዳይሳ መላ እስራኤለ አሳይ ሄ ካታማ መህያነ ሻሉዋ ባንታዉ ድእዶሶና። 28 እያሱይ ጋየ ካታማ ፁግስ፤ ሄ ካታማይ ሀች ጋካናዉ ላለ ዶረነ አስ ባይና በሲ ግድድ አትስ። 29 እያሱይ፥ ጋየ ካታማ ካዋ ዎድ ኦማርስ ጋካናዉ ም ቦላ ካቅስ። አው ዉልያ ዎደ፥ እያ አሀ ካታማ ገልያ ፐንገን የጋና መላ ኦስ። እያ ቦላ ዳሮ ሹቻ ኬልዶሶና፤ ሄ ኬላ ሹቻይ ሀች ጋካናዉ ሄ በሳን ደኤስ።

ጫቆ ቃላይ ኦራፅስ

30 ሄሳፈ ጉየ፥ እያሱይ ኤባላ ደርያ ቦላ ጎዳስ እስራኤለ ፆሳስ ያርሾ በሲ ኬፅስ። 31 ጎዳ አይለይ ሙሰይ እስራኤለ አሳ ኪትዳይሳዳነ ህገ ማፃፋን ፃፈትዳይሳዳ፥ ያርሾ በሳ ማሰትቦናነ ብራት ቦችቦና ሹቻፈ ኬፅድ፥ እያ ቦላ ጎዳስ ፁሳ ያርሾነ እስፈተ ያርሾ ያርሽዶሶና። 32 እያሱይ፥ እስራኤለ አሳ ስንን፥ ሙሰ ህግያ ሹቻ ቦላ ዛሪድ ፃፍስ። 33 እስራኤለ አሳ አንጃና መላ ጎዳ አይለይ ሙሰይ ኪትዳይሳዳ እስራኤለ አሳ ኡባይ፥ አሳ ጋደ አሳታ፥ ኤንታ ጭማት፥ ኤንታ ሹማትነ ዳይናት ኡባይ፥ ጎዳ ጫቆ ታቦትያ ቶክዳ ሌወ ኮቸ ግድዳ ካህነታ ስንን ኡሻቻ ባጋንነ ሀድርሳ ባጋን ኤቅዶሶና። ኤንታፈ ባጋይ ጋርዛና ዙማ ስንን፥ ቃስ ባጋይ ኤባላ ደርያ ስንን ኤቅዶሶና።✝8:33 ዛረ 11:29፤ 27:11-14. 34 ህገ ማፃፋን ፃፈትዳይሳዳ፥ እያሱይ ህገ ቃላ ኡባ፥ አንጁዋነ ባደ ናባብስ። 35 ሙሰይ ኪትዳ ህግያ እያሱይ፥ እስራኤለ አሳ ኡባስ፥ ማጫሳስ፥ ናይታስነ፥ አሳ ጋደ አሳስ እስ ቃላካ አሾና ናባብስ።