Josué 22

ዶሎሀ ባጋ ኮቻት ስምዶሶና

1 ሄሳፈ ጉየ፥ እያሱይ ሮቤላ፥ ጋደነ ምናሰ ኮቻፈ ባጋ ፄግድ፥ 2 "ጎዳ አይለይ ሙሰይ ህንተና ኪትዳ ኡባ ፖልደታ፤ ቃስ ታዉ ኪተትደታ። 3 ሄ ኡባን ሀች ጋካናዉ ህንተ እሻታ የግቤከታ። ጎዳ፥ ህንተ ፆሳ ኪታ ኡባ ፖልደታ። 4 ጎዳይ ህንተ ፆሳይ ህንተዉ ጫቅዳ ቃላዳ፥ ህንተ እሻታ ሸምፕስስ። ሄሳ ግሾ፥ ጎዳ አይለይ ሙሰይ ህንተዉ ዮርዳኖሰ ሻፋፐ ዶሎሀ ባጋን እምዳ፥ ላታ ቢታን ደእያ ህንተ ሶ ሶ ስምተ። 5 ጎዳ አይለይ ሙሰይ ህንተና ኪትዳ ህግያ ምንድ ናግተ። ጎዳ ህንተ ፆሳ ሲቅተ። እያ ኦግያፐ ደሾፕተ፤ እያ ኪታ ፖልተ። እያራ ሽጵ ግድ ደእተ፤ ህንተ ኩመ ዎዛናፐነ ኩመ ሸምፑዋፈ እያዉ ኦተ" ያግስ።

6 እያሱይ ኤንታ አንጅድ የድን ኤንቲ ባንታ ሶ ስምዶሶና። 7 እያሱይ፥ ምናሰ ኮቻ ባጋስ ባሳነን ላታ ቢታ እምስ። አትዳ ባጋ ኮቻስ ቃስ ዮርዳኖሰፐ ዉሎሀ ባጋን ላታ ቢታ እምስ። እያሱይ ኤንታ አንጅድ ሞይዝሸ፥ 8 ህንተ፥ "ዳሮ መሄ፥ ብራ፥ ዎርቃ፥ ናሰ፥ ብራታነ ዳሮ ማኦ ኤክድ ህንተ ሶ ስማና ሀኔታ። ሄሳ ግሾ፥ ህንተ ሞርከታፐ ድእዳይሳ ህንተ እሻታራ ሻከትተ" ያግስ።

9 ሮቤላ፥ ጋድነ ምናሰ ኮቻ ባጋይ ባንታ ላታ ቢታ ስምዶሶና። ኤንቲ፥ ጎዳይ ሙሰ ባጋራ ኪትን ላትዳ ጋላዳ ቢታ፥ ካናነ ቢታን፥ ሴሎን ደእያ እስራኤለ አሳፐ ሻከትድ ብዶሶና።

ዶሎሀ ባጋ ያርሾ በሳ

10 ሮቤላ፥ ጋድነ ምናሰ ኮቻፈ ባጋይ ዮርዳኖሰ ማታን ካናነ ቢታን ደእያ ጋልሎታ ይድ፥ ሻፋ ማታን ማላልስያ ግታ ያርሾ በሲ ኬፅዶሶና። 11 ሮቤላ፥ ጋድነ ምናሰ ኮቻፈ ባጋይ ዮርዳኖሰ ማታን፥ ጋልሎታን፥ ካናነ ቢታን ያርሾ በሲ ኬፅዳይሳ አትዳ እስራኤለ አሳይ ስእዶሶና። 12 እስራኤለ አሳይ ሄሳ ስእድ፥ ኤንታ ኦላናዉ ሴሎን ሺቅዶሶና።

13 ሄሳፈ ስን እስራኤለ አሳይ፥ ካህንያ አላዛራ ናኣ ፕንሃሳ፥ ጋላዳን ደእያ ሮቤላ፥ ጋደነ ምናሰ ኮቻፈ ባጋታኮ የድዶሶና። 14 እስ እስ ኮቻይ ባ ሶ ሀላቃታፐ እስ እስ አሰ ዶርድ፥ ታሙ አስ ፕንሃሳራ የድዶሶና።

15 ኤንቲ ሮቤላ፥ ጋድነ ምናሰ ኮቻፈ ባጋይ ጋላዳ ብድ፥ 16 "ጎዳ አሳይ፥ ‘እስራኤለ ፆሳ ቦላ ደእያ ህንተ አማኑዋ አይስ ፓጭሴቲ? ህንተዉ ያርሾ በሲ ኬፅድ፥ ጎዳፐ ሃክደታ። እያ ቦላ አይስ ማካልደቲ? 17 ፐኦራን ኑ ኦዳ ናጋራይ ግደኔ? ጎዳ አሳ ቦላ ቦሽ ዎስ፤ ሀች ጋካናዉ ኑኒ ሄ ናጋራፐ ጌይቦኮ። 18 ጎዳ ቦላ ሀች ህንተ ዞኮ ዛርደታ። ሀች ህንተ እያ ቦላ ዞኮ ዛርኮ ዎንቶ እ ኩመ እስራኤለ አሳ ሀንቃና። 19 ህንተ ደእያ ቢታይ ቱንዳባ ግድኮ፥ ጎዳ ዱንካነይ ደእያ ቢታ፥ ሃ ኑኮ ይድ፥ ኑ ላታ ሻከትተ። ሽን ጎዳ፥ ኑ ፆሳ ያርሾ በሳፈ ሀራ ያርሾ በሲ ኬፅድ ፆሳ ቦላ ዎይኮ ኑ ቦላ ማካሎፍተ። 20 ዛራ ናአይ አካን ድገትዳባ ኤክድ፥ ናጋራ ኦዳ ግሾ፥ ኩመ እስራኤለ አሳ ቦላ ጎዳ ሀንቆይ ዎቤነዬ? እያ ናጋራ ጋሶን ሀይቅዳይ እያ ፃላላ ግደና’ " ያግዶሶና።

21 ያትን ሮቤላ፥ ጋደነ ምናሰ ኮቻፈ ባጋይ ሀይሳዳ ያግድ ዛርዶሶና። 22 "ጎዳ ፃላል ፆሰ! ጎዳ ፃላል ፆሰ! ኑኒ ሀይሳ አይስ ኦዳኮ እ ኤሬስ፤ ህንተካ ኤራና መላ ኑ ኮዮስ። ኑኒ ጎዳ ቦላ ማካልዳባነ ኪተቶና እፅዳባ ግድኮ፥ ሀች ኑና ፓፃ ዎፍተ። 23 ኑ ጎዳስ ኪተቶና እፅድ፥ ፁሳ ያርሹዋ፥ ካ ያርሹዋነ እስፈተ ያርሹዋ ያርሻናዉ ያርሾ በሲ ኬፅዳባ ግድኮ፥ ጎዳይ ኑና ሀንቆ። 24 ኑ ሄሳ ቆፕድ ኬፅቦኮ። ኑኒ ያርሾ በሲ ኬፅዳይ፥ ዎንቶ ህንተ ናይት፥ ኑ ናይታኮ፥ ‘ህንተዉ ጎዳ፥ እስራኤለ ፆሳራ አይ ጋሄተ ደኢ? 25 ጎዳይ ኑ ግዶንነ ሮቤላነ ጋዳ ኮቻ ግዶን ዮርዳኖሰ ሻፋ ዛዋ ዎስ። ሄሳ ግሾ፥ ጎዳራ ህንተዉ ጋሄተ ባዋ’ ጋንደሻ ግድ ያይዳ ግሾሳ። ቃስ ህንተ ኮቻይ ኑ ኮቻ ጎዳ ጎይኖ ድጎና አጎኮና" ያግድ ቆፕዳ።

26 "ኑ ያርሾ በሲ ኬፅዳይ ሄሳሳ። ፁሳ ዎይኮ ሀራ ያርሾ ያርሻናሳ ግደና። 27 ኑኒ ያርሾ በሲ ኬፅዳይ፥ ፁሳ፥ እስፈተነ ሀራ ያርሹዋ ያርሽሸ ደእዳይሳስነ ጎዳ ዱንካንያ ስንን ጎይንሸ ደእዳይሳስ፥ ኑ ግዶንነ ህንተ ግዶን ቃስ ካልያ የለታ ግዶን ሄስ ማርካ ግዳና መላሳ። ሄስ ህንተ ናይት ኑ ናይታኮ፥ ‘ህንተዉ ጎዳራ አይ ጋሄተካ ባዋ’ ያጎና መላ ማዳና። 28 ኤንቲ ዎደፐ ኑኮ ዎይኮ ኑ ኮቻኮ ሄሳዳ ጊኮ፥ ኑ ናይት ዛሪድ፥ ‘ኑ አዋት ጎዳስ ኬፅዳ ያርሾ በሳ ሌምሱዋ ሀይሳ በእተ። ሄስ ህንተ ግዶንነ ኑ ግዶን ማርካ ግዳና መላሳፈ አትሽን፥ ፁሳ ዎይኮ ሀራ ያርሾ ያርሻናሳ ግደና’ ጋናዉ ዳንዳአና መላሳ። 29 ኑ ጎዳ ቦላ ማካላናይስ ኑፐ ሃኮ። ጎዳ ኑ ፆሳ ዱንካንያ ስንን ደእያ ያርሾ በሳፈ ሀራ ፁሳ፥ ካነ ሀራ ያርሾ በሲ ኬፅድ ፆሳ ጎይኖ አጎኮ" ያግድ ዛርዶሶና።

30 ካህነይ ፕንሃስነ እያራ ደእያ እስራኤለ ሀላቃት፥ ሮቤላ፥ ጋደነ ምናሰ ኮቻፈ ባጋይ ኦድዳይሳ ስእድ፥ ኡፋይትዶሶና። 31 ካህንያ አላዛራ ናአይ ፕንሃስ፥ ሮቤላ፥ ጋደነ ምናሰ ኮቻታኮ፥ "ጎዳይ ኑራ ደኤይሳ ኑ ሀች ኤርዳ። ህንተ ጎዳ ቦላ ማካልቤከታ። ህንተ እስራኤለ አሳ ጎዳ ፕርዳፈ አሽደታ" ያግስ።

32 ካህንያ አላዛራ ናአይ ፕንሃስነ እያራ ደእያ ሀላቃት ጋላዳን ደእያ ሮቤላነ ጋዳ ኮቻ ማታፐ ካናነን ደእያ እስራኤለ አሳኮ ስሚድ፥ ሀንዳባ ኤንታዉ ኦድዶሶና። 33 እስራኤለ አሳይ ኡፋይትድ፥ ፆሳ ጋላትዶሶና። ሄሳፈ ጉየ፥ ሮቤላነ ጋዳ አሳት ደእያ ቢታ ኦልድ ይሳናዉ ኦደትቦኮና።

34 ሮቤላነ ጋዳ ኮቻይ፥ "ሀ ያርሾ በሳይ ጎዳ ፃላል ፆሳ ግደይሳስ ኑስ ማርካ" ያግድ፥ ሄ ያርሾ በሳ "ማርካ" ግድ ሱንዶሶና።