1 የሱሲ ታማነ ናምኡ ሀዋረታ ባኮ ፄግድ፥ ቱና አያናታ ከሳና መላነ ሀርገ ኡባ ፓና መላ ዎልቃነ ማታ እሚስ። 2 ፆሳ ካዎተባ ማርካታናዳነ ሀርጋንቾታ ፓናዳ ኪትስ። 3 እ ኤንታኮ፥ "ፃምአ ግድን ኦጎሮ ግድን ካ ግድን ሚሸ ግድን ላምድ ማእያ አፍላ ግድን ኦገስ ግድ አይኮካ ኦይኮፍተ።✝ 4 ሄ ካታማፐ ህንተ ከያና ጋካናዉ እማተን ህንተ ገልዳ ኬን ጋምእተ። 5 ኦንካ ህንተና ሞኮና እፅኮ ሄ ካታማፐ ከይሸ ኤንታዉ ማርካ ግዳና መላ ህንተ ቶሁዋን ደእያ ባና ፕትድ ከይተ።" 6 ኤንትካ ኪተትዳይሳዳ ከይድ ዎንገላ ኦድሸነ ዱማ ዱማ ጉታታን ሀርጋንቾታ ፓሸ አዶሶና።

7 ጋልላ ቢታ ሃርያ ሄሮዲስ የሱሲ ኦዳባ ኡባ ስእዳ ዎደ ዳጋምስ። አይስ ጊኮ፥ እስ እስ አሳት ዮሃንስ ሀይቆፐ ደንዶና አገና ያጎሶና።✝ 8 ባጋት፥ "ኤልያስ ቆንጭስ" ጎሶና፤ ሀራት ቃስ፥ "በን ናበታፐ እሶይ ሀይቆፐ ደንድስ" ያግድ ኦደቶሶና። 9 ሽን ሄሮዲስ፥ "ታኒ ዮሃንሳ ቆያ ቃንፅሳዳ ዎስ። ያትን፥ ሀይሳ ያገትድ እያባ ኦደተይ፥ እ ኦኔ?" ያግድ ባ አይፈን በአናዉ ኮዬስ።

10 ታማነ ናምኡ ሀዋረት ጉየ ስም ይድ፥ ኤንቲ ኦዳባ ኡባ የሱሳስ ኦድዶሶና። እ ኤንታና ኤክድ ቤተሳይዳ ካታማፐ ጋፃ ኤፍስ። 11 ሽን ዳሮ አሳይ የሱሳ ግደይሳ ኤርድ እያ ካልዶሶና። እ ኤንታ ሞክ ኤክድ ፆሳ ካዎተባ ታማርስስ፤ ፓፃናዉ ኮየይሳታካ ፓስ።

12 ሳእ ኦማርስያ ዎደ ታማነ ናምኡ ሀዋረት እያኮ ሺቅድ፥ "ኑ ደኤይ መላ ቢታ ግድያ ግሾ አሳይ ዱማ ዱማ ጉታታነ ካታማታ ብድ፥ ካነ አቅያ በሲ ኮያና መላ አሳ ሞይዛ" ያግዶሶና።

13 ሽን እ፥ "ኤንታዉ ምያባ ህንተ እምተ" ያግስ።

ኤንቲ፥ "ኑስ ደኤይ እቻሹ ኡይነ ናምኡ ሞሎ ግድያ ግሾ፥ ሀ አሳስ ግድያ ካ ኑኒ ብድ ሻሞና እፅኮ ግደና" ያግዶሶና። 14 ሄ በሳን እቻሹ ሙኩሉ ግድያ አደት ደኦሶና።

የሱሲ ባ ታማረታኮ፥ "እሻታማን እሻታማን ሻክ ሻክ አሳ ኡትስተ" ያግስ።

15 እያ ታማረት፥ እ ኪትዳይሳዳ አሳ ኡትስዶሶና። 16 እ እቻሹ ኡይነ ናምኡ ሞሎታ ኤክድ፥ ሳሎ ፄልድ፥ ፆሳ ጋላትድ፥ መንድ አሳ ኡባ ጋና መላ ባ ታማረታስ እሚስ። 17 ኡባይ ምድ ካልዶሶና። ኤንታፈ አትዳ ቲፈይ ታማነ ናምኡ ጋይታ ኩመ ግድስ።

18 የሱሲ ባ ፃላላ ዎስሽን፥ እያ ታማረት እያኮ ይዶሶና። እ፥ "አሳይ ታና ኦና ጎና?" ግድ ኦይችስ።

19 ኤንቲ ዛሪድ "እሶት እሶት፥ ‘ፃማቅያ ዮሃንሳ፥ ባጋት ኤልያሳ፥ ሀራት ቃስ፥ በን ናበታፐ እሶይ ሀይቆፐ ደንድስ’ ያጎሶና" ያግዶሶና።✝

20 እ ዛሪድ፥ "ያትን ህንተ ታና ኦና ጌቲ?" ያግስ። ጰፅሮስ፥ "ኔኒ ፆሳፈ ኪተትዳ ክርስቶሳ" ያግድ ዛርስ።✝

21 የሱሲ ሀይሳ ኦደስካ ኦዶፕተ ግድ ምንድ ኦድስ። 22 ቃስካ የሱሲ፥ "አሳ ናእ ዳሮ መቱዋ ኤካና። ቢታ ጭማታ፥ ካህነ ሀላቃታነ ህገ አስታማረታ ኩሸን አድ እመታና። ኤንቲ እያ ዎና፥ ሽን እ ሄን ጋላስ ሀይቆፐ ደንዳና" ያግስ።

23 የሱሲ አሳ ኡባኮ፥ "ታና ካላናዉ ኮየይ ኦንካ ደእኮ ባና ካዶ፥ ባ ማስቃልያ ጋላስ ጋላስ ቶክድ ታና ካሎ።✝ 24 ባ ሸምፕዉ አሻናዉ ኮያ ኡባይ እዮ ይሴስ፥ ባ ሸምፕዉ ታ ግሾ ግድ ይስያ ኦንካ እዮ አሼስ።✝ 25 አስ አላመ ኡባ ሃርድ፥ ግዶሽን፥ ባ ሸምፕዉ ይስያባ ዎይኮ ቆህያባ ግድኮ እያ አይ ማዲ? 26 ኦንካ ታናንነ ታ ቃላን ዬላትኮ፥ አሳ ናእ ባ ቦንቹዋራ ሄሳዳካ አዋ ቦንቹዋራነ ጌሻ ኪታንቾታ ቦንቹዋራ ያ ዎደ እያን ዬላታና። 27 ታ ህንተዉ ቱማ ኦዳይስ፤ ሀይሳን ኤቅዳይሳታ ግዶፈ ፆሳ ካዎተ በኦናሽን ሀይቆና አሳት ደኦሶና" ያግስ።

28 የሱሲ ሄ ኦዳ ኦድን፥ ሆስፑን ጋላሳፐ ጉየ፥ ጰፅሮሳ፥ ያይቆባነ ዮሃንሳ ባራ ኤክድ ዎሳናዉ ዙማ ቦላ ከይስ።✝ 29 እ ዎሳ ቦላ ደእሽን እያ አይፈ ካረይ ላመትስ፤ አፍላይካ ቦፅድ፥ አዋ መላ ጶልስ። 30 ናምኡ አሳት፥ ኤንትካ ሙሰራነ ኤልያሳራ ቦንቾን ቆንጭድ፥ 31 የሩሳላመን ፖለታናዉ ደእያባ፥ ሄስካ፥ እ ሀ አላምያፐ ሻከታናባ እያራ ኦደቶሶና። 32 ጰፅሮሳነ እያራ ደኤይሳታ ስኮይ ኤፍን፥ ኤንቲ ስኮፈ ባርክያ ዎደ እያ ቦንቹዋነ እያራ ኤቅዳ ናምኡ አሳታ በእዶሶና። 33 አሳት የሱሳፐ ሻከትድ ባና ሀንሽን፥ ጰፅሮስ የሱሳኮ፥ "ጎዳዉ፥ ኑ ሀይሳን ግድኮ ኑስ አይ መላ ሎኦ! እስኖ ነዉ፥ እስኖ ሙሰስ፥ እስኖ ኤልያሳስ ኦድ፥ ሄ ሻቃራ ሻቃሮስ" ያግስ። ሽን እ አይ ግዳኮ ኤረና።

34 እ ያግድ ኦደትሽን ሻራይ ይድ ኤንታና ካምስ። ኤንቲ ሄ ሻራ ግዶ ገልሸ ባብዶሶና። 35 ሻራ ግዶፈ፥ "ታ ዶርዳ ናአይ ሀይሳ እያ ስእተ" ግያ ቃል ስኤትስ።✝ 36 ቃል ስኤትዳፐ ጉየ፥ የሱሲ ባርካ ደእሸ በንትስ። ሄ ዎደ ኤንቲ በእዳባ ኦደስካ ኦዶና፥ ባንታ ዎዛናን ኦይክድ ስእ ግዶሶና።

37 ዎንተ ኤንቲ ዙማ ቦላፈ ዎያ ዎደ ዳሮ አሳይ ይድ እያራ ጋሄትዶሶና። 38 ሄ ዎደ አሳ ግዶፈ እስ አስ፥ "አስታማርያዉ፥ ታ እስ ናኣ ያዳ በአርክ። 39 ቱና አያናይ ቆፖና ኦይክድ ዋስሴስ፤ ጎፖንቶ የግስድ ቃከረስ፥ አሳተ ቆህድ ኡንኤድ የዴስ። 40 ነ ታማረት ከሳና መላ ዎሳስ፥ ሽን ኤንቲ ዳንዳእቦኮና" ያግድ ዎስስ።

41 የሱሲ፥ "አማኖይ ባይና ጌላ የለታቶ፥ አዉደ ጋካናዉ ታ ህንተራ ዳነ፥ ህንተና ዳንዳአኔ? ነ ናኣ ባዳ ሃ ኤካያ" ያግስ።

42 ናኣ ኤክድ ያ ዎደ ቱና አያናይ ሳአን ሆል የግድ ኮኮርስስ። ሽን የሱሲ ቱና አያና ሀንቅድ ናኣፐ ከስስ። ናኣካ ናኣ አዋስ እሚስ። 43 አሳ ኡባይ ፆሳ ግታ ዎልቃን ማላለትዶሶና። ኤንቲ እ ኦዳባን ማላለትሽን፥ የሱሲ ባ ታማረታኮ፥ 44 "ሀይሳ ታ ህንተዉ ኦደይሳ ሎይ ስእተ፤ አሳ ናእ ሞርከታ ኩሸን አድ እመታና" ያግስ። 45 ሽን እ ግዳባይ ኤንታፈ ጌምዳ ግሾ፥ አኬክቦኮና። ሄሳ ግሾ፥ ዛሪድ ኦይቻናዉ ባብዶሶና።

46 የሱሳ ታማረት፥ "ኑ ግዶን ግታ ግዳናይ ኦኔ?" ግድ ፓላማ ኦይክዶሶና።✝ 47 የሱሲ ኤንታ ዎዛና ቆፋ ኤርድ ዮጋ ናኣ ባ ማታን ኤስድ፥ 48 "ሀ ዮጋ ናኣ ታ ሱንን ሞክያ ኦንካ ታና ሞኬስ፥ ታና ሞከይ ታና ኪትዳይሳ ሞኬስ፥ ህንተ ኡባፈ ጉፀይስ፥ እ ግታ ግዳና" ያግስ።✝

49 ዮሃንስ፥ "ጎዳዉ፥ እስ አስ ነ ሱንን ቱና አያናታ ከስሽን በእድ፥ እ ኑራ ግዶና ግሾ ድግዳ" ያግስ።

50 የሱሲ ዛሪድ፥ "ህንተራ ኤቀቶናይስ፥ እ ህንተ ባጋ። ሄሳ ግሾ፥ እያ ድጎፍተ" ያግስ።

51 የሱሲ ሳሎ ብያ ዎደይ ማታትዳ ግሾ፥ የሩሳላመ ባናዉ ቃንፅድ ደንድስ። 52 ሳማረ ቢታን ደእያ እስ ጉታ ብድ፥ ኡባባ እያዉ ጊግሳና መላ አሰ ያ ኪትስ። 53 ሽን እ በይ የሩሳላመ ግድያ ግሾ፥ ኤንቲ እያ ሞክ ኤክቦኮና። 54 የሱሳ ታማረት ያይቆባራነ ዮሃንሳራ ሄሳ በእድ፥ "ጎዳዉ፥ ሳሎፐ ታም ዎድ ኤንታ ሞ ጋና መላ ነ ኮያይ" ያግዶሶና።✝ 55 ሽን የሱሲ ጉየ ስም ኤንታ ሀንቀትድ፥ "ህንተ ጋርሳን አይብ አያን ደእያኮ ህንተ ኤረከታ። አሳ ናእ አሰ አሻናዉ ይስፐ አትሽን፥ ይሳናሳ ግደና" ያግስ። 56 ያፐ ደንድድ ሀራ ጉታ ብዶሶና።

57 ኤንቲ ኦገራ ብሽን፥ እስ አስ፥ "ነ ብያ ሶ ኡባ ታ ካላና" ያግስ።

58 የሱሲ ዛሪድ፥ "ዎርካናታስ ኦል፥ ሳሎ ካፎታስ ኬ ደኤስ፥ ሽን አሳ ናእ ባ ሁጰ ሸምፕስያ በሲ ባዋ" ያግስ።

59 ሀንኩዋኮ፥ "ኔኒ ታና ካላ" ያግስ። ሽን ኡራይ፥ "ጎዳዉ፥ ኮይሮታዳ ታ አዋ ሞጋዳ ያና" ያግስ።

60 ሽን የሱሲ፥ "ሀይቅዳይሳት ሀይቅዳይሳታ ሞጋና መላ ኤንታዉ አጋጋ፤ ኔኒ ባዳ ፆሳ ካዎተ ሳባካ" ያግስ።

61 ቃስ ሀራ አስ፥ "ጎዳዉ፥ ታ ነና ካላና፥ ሽን ኮይሮታዳ ታ ሶ አሳ ሳሮዳ ያና" ያግስ።✝

62 የሱሲ ዛሪድ፥ "ኮፀ ኦይክድ ጉየ ፄልያ ኦንካ ፆሳ ካዎተስ በሰና" ያግስ።