Mateus 14

ፃማቅያ ዮሃንሳ ሀይቁዋ

1 ሄ ዎደ ጋልላ አይስያ ሄሮዲስ*14:1 ሄሮዲስ፦ ሀይስ ካዋ ሄሮዲሳ አንትጳሳ። እ፥ ይሁዳነ ፔርያ ክርስቶስ የለታናፐ ስን 4-39 ምልክ ጋካናዉ ሃርስ። እ ካዋ ሄሮዲሳስ ናአ። የሱሳባ ስእስ። 2 ባ አይለታኮ፥ "ሀይስ ፃማቅያ ዮሃንሳ፤ እ ሀይቆፐ ደንድስ። ያንዳ ግሾ፥ ሀ ኡባ ማላታታ እ ኦስ" ያግስ።

3 እ ሄሳ ግዳይ ሄሮዲስ ባ እሻ ፍልጶሳ ማቸ ሄሮድያድ ጋሶን ዮሃንሳ ቃሾ ኬ ገልስዳ ግሾሳ። 4 ዮሃንስ ሄሮዲሳ፥ "ነ እዮ ኤካናዉ ዎጋ ግደና" ያግስ።✝14:4 ሉቃ 3:19-20፤ ሌወ 18:16፤ 20:21. 5 ሄሮዲስ ዮሃንሳ ዎናዉ ኮይስ፥ ሽን ደረይ ዮሃንሳ ናበ ኦድ በእያ ግሾ ያሸትስ።

6 ሄሮዲስ ባ የለትዳ ጋላሳ ቦንችያ ዎደ፥ ሄሮድያዳ ናእያ አሳ ስንን የን ዱራዳ እያ ኡፋይሳሱ። 7 ያትን፥ እ፥ "እያ ኮያባ ኡባ እማና ግድ" ጫቅስ። 8 ናእያ ባ አየ ዞርያ ስአዳ ሄሮዲሳኮ፥ "ፃማቅያ ዮሃንሳ ሁጵያ ከረን ዎዳ ታዉ እማ" ያጋሱ። 9 እያ ያግን ካዎይ ቂሮትስ፥ ሽን ባ ጫቁዋ ግሾነ ባራ ደእያ እማታ ግሾ ግድ እ ኦይሻይ ፖለታና መላ ኪትስ። 10 ካዎይ አሰ ኪትድ ዮሃንስ ቃሾ ኬን ደእሽን እያ ቆያ ጎራእስስ። 11 ሁጵያ ከረን ዎ ኤህድ ናኤስ እምዶሶና፤ ናእያካ ኤካዳ ባ አየስ ኤፋሱ። 12 ዮሃንሳ ታማረት ይድ እያ አሀ ኤፍድ ሞግዶሶና። እያፐ ጉየ ሀንዳባ ኡባ ብድ የሱሳስ ኦድዶሶና።

እቻሹ ሙኩሉ አሳ

13 የሱሲ ሀንዳባ ስእዳ ዎደ ዎጎሎን ገልድ ሄ በሳፈ እስ ጌምያ ሶ ባርካ ብስ። አሳይ ሄሳ ስእድ ካታማታፐ ደንድድ ቶሆን እያ ካልዶሶና። 14 የሱሲ ዎጎሉዋፐ ዎድ ዳሮ አሳ በእድ ኤንታዉ ቃትስ። ኤንታ ግዶን ደእያ ሀርጋንቾታ ፓስ።

15 ሳአይ ኦማርስሸ ብያ ዎደ የሱሳ ታማረት እያኮ ሺቅድ፥ "ሀ በሳይ አስ ባይና በሲ፥ ሳእካ ቃምስ። ያንያ ግሾ፥ ሄራን ደእያ ጉታታ ብድ ባንታዉ ሻምድ ማና መላ ደርያ የዳ" ያግዶሶና።

16 ሽን የሱሲ ኤንታኮ፥ "ደረይ ሞና ባናዉ ኮሸና፤ ኤንቲ ማናባ ህንተ እምተ" ያግስ።

17 ኤንቲ ዛሪድ፥ "ኑስ ሀይሳን እቻሹ ኡይፈነ ናምኡ ሞሎፐ ሀር ባዋ" ያግዶሶና።

18 እካ፥ "አነ ኤንታ ሃ ኤህተ" ያግስ። 19 ካልድካ፥ ደረይ ማታን ኡታና መላ ኦድስ። እቻሹ ኡይነ ናምኡ ሞሎታ ኤክድ፥ ሳሎ ፄልድ ጋላት ስሚድ፥ ኡይ መንድ ባ ታማረታስ እሚስ፤ ኤንቲ ቃስ ደርያስ እምዶሶና። 20 ኡባይ ምድ ካልዶሶና። የሱሳ ታማረት ምሽን አትዳይሳ ታማነ ናምኡ ጋይታ ደንዶሶና። 21 ካ ምዳ አሳይ ማጫሳይነ ናይት አትሽን፥ እቻሹ ሙኩሉ ግዴስ።

የሱሲ አባ ቦላራ ሄመትስ

22 የሱሲ ባ ታማረት ዎጎሎን ገልድ ባፐ ስንትድ አባፈ ሄ ፕን ፕናና መላ ኪትድ ባዉ ደርያ ሞይዛናዉ ጉየ አትስ። 23 ደርያ ሞይዝ ስሚድ ባርካ ዎሳናዉ እስ ዙማ ቦላ ከይስ። ሳአይ ቃምንካ እ ባርካ ያን ጋምእስ። 24 ሄ ዎደ ዎጎሎይ አባ ቦላ ብሽን ስን ባጋራ ጫርኮይ ደንድን ሆበይ ዎጎሉዋ ኡንኤስ።

25 ዎንትማ ቦላ የሱሲ አባ ቦላ ሄመትሸ ባ ታማረታኮ ይስ። 26 እያ ታማረት፥ እ አባ ቦላ ሄመትሸ ባንታኮ የይሳ በእድ ያይዶሶና። ኤንትካ፥ "ሀይስ ሞይትለ" ግድ ያይድ ዋስዶሶና።

27 ሽን የሱሲ ኤለስድ፥ "አይኮይ ባዋ! ያዮፍተ! ታናባይ" ያግስ።

28 ጰፅሮስ እያኮ፥ "ጎዳዉ፥ ነና ግድኮ፥ ታኒ ሃ ቦላራ ሄመታዳ ኔኮ ባና መላ ታና ኪታ" ያግስ።

29 የሱሲ ጰፅሮሳኮ፥ "ሃያ" ያግስ።

ጰፅሮስ ዎጎሉዋፐ ዎድ ሃ ቦላራ ሄመትሸ የሱሳኮ ቡሱ ኦይክስ። 30 ሽን ዎልቃማ ጫርኩዋ በእድ ያይስ። ሃን ምተተ ኦይክዳ ዎደ፥ "ጎዳዉ! ታና አሻርክ!" ያግድ ዋስስ።

31 የሱሲ ኤለስድ ባ ኩሽያ የድ እያ ኦይክድ፥ "ነኖ፥ አማኖይ ፓጭዳይሶ አይስ ስይ" ያግስ።

32 የሱሳራነ ጰፅሮሳራ ዎጎሉዋን ገልዳ ዎደ ጫርኮይ ስእ ግስ። 33 ዎጎሉዋ ግዶን ደእያ እያ ታማረት፥ "ኔኒ ቱማካ ፆሳ ናአ" ግድ ጎይንዶሶና።

34 ኤንቲ አባ ፕንድ ገንሳሬፀ ቢታ ጋክዶሶና። 35 ሄ ቢታን ደእያ አሳይ የሱሳ ኤርዳ ዎደ ባንታ ሄራን ደእያ ጉታ ኡባ ኪታ የድዶሶና። አሳይ ሀርጋንቾታ ኡባ እያኮ ኤህዶሶና። 36 ሀርጋንቾት እያ አፍላ ማጫራ ፃላላ ቦቻና መላ ዎስዶሶና። ቦችዳ ኡባይካ ፓፅዶሶና።