ዛረ ማፃፋ 9

ኪተተ እፆ

1 ነኖ፥ እስራኤለ ስአ፤ ኔፐ ግታትያነ ዎልቃምያ ካዎተታ፥ ግምበይ ሳሎ ጋክዳ ግታ ካታማታ ላታናዉ ሀች ዮርዳኖሰ ፕናሳ። 2 ሄ ቢታን ደእያ አሳይ ምኖነ አዱሰ። ኔኒ፥ "ኦንካ ኤንታራ ኤቀታናዉ ዳንዳኦና አናቀ ኮቻታ" ግሽን ስአዳሳ። 3 ሽን ምያ ታማዳ ኔፐ ስንራ በይ ጎዳ፥ ነ ፆሳ ግደይሳ ሀች ኤራ። እ ኤንታ ይሳናነ ነ ስንን ኤንታ ካዉሻና። ጎዳይ ነዉ ግዳይሳዳ ነ ኤንታ ጎዳዳ ከሳናነ ኤለሳዳ ይሳና።

4 ጎዳይ፥ ነ ፆሳይ ኤንታ ነ ስንፈ ጎድዳፐ ጉየ፥ ነ ዎዛናን፥ "ታኒ ፅሎ ግድያ ግሾ፥ ሀ ቢታ ታ ላታና መላ ጎዳይ ታና ኤህስ" ጎፓ። ጎዳይ ኤንታ ነ ስንፈ የደድ ከስዳይ ኤንቲ ኢታ ግድያ ግሾሳ። 5 ነ ኤንታ ቢታ ላታናዉ ይዳይ ነ ፅሎነ ሱረ ግድያ ግሾ ግደና። ሽን ጎዳይ፥ ነ ፆሳይ ኤንታ ነ ስንፈ ጎድዳይ ሀ ካዎተት ኢታ ግድያ ግሾነ በን ነ ማይዛታስ አብራሃመስ፥ ይሳቃስነ ያይቆባስ ጫቅዳ ጫቁዋ ናጋናሳ። 6 ህዛ ነ ሄሳ አኬካ። ጎዳይ፥ ነ ፆሳይ ሀ ሎኦ ቢታ ነና ላትሰይ ነ ፅሎተ ግሾሳ ግደና፤ ነኒ ዎዛን ሙምዳ አስ።

ዎርቃ ማር

7 ጎዳ፥ ህንተ ፆሳ መላ ቢታን ዋትድ ይሎይዳኮ ዶጎፕተ። ህንተ ግብፀ ቢታፈ ከይዳ ጋላሳፐ ዶምድ፥ ሀች ሀ በሳ ጋካናዉ ጎዳ ቦላ ማካልደታ። 8 ኮሬባ ዙማ ቦላ ጎዳይ ህንተና ይሳናዉ ደንዳና ጋካናዉ ህንተ ጎዳ ይሎይደታ። 9 ጎዳይ ህንተራ ጫቅዳ ጫቆይ ፃፈትዳ ሎቸ ሹቻታ ኤካናዉ ታኒ ዙማ ቦላ ከይዳ ዎደ፥ ያን ካ ሞናነ ሃ ኡዮና ኦይታሙ ጋላስነ ኦይታሙ ቃማ ጋምአስ። 10 ሄሳፈ ጉየ፥ ፆሳ ብራን ፃፈትዳ ናምኡ ሎቸ ሹቻታ ጎዳይ ታዉ እሚስ። ህንተ ዙማ ፃጶን ሺቅዳ ዎደ ታማ ግዶን ጎዳይ ህንተዉ እምዳ ኪታት ሄ ሎቸ ሹቻ ቦላ ፃፈትድ ኡትዶሶና። 11 ኦይታሙ ጋላሳፐነ ቃማፈ ጉየ፥ ጎዳይ ባ ጫቆ ቃላይ ፃፈትዳ ናምኡ ሎቸ ሹቻታ ታዉ እሚስ። 12 ሄሳፈ ጉየ፥ ጎዳይ ታኮ፥ "ኤለሳዳ ሀይሳፈ ዱገ ዎ፤ ኔኒ ግብፀፈ ከስዳ ነ አሳይ ቱንስ፤ ኤንቲ ታ ኪታ ኤሶን አግድ፥ ኩሸን ኦሰትዳ ኤቃ ጎይናናዉ ስምዶሶና" ያግስ።

13 ቃስካ ጎዳይ ታኮ፥ "ታኒ ሀ አሳ በአስ፤ ኤንቲ ቱማ ዎዛና ሙመ አስ። 14 ህዛ ታ ኤንታ ይሶና መላነ ኤንታ ሱን ቢታ ቦላፈ ቁቾና መላ ታና ድጎፋ። ታ ነና ኤንታፈ ምኖነ ዳርያ ካዎተ ከሳና" ያግስ።

15 ታኒ ጫቆ ቃላይ ፃፈትዳ ናምኡ ሎቸ ሹቻታ ታ ኩሸን ኦይካዳ ዙማ ቦላፈ ዎስ፤ ሄ ዎደ ታማ ላጮይ ዙማ ቦላ በንቴስ። 16 ሄ ዎደ ጎዳ፥ ህንተ ፆሳ ቦላ ህንተ ናጋራ ኦዳይሳ በአስ። ህንተ ማራ ምስለን ኦሰትዳ ዎርቃ ኤቃ ጊግስደታ። ጎዳይ፥ ህንተና ኪትዳ ኦግያፐ ኤሶን ሀራ ሶ ስምደታ። 17 ታኒ ታ ኩሸን ኦይክዳ ናምኡ ሎቸ ሹቻታ ሆላዳ ህንተ በእሽን መንስ። 18 ሄሳፈ ጉየ፥ ጎዳ ይሎያናዉ ህንተ እያ ስንን ኢታ ኦሶ ኦድ፥ ናጋራ ኦዳ ግሾ፥ ካሰይሳዳ ኦይታሙ ጋላስነ ኦይታሙ ቃማ ጎዳ ስንን ጉፋናዳ ጋምአስ፤ ሄ ዎደ ታ ካ ማብከ፤ ሃ ኡያብከ። 19 ጎዳይ ህንተ ቦላ ይሎትድ ይሳናዉ ደንድዳ ግሾ ታኒ ያያስ። ሽን ጎዳይ ዛሪድ ታና ስእስ። 20 ቃስ ጎዳይ ይሎትድ አሮናካ ይሳናዉ ኮይስ፤ ሽን ታኒ ሄ ዎደ አሮናስ ዎሳስ። 21 ታኒ ህንተ ናጋራን ኩምዳ ሄ ማራ ምስልያ ኤካዳ፥ ታማን ፁጋስ። እያ ትንቸረ ጋጫዳ ለ ከሳስ፤ ሄ ልያ ዙማፐ ጎግያ ሃራ የዳስ።

22 ቃስ ህንተ ታበራን፥ ማሳሀንነ ቅብሮት-ሀታዋን ጎዳ ይሎይደታ። 23 ጎዳይ ህንተኮ፥ "ብድ፥ ታኒ ህንተዉ እምዳ ቢታ ላትተ" ያግድ፥ ቃደስ-ባርነፈ የድዳ ዎደካ ህንተ ጎዳ፥ ህንተ ፆሳ ኪታ እፅድ ማካልደታ። እያዉ አማነትበከታ ዎይኮ እያ ቃላስ ኪተትበከታ። 24 ታኒ ህንተና ኤርዳ ዎድያፐ ዶምድ፥ ህንተ ጎዳስ ማካልደታ።

25 ጎዳይ ህንተና ይሳና ግዳ ግሾ፥ ታኒ ኦይታሙ ጋላስነ ኦይታሙ ቃማ ጎዳ ስንን ጉፋናዳ ጋምአስ። 26 ታኒ ጎዳ ፆሳኮ ሀይሳዳ ያጋዳ ዎሳስ፤ "አቤት ኡባ ሃርያ ጎዳዉ፥ ኔኒ ነ ግታ ዎልቃን ዎዝዳነ ነ ምኖ ኩሸን ግብፀፈ ከስዳ፥ ነ ላታ ግድዳ ነ አሳ ይሶፋ። 27 ነ አይለታ፥ አብራሃመ፥ ይሳቃነ ያይቆባ ቆፓ፤ ኤንታ ዎዛና ምኖተ፥ ኤንታ ኢታተነ ኤንታ ናጋራ ታይቦፓ። 28 ሄስ ሀኖና አትኮ፥ ኔኒ ኑና ያፐ ከስዳ ግብፀ አሳይ፥ ‘ጎዳይ ኤንታዉ እማና ግዳ ቢታ ገልሳናዉ ዳንዳእቦና ግሾነ ኤንታ እፅዳ ግሾ፥ መላ ቢታን ዎናዉ ኤንታ ከስስ’ ያጋና። 29 ግዶሽን፥ ሀ አሳይ ኔኒ ነ ግታ ዎልቃንነ ነ ምጨትዳ ቀሰን ግብፀፈ ከስዳ ነ ላታ ግድዳ ነ አሳ" ያጋስ።