ዛረ ማፃፋ 19

ባቃትድ አትያ ካታማታ

1 ጎዳይ፥ ነ ፆሳይ ነዉ እምያ ቢታን ደእያ ካዎተታ ይስያ ዎደነ ነ ኤንታ ጎዳዳ፥ ኤንታ ካታማታንነ ኤንታ ኬታን ዱሱ ዶምያ ዎደ፥ 2 ጎዳይ፥ ነ ፆሳይ ላታ ኦድ እምያ ቢታን ደእያ ካታማታፐ ሄ ካታማታ ነዉ ዱማያ። 3 ጎዳይ፥ ነ ፆሳይ ነዉ ላታ ኦድ እምያ ቢታ ሄ ከሳዳ ሻካ። ያታዳ አሰ ዎዳ ኦንካ ሄ ካታማታኮ ኤሶን ባቃትድ አታና መላ ኦገ ጊግሳ።

4 እስ አስ ካሰ ሞርከተ ባይና ደእሽን፥ ኤሮና ባ ላግያ ዎኮ፥ እ ሄ ካታማታፐ እሱዋኮ ባቃትድ ባ ሸምፑዋ አሾ። 5 ናምኡ አሳት ም ቃንፃናዉ ዎራ ብን፥ እሶይ ም ቃንፅሽን፥ ምፈ ካልታ አይፈይ ኮለትድ ሀንኩዋ ዎኮ፥ ዎዳ ኡራይ ሀ ሄ ካታማታፐ እሱዋኮ ባቃትድ፥ ባ ሸምፑዋ አሾ። 6 ባቃትድ አትያ ካታማይ እስን ፃላላ ግድኮ፥ ዎዳ ኡራይ ኤሶን ዎፅድ ጋካናዉ ኦገይ አዱሰ ግድኮ፥ ሱ ዛርያ ማታ ዳቦይ ጎድ ጋክድ፥ ይሎን ደንድድ ሀይቃናዉ በሶና ኡራ ዎናዉ ዳንዳኤስ። እ ባ ላግያ ዎዳይ ካሰ ሞርከተ ደእያ ግሾ ግደና። 7 ህንተ ሄ ካታማታ ዱማይ ዎና መላ ታ ነና ኪተይ ሄሳሳ።

8 ጎዳይ፥ ነ ፆሳይ ካሰ ነ ማይዛታስ ጫቅዳይሳዳ ነ ዛዋ ዳልግስኮነ ነ ማይዛታስ እማና ግዳ ቢታ ኡባ ነዉ እምኮ፥ 9 ሀ ሄ ካታማታ ቦላ ሀራ ሄ ካታማታ ጉጃ። ሀች ታ ነና ኪትያ ኡባ ነ ፖልኮ፥ ጎዳ ነ ፆሳ ዶስኮነ እ ነና ታማርስዳ ኦግያን ምናዳ ደእኮ፥ ሀ ቢታይ ነዉ እመታና። 10 ሄሳ ነ ኦኮ፥ ጎዳይ፥ ነ ፆሳይ ላታ ኦድ ነዉ እምያ ቢታን ፅሎ አሳ ሱ ጉከና፤ ነካ ሱ ጉሳዳ ኦይሸታካ።

11 ሽን እስ አስ ባ ሾሩዋ እፅድ፥ ቆሰት ናግድ እያ ዎድ፥ ሀ ካታማታፐ እሱዋኮ ባቃትኮ፥ 12 እ ደእያ ካታማን ደእያ ጭማት እ ባቃትዳ ካታማፐ ኤህስድ፥ ኩሸ ዛራናዉ ኮየይሳስ አድ እሞ። 13 እያዉ አይባካ ቃቶፋ፤ ነዉ ኡባባይ እንጀታና መላ፥ ፅሎ ሱ ጉስዳ ኡራ እስራኤለ ግዶፈ ድጋ።

ማርካተባ

14 ጎዳይ ነ ፆሳይ ነኒ ላታና መላ እምያ ቢታን፥ በን አሳይ ኤስዳ ጋደ ዛዋ ሾዶፋ።

15 እስ አስ ባላ ኦናዉ እስ ማርካ ፃላል ግደና። ናምኡ ዎይኮ ሄ ማርክ ማርካትን፥ ሄ ሞቶይ ፕርደታናዉ ኮሼስ።

16 እስ አስ ሀራ አስ ዎርዶን ሞትኮ፥ 17 ሞተይስነ ሞተተይስ ናምአይ ጎዳ ስንን፥ ካህነታ ስንንነ ዳይናታ ስንን ኤቆ። 18 ዳይናት ሄ ኦዳ ምንድ ፕልጎ፤ ሄ ኡራይ ባ እሻ ዎርዶን ሞተይስ ቱማ ግድኮ፥ 19 ሄ ሞተተይስ ኤካናዉ ደእያ ሴራ ሞተይስ ሴረቶ። ሄሳዳ ኦዳ፥ ኢታ ኡራ ነ ግዶፈ ድጋ። 20 ሄሳዳ ኦኮ፥ ሀራ አሳይ ሄሳ ስእድ ያያና፤ ሄሳ መላ ኢታ ኦሶይ ዛሪድ ኦሰተና። 21 ሄሳ መላ ኢታ ኦሶ ኦዳይሳስ ቃቶፋ፤ ሸምፖ ግሾ ሸምፖ፤ አይፈ ግሾ አይፈ፤ አቻ ግሾ አቸ፤ ኩሸ ግሾ ኩሸ፤ ገዳ ግሾ ገዳ መን።