ፆሳ ሺቆፐ ድግያ ጋሶታ
1 ሳንጋትዳ ዎይኮ ቃራተትዳ አደይ ጎዳ ሺቁዋ ገሎፖ።
2 ላይማተን የለትዳ አስ ጎዳ ሺቁዋ ገሎፖ። ሀር አቶሽን ታማን የለተ ጋካናዉ፥ እያ ኮቻፈ ኦንካ ጎዳ ሺቁዋ ገሎፖ። 3 አሞነ አስ ግድን ዎይኮ ሞአበ አስ ግድን፥ ጎዳ አሳ ሺቁዋ ገሎፖ። ሀር አቶሽን ታማን የለተ ጋካናዉ ኤንታ አሰ ግድዳ ኦንካ ጎዳ አሳ ሺቁዋ ገሎፖ። 4 ኔኒ ግብፀፈ ከያዳ ብሽን፥ ኤንቲ ካራነ ሃራ ነና ሞክቦኮና። ኤንቲ ማሰጰፆመን ፓቶራ ካታማን ደእያ ብኦራ ናኣ ባላም ነና ባዳና መላ ሻምዶሶና። 5 ጎዳይ፥ ነ ፆሳይ ነና ዶስዳ ግሾ ባላማ ስእቤና፤ እያ ባደ ነዉ አንጆን ላምስ። 6 ነ ደኦ ላይ ኡባን ኤንቲ ሳሮ ዳና መላነ ዱረታና መላ አሞቶፋ። 7 ኤዶመት ነዉ ዳቦ ግድያ ግሾ ኤንታ ካፓ፤ ነ ኤንታ ቢታን በተ አስ ግዳዳ ደእዳ ግሾ ግብፀታ ካፓ። 8 ኤንታ ሄን የለተይ ጎዳ ሺቁዋ ገላናዉ ዳንዳኦሶና።
ጉታ ቱናተፈ ናጎ
9 ነ ሞርከታ ኦላናዉ ከያዳ ዱንካንዳ በሳን ነና ቱናተፈ ናጋ። 10 ቃማ አሙሆን አቱንይ ጉክን፥ እርፃባይ እያ ቦላ ደእያ ኦንካ ጉታፐ ጋፃ ከይድ ያን ጋምኦ። 11 ሳእ ኦማርስያ ዎደ ባ አሳተ ሜጨትድ፥ አው ዉልያ ዎደ ጉታ ስሞ።
12 ነ ዎራ ሼሽ ኡትያ በሲ ጉታፐ ካረን ጊግሳ። 13 ሼሻስ ኡትያ ኦላ ቦክያ ሚሸ ኦላ ሚሸራ ጋዳ ኦይካ፤ ሼሻስ ኡታ ስማዳ ኦላን ቢታ ዛራ። 14 ጎዳይ፥ ነ ፆሳይ ነና ናጋናዉነ ነ ሞርከታ ነ ኩሸን አድ እማናዉ፥ ነ ጉታን ስመረቴስ። እ ያን ሻትያባ በእድ፥ ነና አግድ ስሞና መላ ነ ጉታይ ጌሽ ግዳናዉ ኮሼስ።
ዱማ ዱማ ህገታ
15 ባ ጎዳፐ ባቃትድ፥ ኔኮ ይዳ አይልያ ዛራዳ እያ ጎዳስ እሞፋ። 16 እ ነ ካታማታፐ እሱዋን፥ ባ ኮይዳ በሳን ባ ኮይዳ ዎደ ጋካናዉ ደኦ፤ እያ ኡንኤፋ።
17 እስራኤለ አሳፐ ኦንካ አደ ግድን ዎይኮ ማጫ ግድን፥ ኤቃ ጎይንያ አሳይ ኦይሳዳ ላይማቶፖ። 18 አደ ግድን ዎይኮ ማጫስ ግድን፥ ላይማተን ደምዳ ሚሸ ቃንገ ጋናዉ ጎዳ ነ ፆሳ ኬ ኤሆፖ። ኤንታ ናምኣ ጎዳይ ነ ፆሳይ እፄስ።
19 ህንተ ኮቸ ግድዳ እስራኤለ አሳስ ሚሸ ዎይኮ ካ ዎይኮ ሀራባ ታልአዳ የሎ ኤኮፋ። 20 ሀራ ቢታ አሳፐ የሎ ኤካናዉ ዳንዳኣሳ፤ ሽን ኔኒ ላታናዉ ገልያ ቢታን ነ ኦያባ ጎዳይ፥ ነ ፆሳይ አንጃና መላ ነ ኮቸ ግድዳ እስራኤለ አሳስ የሎራ ታልኦፋ።
21 ጎዳስ፥ ነ ፆሳስ፥ እማናዉ ቃንገትዳባ ጋናዉ ጋምኦፋ። ጎዳይ ነ ፆሳይ ነ ቃንግዳይሳ ኩመ ኔፐ ኮይያ ግሾ፥ ፖሎና እፅኮ ነዉ ናጋራ ግዳና። 22 ሽን ነ ቃንጎና አግኮ ሄስ ናጋራ ግደና። 23 ጎዳስ ነ ፆሳስ፥ እማና ግዳ ነ ዶናን ኦደትዳባ ኔኒ ዶሳን እማና ግዳ ግሾ፥ ነ እንፃርሳን ኦደትዳባ ፖላ።
24 ኔኒ እስ አሳ ዎይነ ጋደ ግዶራ አያ ዎደ ዎይንያፐ ኮይዳ መላ ማ፥ ሽን እያፐ አይባካ ነ ኦይክዳ ሚሸን የጎፋ። 25 እስ አሳ ጋደራ ኔኒ አያ ዎደ ሄ ጋድያን ደእያ ትያፐ ዱዳ ማ፤ ሽን ካፈ ጫካዳ ነ ሶ ኤፎፓ።