ዛረ ማፃፋ 18

ካህነታነ ሌወታ ግሹዋ

1 ሌወ ኮቸ ግድዳ ካህነታስነ አትዳ ኤንታ ኮቻስ እስራኤለ ግዶን ላታ ቢት ባዋ። አሳይ ጎዳስ ሺሽያ ፁሳ ያርሾይ ኤንታ ግሾ ግድያ ግሾ እያ ምሸ ዳና። 2 ኤንታዉ ኤንታ እሻታ ግዶን ላት ዴና፤ ጎዳይ ኤንታዉ ግዳይሳዳ እ ኤንታ ላታ።

3 ኮርማ ዎይኮ ዶርሰ አሳይ ያርሾስ ሺሽዳይሳፈ ካህነታ ግሾይ ሀይሳ፤ ምሳይ፥ ጋጮይነ ኡሎ አሾይ ኤንታዉ እመቶ። 4 ነ ካፈ፥ ዎይንያፐነ ዛይትያፐ ኮይሮ ጋክዳ አይፍያነ ነ ዶርሳ እክስያፐ ባይራ ካህነታስ እማ። 5 ሌወት ጎዳ ሱንን መርናዉ ካህነ ግድድ ኦና መላ ነ ኮቻ ግዶፈ ጎዳይ፥ ነ ፆሳይ ኤንታ ዶርስ።

6 እስ ሌወይ እስራኤለ ቢታን ደእያ እስ ካታማፐ ደንድድ፥ ጎዳይ ዶርያ በሳ ባናዉ ኮይኮ፥ 7 እ ብያ በሳን ደእያ ሌወት ጎዳ ስንን ኤቅድ ኦይሳዳ እካ ጎዳ ባ ፆሳ ስንን ኤቅድ ኦ። 8 ባና ጋክያ ግሹዋ ኤክዳባ ግድኮካ፥ ካህነት ጎኤትያ ኡባ ኤንታራ ግና ሻከትድ ኤኮ።

እፀትዳ ኦሶታ

9 ጎዳይ ነ ፆሳይ እምዳ ቢታ ነ ገልያ ዎደ ሄ ቢታን ደእያ አሳይ ኦያ እፀትዳ ኦሶታ ኦፋ። 10 ባ አደ ናኣ ዎይኮ ማጫ ናእዉ ያርሾስ ታማን ፁግያ ኦንካ ነ ግዶን በንቶፎ። ብት፥ ማራጨ በኤይ፥ ማሮተይ፥ ህግሸይ፥ 11 ሞይትለ በኤይ፥ ሀይቅዳ አሳ አያና ፄገይ፥ ዎይኮ ሀይቅዳ አሳ አያናራ ኦደተይ ነ ግዶን ደኦፖ። 12 ሄሳ መላባ ኦያ ኦንካ ጎዳ ማታን እፀትዳ አስ። ኤንቲ ሄሳ መላ ቱና ኦያ ግሾ፥ ጎዳይ ነ ፆሳይ ሄ ካዎተታ ነ ስንፈ ጎዳና። 13 ሽን ነኒ ጎዳ ነ ፆሳ ስንን ቦረይ ባይናይሳ ግዳ። 14 ነኒ ላታናዉ ብያ ቢታን ደእያ ካዎተት ሙሩነይሳታነ ብተይሳታ፤ ሽን ነ ሄሳ ኦና መላ ጎዳይ ነ ፆሳይ ነና ድግስ።

ፆሳይ ደንና ናብያ

15 ጎዳይ፥ ነ ፆሳይ ነ ኮቻ ግዶፈ ታ መላ ናበ ነዉ ደንና። ነ እ ገይሳ ስአ። 16 ኮሬባ ዙማ ቦላ ነ ሺቅዳ ዎደ ጎዳ ነ ፆሳ ሀይሳዳ ያጋዳ ኦይቻዳሳ፤ "ታ ሀይቆና መላ ጎዳ፥ ታ ፆሳ ግርሳ ዛራዳ ስእከ፤ ሀ ዎልቃማ ታማ ዛራዳ በእከ" ያጋዳሳ።

17 ጎዳይ ታኮ፥ "ኤንቲ ቱማ ግዶሶና። 18 ታ ኤንታ ኮቻ ግዶፈ ነ መላ ናበ ኤንታዉ ደንና፤ ታኒ ታ ቃላ እያ ዶናን ዎና፤ እ፥ ታ ኪትያ ኡባ ኤንታዉ ኦዳና። 19 እ ታ ሱንን ኦድያ ታ ቃላ ስኦና ኦናካ ታ ኦይቻና። 20 ሽን ታ ኪቶናባ ታ ሱንን ኦድያ ዎይኮ ሀራ ፆሳታ ሱንን ኦድያ ሄ ናበይ ሀይቆ" ያግስ።

21 ኔኒ፥ "ናበይ ኦድያ ቃላይ ፆሳፈ ግዶናይሳ ታ አይብን ሻካዳ ኤራኔ?" ያግኮ፥ 22 ሄ ናበይ ጎዳ ሱንን ኦድዳ ቃላይ ፖለቶና እፅኮ፥ ሄስ ጎዳይ ኦድቦና ቃላ ግደይሳ ኤራሳ። ሄ ናበይ ኦድያ ቃላይ ዎርዶ ግድዳ ግሾ እያ ያዮፋ።