ቱናነ ቱና ግዶና ካ
(ሌወ 11:1-47)
1 ህንተ፥ ጎዳ ህንተ ፆሳ ናይታ፤ ሀይቅዳ አሳስ ህንተ አሳተ ጋሮፕተ፤ ህንተ ሁጵያ ቡሉሶፕተ። 2 ህንተ፥ ጎዳ ህንተ ፆሳስ ጌሻ ደረ፤ ጎዳይ ህንተና ባ አሰ ግዳና መላ ቢታን ደእያ አሳ ኡባፈ ባዉ ዶርስ።
3 ኔኒ ቱናባ አይባካ ሞፓ። 4 ነ ማና መሄትነ ዶአት ሀይሳታ፤ ቦር፥ ዶርሰ፥ ዴሸ፥ 5 ዶገ፥ ባቾ፥ ዎሽኤ፥ ዎራ ዴሽ፥ ዋልያ፥ ጋራነ ዙማ ዶርሰ። 6 ሹቁለይ ጳልቀትዳይሳነ ዋሞትያ መሄታነ ዶአታ ኡባ ሚተ። 7 ሽን ሹቁለይ ጳልቀቶናይሳታነ ዋሞቶናይሳታ ሞፓ፤ ሄስካ ግማለ፥ ኤሸነ ጉፓለ። ሀይሳቲ ዋሞቶሶና፥ ሽን ኤንታ ሹቁለይ ጳልቀትቦና ግሾ፥ ኤንቲ ህንተዉ ቱና። 8 ጉዱንስ ሹቁለይ ጳልቀ፥ ሽን ዋሞቶና ግሾ እ ህንተዉ ቱና። እያ አሹዋ ሞፓ፤ እያ ባዉታ ቦቾፍተ።
9 ሃ ግዶን ደእያ መተታ ግዶፈ ህንተ ማናይሳት ሀይሳታ፤ ሞሎ መላ ቀፈይነ ፖቆይ ደእያ ኡባ ሚተ። 10 ሽን ሞሎ መላ ቀፈይነ ፖቆይ ባይናይሳታ ሞፕተ ሄስ ህንተዉ ቱና።
11 ቱና ግዶና ካፎ ኡባ ሚተ። 12 ሽን ካፎታፐ ህንተ ሞና አጋና ካፎት ሀይሳታ፤ አርጋን፥ ባዞ አንኮ፥ ካሬ አንኮ፥ 13 ጵርጮ፥ ፅሎ ኮቸ ኡባ፥ 14 ቆራሰ ኮቸ ኡባ፥ 15 ያንቾ፥ ሃ ካፎ፥ ቃማ ካፎ ኮቸ ኡባ፥ 16 ላፋ ጉቶ፥ ዲድን፥ ሃ ኩቶ፥ 17 ባዞ ጉቶ፥ ሞሎ ካፎ፥ ሶሌ፥ ሀዛዞ፥ 18 ሳብሳ ጌተትያ ካፎ ኮቸ ኡባ፥ አያና ካፎነ ሽርሽቆ። 19 ቀፈራ ደእያ ላፋ መተት ኡባይ ህንተዉ ቱና፤ ኤንታ ሞፕተ። 20 ሽን ቀፈራ ደእያባታፐ ቱና ግዶናይሳታ ሚተ።
21 ኔኒ፥ ጎዳ ነ ፆሳስ ጌሻ አስ ግድያ ግሾ፥ ባዉታ ኡባ ሞፓ። ሄሳ ህንተ ካታማን ደእያ በተ አሳይ ማና መላ ኤንታዉ እማናዉ ዳንዳኤታ፤ ዎይኮ ሀራ ቢታ አሳስ ባይዛናዉ ዳንዳኤታ።
ዴሻ ናአ እያ አየ ማራ ካፋ።
አስራታ እሞ ዎጋ
22 ነ ጋደን ላይን ላይን ካፅያ ካ አይፈ ኡባፈ አስራታ ከሳ። 23 ነ ኡባ ዎደ ጎዳስ ነ ፆሳስ፥ ያሽ ታማራና መላ ባ ሱንይ ፄገታና መላ እ ዶርዳ በሳን፥ ነ ካ፥ ዎይነ ኡሻነ ዛይትያ አስራታ፥ ነ ዶርሳፈነ መህያፐ ባይራ የለትዳይሳ ያን፥ ጎዳ፥ ነ ፆሳ ስንን ማ። 24 ጎዳይ ነ ፆሳይ ባ ሱንይ ፄገታና መላ ዶርዳ በሳይ፥ ነ ደእያ በሳፈ ዳሮ ሃሆ ግድኮ፥ ጎዳይ ነና አንጃና መላ ነ አስራታ ያ ኤፋናዉ ዳንዳኦናባ ግድኮ፥ 25 ሄ አስራታ ባይዛዳ ሚሽያ ጎዳይ፥ ነ ፆሳይ ዶርዳ በሳ ኤፋ። 26 ሄ ሚሽያን ነ ኮይዳ ሚዝ ዎይኮ ዶርሰ ዎይኮ ዎይነ ኡሽ ዎይኮ ሀራ ምኖ ኡሽ ዎይኮ ሀራ ነ ኮይያባ ሻማዳ፥ ነነ ነ ሶ አሳይ ጎዳ፥ ነ ፆሳ ስንን ሄሳ ማዳ ኡፋይታ።
27 ኤንቲ ኔራ ሻከትድ ኤክዳ ሀራ ላት ኤንታዉ ባይና ግሾ፥ ሄሳ ነ ኦያ ዎደ ነ ካታማን ደእያ ሌወታ ዶጎፓ። 28 ሄን ላይን ላይን ነ ካ አስራታ ኤሀዳ ነ ካታማን ሺሻ። 29 ሄሳ ነ ካታማን ደእያ፥ ኔራ ሻክትድ ኤክዳ ሀራ ላት ባይና ሌወት፥ በተ አሳይ፥ ይኦ ናይትነ አምኤት ይድ ሞ። ያትኮ፥ ነ ኦያ ኦሶ ኡባን ጎዳይ፥ ነ ፆሳይ ነና አንጃና።