1 नबूकदनेस्सर राजा ने अपना राज का दुसरा साल मे असो सपनो देख्यो, जेका से ओको मन बोत ही दु:खी हुइ गो अरु उ सोय नी सक्यो. 2 तब राजा ने आज्ञा दी, कि पंडित, तांत्रिक, जादुटोना अरु कसदी पंडित खे बुलायो जाये कि वे राजा खे ओको सपनो बताये; येकालिये वे आया अरु राजा का सामने हजर हुया.✝2:2 उत्पत्ति 41:8 3 तब राजा ने उनका से बोल्यो, "मे ने एक सपनो देख्यो हइ, अरु मरो मन चिंतित हइ कि सपना खे कसो समझु." 4 तब कसदी पंडितहोन ने राजा से अरामी भाषा*2:4 यहा से सातवा अध्याय का आखरी तक प्रयोग करी गइ भाषा इब्रानी नी हुइखे अरामी भाषा हइ मे बोल्यो, "हे राजा, तु हमेशा खुश ऱ्हीहे! अपना दासहोन खे सपनो बता, अरु हम ओको अर्थ बताये." 5 राजा ने कसदी पंडीतहोन खे उत्तर दियो, "मी या आज्ञा दि रो हइ कि अगर तुम अर्थ समेत सपना खे नी बताये ते तुम टुकडा टुकडा कऱ्या जाये, अरु तुमारा घर जलय दीयो जाये. 6 पर अगर तुम अर्थ समेत सपना खे बतय दे ते मरा से अच्छा दान अरु इनाम अरु बडो आदर पाये. येकालिये तुम मेखे अर्थ समेत सपनो बता." 7 उन्हे दुसरी बार बोल्यो, "हे राजा, सपना तरा दासहोन खे बतायो जाये, अरु हम ओको अर्थ समझय दिये." 8 राजा ने उत्तर दियो, "मी निश्चय जानुस हइ कि तुम या बात फक्त टेम टालन का लिये बोली रा हइ; क्युकी तुम समझी चुक्या हुये कि मरो निर्यण पक्को हइ. 9 येकालिये अगर तुम मेखे सपनो नी बताता हुये, ते तुमारा लिये फक्त एक ही दण्ड हइ. अरु तुम या आस करता हुये कि परीस्थिती बदलना तब तक हम राजा का सामने एकमत हुइ खे झुठी अरु बुरी बात बोल्या कर्हे. लेकिन तुम मेखे मरो सपनो बता, तब मी जानी लियु कि तुम मेखे उ सपना को अर्थ भी बतय सकस हइ." 10 कसदी पंडीतहोन ने राजा से बोल्यो, "पृथ्वी भर मे असो कोय इन्सान नी जो राजा का मन कि बात बतय सखे; अरु नी कोय असो राजो, या मुखियो, या हाकिम कभी हुयो हइ जेने कोय पंडीत, या तंत्रिक या कसदी पंडीत से असी बात पुछी हइ. 11 जो बात राजो पुछस हइ, वा भोत कठिन बात हइ, अरु देवताहोन खे छोडिखे अरु कोय या बात राजा खे नी बतय सखे अरु देवता इन्सान जिवन का बिच मे नी ऱ्हे." 12 येका पर राजा नराज हुइ गो, अरु बोत ही घुस्सा हुइखे, बेबीलोन का सब डिमाकवाला दुनियाहोन खे खतम करन की आज्ञा दी दी. 13 अत या आज्ञा निकली, अरु पंडीत दुनियाहोन खे मारना पर था; अरु दुनिया दानिएल अरु ओका सातआला खे ढुढी रो थो कि वे भी माऱ्या कऱ्यो जाह्ये.

14 तब दानिएल ने, राजा का रखवाला को मुखिया अर्योक से, जो बेबीलोन का डिमाकवाला दुनियाहोन खे मारन का लिये निकल्यो थो, सोच बिचारकरी खे अरु दिमाकवाला का सात बोल्यो; 15 अरु राजा को अधिकारी अर्योक से पुछन लग्यो, "या आज्ञा राजा का तरप से असी कठुरता का सात क्यु निकलस?" तब अर्योक ने दानिएल खे येको भेद बतय दियो. 16 तब दानिएल ने अंदर जयखे राजा से बिनती करी, कि ओका लिये कोय टेम ठहरायो जाये, ताकी उ राजा खे सपना को अर्थ बतय सखे. 17 तब दानिएल ने अपना घर जयखे, अपना सात का हनन्याह, मीशाएल, अरु अजर्याह खे यो हाल बतयखे बोल्यो, 18 या भेद का बारे मे स्वर्ग का परमेश्वर कि दया का लिये यो बोलीखे प्रार्थना कर, कि बेबीलोन का अरु सब पंडीतहोन दुनियाहोन का सात, दानिएल अरु ओका सात का भी खतम नी कऱ्यो जाये. 19 तब उ भेद दानिएल खे रात का टेम दर्शन का वजेसे प्रगट कऱ्यो गयो. तब दानिएल ने स्वर्ग का परमेश्वर खे यो बोलीखे धन्यवाद कऱ्यो, 20 "परमेश्वर को नाम जमाना से जमाना तक धन्य हइ;

क्युकी डिमाक अरु पराक्रम दानिएल को हइ.

21 टेमहोन अरु मोसमहोन खे उही बदलस हइ;

राजाहोन को अस्त अरु उदय भी उही

करस हइ;

डिमाकवालाहोन खे डिमाक अरु समझवाला

खे समझ भी उही देस हइ;

22 उही लुकी अरु दबी बातहोन खे प्रगट करस हइ;

उ जानस हइ कि अंधारा मे का हइ, अरु

ओका सात हमेशा उजालो बन्यो ऱ्हेस हइ.

23 हे मरा बापदादाहोन को परमेश्वर,

मी तरो धन्यवाद अरु स्तुति करुस हइ,

क्युकी तोने मेखे डिमाक अरु शक्ति दी हइ,

अरु जो लुकी बात को खोलनो हम दुनियाहोन ने

तरा से माग्यो थो,

ओखे तोने मरा पर प्रगट कऱ्यो हइ,

तोने हम खे राजा कि बात बतय हइ."

24 तब दानिएल ने अर्योक का पास, जेने राजा ने बेबीलोन का पंडीत दुनियाहोन खे खतम करन का लिये ठहरायो थो, अंदर जयखे बोल्यो, "बेबीलोन का पंडीत दुनियाहोन खे खतम नी करनु, मेखे राजा का सामने अंदर ली चल, मी अर्थ बतायु." 25 तब अर्योक ने दानिएल खे राजा का सामने झरदी अंदर ली जयखे ओका से बोल्यो, "यहूदी बन्दीहोन मे से एक इन्सान मेखे मिल्यो हइ, जो राजा खे सपना को अर्थ बतास." 26 राजा ने दानिएल से, जेको नाम बेलतशस्सर भी थो, पुछ्यो, "का तरा मे अतनी शक्ति हइ कि जो सपनो मे ने देख्यो हइ, ओखे अर्थ समेत मेखे बता?" 27 दानिएल ने राजा खे उत्तर दियो, जो भेद राजो पुछस हइ, वे नी ते पंडित, नी तंत्रिक, नी ज्योतिषि, नी भविष्य बतानवाला राजा खे बतय सकस हइ, 28 पन लुकी बात खे प्रगटकर्ता परमेश्वर स्वर्ग मे हइ; अरु ओने नबूकदनेस्सर राजा खे बतायो हइ कि आखरी का दिनहोन मे का का होनवालो हइ. तरो सपनो अरु जो कुछ तोने पलंग पर सोता टेम देख्यो, उ यो हइ : 29 हे राजा, जब तोखे पलंग पर यो बिचार आयो कि भविष्य मे का का होनवालो हइ, तब लुकी बात खे खोलनवाला ने तोखे बतायो कि का का होनवालो हइ. 30 मरा पर या लुकी बात येका कारन नी खोल्यो गयो कि मी अरु सब इन्सानहोन से जादा डिमाकआलो हइ, पन फक्त यो कारन खोल्यो गयो हइ कि सपना को अर्थ राजा खे बतायो जाये, अरु तू अपना मन का बिचार समझी सखे. 31 हे राजा, जब तू देखी रो थो, तब एक बडी मुर्ती दिखय पडी, अरु वा मुर्ती जो तरा सामने खडी थी, वा लम्बी चौडी थी; ओकी चमक भोत थी, अरु ओको अरुप भयंकर थो. 32 वा मुर्ती को माथो तो अच्छो सोना को थो, ओकी छाती अरु भुंजा चांदी का, ओको पेट अरु जांग पीतल का, 33 ओकी टांग लोखोंड का अरु ओका पाय कुछ तो लोखोंड का अरु कुछ मट्टी का था. 34 फिर देखता, तोने का देख्यो, कि एक फत्थर ने, बिना कोय का खोद्यो, खुद ही खुद उखडीखे वा मुर्ती का पायहोन पर लगीखे जो लोखोंड अरु मट्टी का था, उनखे चुर चुर करी डाल्यो. 35 तब लोखोंड, मट्टी, पीतल, चांदी अरु सोनो भी सब चुर चुर हुइ गा, अरु धुला मे खलिहानहोन का भुसा का जसो हवा से असा उडी गया कि उनको कही पतो नी ऱ्हीयो; अरु उ फत्थर जो मुरती पर लग्यो थो, वा बडी टेकली बनीखे सब पृथ्वी मे फैली गइ. 36 "सपनो तो योही हुयो; अरु अब हम ओको अर्थ राजा खे समझय देस हइ. 37 हे राजा, तू तो सब राजाहोन मे महान हइ, क्युकी स्वर्ग का परमेश्वर से तोखे राज्य, सामर्थ्य, शक्ति अरु महीमा दी हइ, 38 अरु जहा कही इन्सान पायो जास हइ, वहा ओने वे सब खे, अरु मैदान का जीवजन्तु, अरु बद्दल कि चिडीहोन अरु जनवरहोन भी तरा बस मे करी दिये हइ; अरु तोखे वे सब को अधिकारी ठहरायो हइ. यो सोना को माथो तू ही हइ. 39 तरा बाद एक राज अरु उदय हुये जो तरा से छोटो हुये; फिर एक अरु तिसरो पीतल को राज हुये जेमे सब पृथ्वी अय जाये. 40 चौथो राज लोखोंड को तुल्य मजबूत हुये; लोखोंड से ते सब चिजहोन चुर चुर हुइ जास अरु पिसी जास हइ; येकालिये जो प्रकार लोखोंड से वे सब कुचल्यो जास हइ, उही प्रकार, उ चौथा राज से सब कुछ चुर चुर हुइखे पिस्यो जाये. 41 तोने जो मुरती का पायहोन अरु ओकी उगलीहोन खे देख, जो कुछ कुभार कि मट्टी की अरु कुछ लोखोंड को थो, येका से उ चोथो राज्य बाट्यो हुयो हुये; तेभी ओमे लोखोंड को कडापन ऱ्हे, जसो कि तोने कुम्हार कि मट्टी का सात लोखोंड भी मिल्यो हुयो देख्यो थो. 42 जसी पायहोन कि उगलिहोन कुछ तो लोखोंड का अरु कुछ मट्टी का था, येको अर्थ यो हइ, कि उ राज्य कुछ तो मजबुत अरु कुछ कमजोर*2:42 भुरभुरा हुये. 43 तोने जो लोखोंड खे कुभार कि मट्टी का सात मिल्यो हुयो देख्यो, येको अर्थ यो हइ, कि उ राज्य का दुनिया एक दुसरा इन्सानहोन से*2:43 विनाशी इन्सानहोन का कुल से मिली जुली खे ऱ्हेस, पन जसो लोखोंड मट्टी का सात मेल नी खाय, असो ही वे भी एक नी बन्या ऱ्हेस. 44 वे राजाहोन का दिनहोन मे स्वर्ग को परमेश्वर, एक असो राज्य उदय करे जो आखरी काल तक नी टुटे, अरु नी उ कोय दुसरा दुनिया का हात मे कऱ्यो जाये. वरन उ वे सब राजाहोन खे चुर चुर करे, अरु उनको खतमो करे; अरु उ हमेशा स्थिर र्हे : 45 जसो तोने देख्यो कि एक फत्थर कोय का हात का बिना खोद्यी टेकली मे से उखडे, अरु ओने लोखोंड, पीतल, मट्टी, चादी, अरु सोना खे चुर चुर कऱ्यो, या रीति महान परमेश्वर ने राजा खे बतायो हइ कि येका बाद का का होनवालो हइ. नी सपना मे अरु नी ओका अर्थ मे कुछ सन्देह हइ."

46 अतनो सुनीखे नबूकदनेस्सर राजा झुकि खे दानिएल खे प्रनाम कऱ्यो, अरु आज्ञा दी कि ओखे भेट चेडा, अरु ओका सामने बासवाली धूप जला. 47 फिर राजा ने दानिएल से बोल्यो, "सच तो यो हइ कि तुम दुनियाहोन को परमेश्वर, सब इश्वरहोन को इश्वर, राजाहोन को राजो अरु लुकि बात खे खोलनवालो हइ, येकालिये तू यो लुकि बात प्रगट करी पायो." 48 तब राजा ने दानिएल को पद बडो कऱ्यो, अरु ओखे बोत सा बडो दान दियो; अरु या आज्ञा दी कि उ बेबीलोन का सब देशहोन पर हाकिम अरु बेबीलोन का सब पंडित दुनियाहोन पर मुख्य मुखियो बन्यो. 49 तब दानिएल का बिनती करना से राजा ने शद्रक, मेशक, अरु अबेदनगो खे बेबीलोन का देश का काम का उपर नियुक्त करी दियो; पन दानिएल खुद राजा का दरबार मे ऱ्ही करतो थो.