1 Al e Izraelcura phaglje e Devleso zapovest savesa vaćarda lenđe te ni len khanči so trubuja te avol uništime taro Jerihon: o Ahan čhavo e Karmijaso, unuko e Zavdijaso thaj paraunuko e Zareso, tare Judaso pleme, lija nesave predmetura save sesa odredime bašo uništipe pa o GOSPOD but holajlo pe Izraelcura.

2 O Isus Navin bičhalda e manušen andaro Jerihon ano foro Aj, savo sasa paše o Bet-Aven, istočno taro Betel thaj phenda lenđe: "Džan thaj dićhen i phuv."

Tegani von đele thaj dikhlje o foro Aj.

3 Kana irisajle ko Isus Navin, vaćarde lese: "Ni trubul sa i vojska te džal ano Aj. Bičhal duj il trin milje muršen te prelen o foro. Ma umori sa e vojska golese so odori isi zala manuša."

4 Gija odori đele paše trin milje (3 000) džene, al morajle te našen angle Ajanura. 5 E Ajanura tradije e Izraelcuren tari forosi kapija sa dži o than kaj phađen pe e bara thaj mudarde tranda thaj šoven (36) dženen pe bregura. Golese e narodoso ilo phađilo thaj sesa razočarime.

6 Tegani o Isus Navin thaj e izraelska starešine pharade e šeja pe peste thaj pele mujesa dži i phuv anglo Kovčego e GOSPODESO, pe pumare šore čhorde praho thaj gija ačhile dži ki rat.

7 O Isus Navin vaćarda: "Jao GOSPODE, Devla! Sose nakhadan kale narodo prekali len o Jordan? Dal ka de amen ane vasta e Amorejcurenđe te mudaren amen? Kaj te avola bax te ačhasa ki aver rig e Jordanesi! 8 Gospode, so te phenav akana kana o Izrael irisada po dumo angle pe dušmanura? 9 Kana e Hanaancura thaj avera manuša tari kaja phuv šunen kava, ka aven trujal amende thaj ka kosen amaro alav tari phuv. Tegani, so ka ćere baše ćiro baro alav?"

10 O GOSPOD phenda e Isusese e Navinese: "Ušti upre! Sose pašljiljan tele mujesa dži i phuv? 11 O Izrael grešisada. Phaglje mingro Savez baše savo phendem lenđe te ićaren le. Lije tare predmetura save sesa odredime bašo uništipe thaj čhute len maškare pire stvara. Thaj na samo so čorde, von i xoxade. 12 E Izraelcura naštine te suprostavin pe pire dušmanurenđe, nego irin po dumo angle lende, golese von si akana odredime mudarimase. Ni ka avav vadži tumencar te ni uništisaden kova so si tumende, a so sasa odredimo bašo uništipe.

13 Ušti, posveti e manušen thaj vaćar lenđe: ‘Posvetin tumen za theara, golese so gija phenol o GOSPOD, o Dol e Izraeleso: Izraele, maškar tute si kova so si odredime uništimase. Dži kaj ni crde gova, ni ka šaj te suprostavi tut će dušmanurenđe.

14 Sabalje aven pleme palo pleme. Taro pleme savo o GOSPOD biril, te aven familija pali familija. Tari familija savi o GOSPOD biril, te aven ćher palo ćher. A taro ćher savo o GOSPOD biril, nek avol manuš palo manuš. 15 O manuš kaste araćhol pe kova so sasa odredime uništimase, te phabarol pe pi lomača sa kolesa so isi le, golese so phaglja e GOSPODESO savez thaj ćerda ladžutni bući ano Izrael.’"

16 O Isus Navin uštilo rano ki sabalin thaj ikalda taro Izrael pleme palo pleme thaj sasa birimo e Judaso pleme. 17 Andare Judaso pleme ikalda familija pali familija thaj sasa birime i familija e Zarescurenđi. O Isus Navin ikalda i familija e Zarescurenđi, ćher palo ćher thaj sasa birimo e Zavdijeso ćher. 18 O Isus Navin ikalda e Zavdijaso ćher, manuše pale manuše thaj sasa birime o Ahan, o čhavo e Karmijaso, unuko e Zavdijaso thaj paraunuko e Zareso, tare Judaso pleme.

19 O Isus Navin phenda e Ahanese: "Mo čhavo, de slava e GOSPODESE, e Izraelese Devlese thaj priznaji lese. Vaćar manđe so ćerdan. Ma garav khanči!"

20 O Ahan phenda lese: "Čačipe si! Me sem gova savo grešisada protiv o GOSPOD, o Dol e Izraeleso. Akh so ćerdem: 21 Kana dikhljem lačho vavilonsko ogrtači ane predmetura save lijam, duj kila srebro thaj opašo kilo zlato, xalja len mi jakh thaj lijem len. Ek, sa si prahome ano mingro šatori, a o srebro si otelal."

22 O Isus Navin bičhalda e manušen save prastije dži o šatori. Sa sasa odori garado ano šatori, a o srebro otelal. 23 Von lije gova taro šatori, ande e Isusese e Navinese thaj sa e Izraelcurenđe thaj čhute anglo GOSPOD.

24 Tegani o Isus Navin thaj sa o Izrael lesa lije e Ahane, e Zarese paraunuko, o srebro, o ogrtači thaj o zlato, lese čhaven thaj čhejen, lese guruven, e heren thaj e bakren, leso šatori thaj sa so sasa le thaj inđarde len ani dolina Ahor.

25 O Isus Navin pučlja le: "Sose čhutan amen ano bilačhipe? Avđive o GOSPOD tut ka čhuvol ano bilačhipe!"

Pale gova sa e Izraelcura čhudije bara pe leste thaj pe lesi familija sa dži kaj ni mudarde len thaj pale gova phabarde len ki lomača. 26 Po Ahan čhudije but bara, save ačhon i avđive. Tegani o GOSPOD ačhada te holjavol. Golese gova than i avđive akharol pe dolina Ahor.*