1 E Efremcura akharde pe vojska te ćiden pe, nakhle prekali len o Jordan, avile ano foro Cafon thaj phende e Jeftajese: "Sose đeljan ano maripe e Amoncurencar, a amen ni akhardan te dža tusa? Ka phabara ćo ćher thaj tut ane leste!"

2 O Jeftaj phenda lenđe: "Me thaj mo narodo sama ane bare čingara e Amoncurencar. Akhardem tumen, al tumen ni aviljen te pomožin manđe. 3 Kana dikhljem so ni ka aven te pomožin manđe, lijem mo džuvdipe ane mingre vasta thaj korkoro đeljem pe Amoncura, thaj o GOSPOD predija len manđe ane vasta. Tegani, sose aviljen avđive te napadin man?"

4 Gija o Jeftaj ćidija sa Gilađanuren thaj čalada po Efrem. E Gilađanura pobedisade e Efremcuren, golese so e Efremcura phende: "Tumen e Gilađanura sen otpadnikura taro pleme e Efremeso thaj e Manasijaso."

5 E Gilađanura prelije e plitka thana paši len o Jordan save inđarena premalo Efrem. Gija, kana bi nesavo Efremco našola thaj phenola: "Mućhen man te nakhav prekal," e Gilađanura bi pučena le: "Tu li san Efremco?" Ako bi kava vaćarola: "Naj sem," 6 e Gilađanura bi vaćarena lese: "Šukar, vaćar ‘šibolet’." Ako bi kava phenola "sibolet", golese so naštine te vaćarol šukar gova lafi, dolena bi le thaj bi mudarena le ke gola plitka thana paši len o Jordan. Ane gova vreme gija sesa mudarde saranda thaj duj milje (42 000) Efremcura.

7 O Jeftaj sasa sudija ano Izrael šov berš. Pale gova, o Jeftaj taro Gilad mulo thaj sasa prahome ano jekh giladsko foro.

8 Palo Jeftaj, sudija ano Izrael sasa o Ivcan andaro Vitlejem. 9 Sasa le tranda (30) čhave thaj tranda čheja. Pe čhejen dija ke manuša save ni sesa tari lesi familija, a pe čhavenđe anda tranda terne čhejen save isto ni sesa andari lesi familija. O Ivcan sasa sudija ano Izrael efta berš.

10 Tegani o Ivcan mulo thaj sasa prahome ano Vitlejem.

11 Palo Ivcan, sudija sasa o Elon o Zavulonco, savo sudisada ano Izrael deš berš.

12 Tegani o Elon mulo thaj sasa prahome ano Ajalon, ani phuv e Zavulonesi.

13 Palo Elon, sudija ano Izrael sasa o Avdon, čhavo e Hileleso, andaro foro Piraton. 14 Sasa le saranda (40) čhave thaj tranda unukura, save jašisade pe eftavardeš (70) hera. O Avdon, o čhavo e Hileleso, sudisada ano Izrael ohto berš.

15 Tegani o Avdon mulo thaj sasa prahome ano Piraton, ani phuv e Efremesi, ane bregura e Amalečanurenđe.