1 Gova đive i Devora thaj o Varak, o čhavo e Avinoameso, đilabije kaja đili:

2 "Kana e vođe inđaren o Izrael ano maripe,

a o narodo korkoro manđol te džal lencar,

blagoslovin e GOSPODE!"

3 "Šunen, caronalen,

šunen, vladaralen!

Ka đilabav e GOSPODESE,

ka đilabav psalmura e GOSPODESE,

e Izraelese Devlese.

4 GOSPODE, kana ikliljan taro Seir,

kana đeljan anglal tari phuv i edomsko,

i phuv tresisajli, taro nebo bršnd pelo,

e oblakura paja čhorde.

5 E bregura tresisade anglo GOSPOD o Sinajsko,

anglo GOSPOD, anglo Dol e Izraeleso.

6 Ano vreme e Šamgareso, e Anatese čhaveso,

ane đivesa e Jaelaće, e glavna droma ačhile pusta,

a e putnikura đele avere dromencar.

7 E izraelska gava ačhile pusta,

dži kana me, i Devora, ni uštiljem,

dži kana ni uštiljem sar dej ano Izrael.

8 Kana birisade pese neve devlen*,

o maripe avilo ke forose kapije,

al nijekh štito niti koplje ni arakhadilo

maškare saranda (40 000) milje ano Izrael.

9 Mingro ilo si e Izraelese vođencar,

kolencar save manđen te džan ano maripe.

Blagoslovin e GOSPODE!

10 Den gođi tumen so jašin pe parne hernja,

tumen so bešen pe kovle ponjave,

thaj tumen so phiren dromesa.

11 Šunen o glaso e pevačengo ke bunara.

Von e GOSPODESE pobede đinen,

pobede baše lese gava ano Izrael.

Tegani o narodo e GOSPODESO ulilo

dži ki kapija e forosi.

12 Ušti, ušti, taro sojipe, Devoro!

Ušti, ušti, taro sojipe thaj đilabe i đili!

Ušti, Varakona!

Phande će dušmanuren, čhaveja e Avinoameso!

13 Tegani kola so ačhile, ulile ke šorutne,

o narodo e GOSPODESO ulilo mande sar ratnikura.

14 Taro Efremeso pleme avile kola kaso koreno si ano Amalek,

pale tute sasa but manuša tare Venijamineso pleme.

Tare Mahirese čhave iklile e vođe,

a tare Zavulonese čhave, e zapovednikura.

15 E Devorasa sesa e šorutne e Isaharese.

Va, e Isahareso pleme sasa e Varakosa,

thaj pale leste prastija ani dolina.

E čete e Ruvimese dije but gođi

dal te džan il na.

16 Sose ačhiljan maškare bakre,

te šune o bašalipe maškare stadura?

E čete e Ruvimese, dije but gođi

dal te džan il na.

17 E Giladeso pleme ačhilo tari koja rig e Jordanesi.

A sose e Daneso pleme ađućarol vadži paše čamcura?

E Asireso pleme bešol ki morsko obala,

thaj ačhilo ane pire luke.

18 Al e Zavuloneso narodo čhuta po džuvdipe ki kocka,

gija i e Neftalimeso pleme ke poljura e marimase.

19 E carura avile thaj marde pe.

E hanaanska carura marde pe

pašo Taanah, paše paja e Megidose,

al ni zala srebro ni inđarde sar pleno.

20 Taro nebo e čerenja borisajle,

tare pe droma marde pe protiv o Sisra.

21 Inđarda len o potoko o Kišon,

o but purano potoko o Kišon.

Dža zurale, dušo mingrije!

22 Tegani e kopite e grastenđe šundile,

e zurale prastimasa jurin e zurale grasta e Sisrase!

23 O anđelo e GOSPODESO vaćarda:

‘Den armaja o foro o Meroz!

Den armaja, den armaja lese manušen

golese so ni avile ano pomoć e GOSPODESE,

ano pomoć e GOSPODESE protiv e ratnikura.’

24 Nek avol blagoslovime maškare džuvlja

i Jaela, i romni e Heveresi e Kenejcosi,

blagoslovimi maškare sa e džuvlja save bešen ane šatora.

25 O Sisra manglja paj, a voj thud čhorda lese,

ćiral anda lese ano carsko čaro.

26 Ano levo va sasa la šatorsko ćilo,

a ano desno kovačko čekići.

Čalada e Sisra thaj leso šoro phađilo,

pusada thaj pharada leso šoro.

27 Vov pelo angle laće pingre,

pelo thaj ačhilo te pašljol.

Pelo angle laće pingre,

thaj kaj pelo, gothe mulo.

28 Taro džamo dikhlja e Sisrasi dej,

thaj pale džamose rešetke rojindoj vaćarda:

‘Sose leso vordon vadži ni avol?

Sose kasnil e vordoneso šunipe?’

29 Emgođaver džuvlja vaćaren laće,

a voj ane peste palem vaćarol:

30 ‘Šaj arakhlje o pleno thaj akana ulaven le,

po jekh il po duj džuvlja dži jekhese,

thaj šarime šeja bašo Sisra,

šarime khuvdo ogrtači,

duj dikhle, šarime thaj khuvde

e pobednikosi kor te krasil.’

31 Gija nek mudardon sa ćire dušmanura, GOSPODE!

A kola save manđen tut, nek aven sar kham

kana uštol ane piro emzuralo sjaj."

Pale gova ani phuv sasa mir saranda (40) berš.