Êxodo 2

मूसा अन जनम

1 लेवी इन घराना अन ऊंद मंळसा ऊंद लेवी वंश इन आर्त इन से मदा माळ कोंडुन. 2 ✝2:2 प्रेरितगोळ 7:20; इब्रानिगोळ 11:23आक आर्त व्‍हाट्‍टा दी ईत्‍तुर अदिक आक इक ऊंद पार पैदा आदुन; अदिक ईद नोळकु कि ई चिग्‍द सुंदर आन, आऊक आव मुर तिंगुळ ताका होचकोमकु ईटदुर. 3 याग आक आऊक मात्‍त होचकोमकु ईट सकीदील आग आऊन साटी सरकंडागोळ्‍द ऊंद फुट्टी तनकु, अदुर मा चिक्‍कन मुण्‍ण अदिक डांबर हचदुर, अदिक अदुर दा पार उक ईटकु नील गांगा अन किनारा मा काड्डागोळ्‍द न्‍याड्या बिटकु बंदुर. 4 आ पार उन आकतींग दुर निदुरकु ईत्‍तुर अदिक नोळोर कि आऊन सांगुळ येन आगतद.

5 आग फिरौन उन पोर मय तोळोर साटी नील हेसुर इन गांगा अन किनारा मा बंदुर. आकिन दासीगितेर गांगा अन किनारा-किनारा टेटाळली हतदुर. आग आक काड्डागोळ बीच दा फुट्टी इक नोळकु तान दासगीत इक अदरी तरोर साटी कळुदुर. 6 याग आक अदरी तेरूकु नोळदुर कि ऊंद वर्लतेला चिग्‍द आद, आग आक इक दया बत्‍त अदिक आक अंदुर, "ईव रा यातारा इब्री आर्त इन चिग्‍द आगीदान." 7 आग चिग्‍द उन आकतींग फिरौन उन पोर इन से अंदुर, "येन ना होगकु इब्री आर्तेर दा टु यातारा आर्त इक नीन हात्‍ती कारूकु तराईन, जो नीन साटी चिग्‍द उक हाल कुळ्‍सतोगुल?" 8 फिरौन उन पोर अंदुर, "होग." आग पोर होगकु चिग्‍द उन मोय इक कारूकु तंदुर. 9 फिरौन उन पोर आकिन से अंदुर, "नी ई चिग्‍द उक ओतकु नान साटी हाल कुळ्‍सतोग, अदिक ना नीनी मजदूरी कोळाईन." आग आ आर्त चिग्‍द उक ओतकु हाल कुळ्‍सली हतदुर. 10 याग चिग्‍द थ्‍वाळासा धोड्‍डेव आदुन आग आक आऊक फिरौन उन पोर इन हात्‍ती ओतुर, अदिक आव आकिन पार ठहरूसदुन; अदिक आक ईद अंदकु आऊन हेसुर मूसा ईटदुर, "ना ईऊक नीर दा टु तेगदिदीन."

मूसा अन मिद्दान द्‍याश इक ओळोद

11 ✝ 2:11 इब्रानिगोळ 11:24; प्रेरितगोळ 7:23-28 हींग आत कि याग मूसा हारोदव आदुन, आ दिनगोळ दा आव व्‍हार्या तान वार्ट-बन्‍धुगोळ हात्‍ती होगकु आंदुर दुखगोळ मा नजर हाक्कदुन; आग आव नोळदुन कि ऊंद मिस्त्री मंळसा आऊन ऊंद इब्री वार्ट उक बडेत्‍यान. 12 आव ईत आत नोळदुन कि याऊ हैलेच, रा आ मिस्त्री मंळसा अक कोंद बुट्‍टुन अदिक धुळा दा मुच्‍च बुट्‍टुन.

13 बाक दुसरा दिशी व्‍हार्या होगकु आव नोळदुन कि येढ्‍ढ इब्री मंळसा आपस दा बडाबडी माळेत्‍यार. आव अपराधी से अंदुन, "नी तान वार्ट उक येती बडुत्‍या?" 14 आव अंदुन, "याव नीनी नाम लॉकुर मा हाकिम अदिक न्‍यायी ठहरूसदुन? याता प्रकार देल नी मिस्त्री मंळसा अक कोंद बुट्‍ट, येन हांगा नी नानी भी कोन्‍नोद चाहासत्‍या?" आग मूसा ईद विचार माळकु अंजेदुन, "निश्‍चय ई मात खुल्‍सेग्‍याद." 15 ✝2:15 प्रेरितगोळ 7:29; इब्रानिगोळ 11:27याग फिरौन ई मात केळदुन आग मूसा अक कोन्‍नोद युक्‍ति माळदुन.

लेकीन मूसा फिरौन उन मुंदु टु ओळदुन, अदिक मिद्यान द्‍याश दा होगकु ईरली कुरतुन; अदिक आव अल ऊंद भाय इन हात्‍ती कुर्तोदुन. 16 मिद्यान इन याजक उन येळ पोरगोळ ईरोर; अदिक आंदुर अल बंदकु नीर तुमली हतदुर कि डोनी दा तुमकु तान आप्‍प उन म्यांडा अदिक मर्रगोळी कुळसुल. 17 आग चरवाहागोळ बंदकु आंदरी हटुसली हतदुर; इदुर मा मूसा निदुरकु आंदुर सहायता माळदुन, अदिक म्यांडा अदिक मर्रगोळी नीर कुळ्‍सदुन. 18 याग आंदुर तान आप्‍प रूएल उन हात्‍ती वापस बंदुर, आग आव आंदुर से केळदुन, "येन कारण आद कि ईंद नीव राटनेरी वापस होट बंदीर." 19 आंदुर अंदुर, "ऊंद मिस्त्री मंळसा नामी चरवाहगोळ कय दा टु बिळ्सदुन, अदिक नाम साटी हापाळ नीर तुमकु म्यांडा अदिक मर्रगोळी कुळ्‍सदुन." 20 आग आव तान पोरगोळ से अंदुन, "आव मंळसा येल आन? नीव आऊक येती बिटकु बंदीर? आऊक कारूकु तरी कि आव भोजन माळ्‍यान." 21 अदिक मूसा आ मंळसा अन सांगुळ ईरली तयार आदुन. आव आऊन से तान पोर सिप्पोरा अन मदा माळ बुट्‍टुन. 22 आक इक ऊंद पार पैदा आदुन, आग मूसा ईद अंदकु, "ना दुसरा द्‍याश दा परदेशी आईन," आऊन हेसुर गेर्शोम ईटदुन.

23 हापाळ दिन बितुसदुर बाद्‍दा मिस्त्र अन राजा सोतोदुन. इस्त्राएली कठिन स्यावा अन कारण राहत इन श्वास ताकोमली कुरतुर, अदिक कारूली कुरतुर, अदिक आंदुर दुहाई जो कठिन स्‍यावा अन कारण आत अद परमेश्वर ताका पोहचुस्त. 24 ✝2:24 उत्पत्ति 15:13,14परमेश्वर आंदुर तकलीफ केळकु तान वाचा अक, जो आव अब्राहम, इसहाक, अदिक याकूब उन सांगुळ कटीदुन, याद माळदुन. 25 अदिक परमेश्वर इस्त्राएलीगोळ मा नजर माळकु आंदुर मा चित्त हचदुन.