1 बाक यहोवा मूसा से अंदुन, "नी हारून, नादाब, अबीहू, अदिक इस्त्राएलीगोळ्द सत्तर स्याणागोळ समेत यहोवा अन हात्ती म्याकुच बंदकु दुर टु दण्डवत माळेत. 2 सिर्फ मूसा यहोवा अन हात्ती बरूल; लेकीन आंदुर हात्ती बरबाळुल, अदिक दुसरा लॉकुर आऊन सांगुळ म्याकुच बरबाळुल."

3 मूसा लॉकुर हात्ती होगकु यहोवा अन सप्पा मातगोळ अदिक सप्पा नियम केळ्स बुट्टुन. आग सप्पा लॉकुर ऊंद स्वर दा माताळ कुरतुर, "यास मातगोळ यहोवा अंदान आ सप्पा मातगोळी नाव मान्सेव." 4 ✝24:4 यहोशू 4:3आग मूसा यहोवा अन सप्पा वचन लिख्स बुट्टुन; अदिक हुंजकुका येदकु पहाळ इन ल्यालमा ऊंद वेदी अदिक इस्त्राएल इन हन्नेळ गोत्रगोळ अनुसार हन्नेळ खम्भागोळ भी माळसुसदुन. 5 आग आव हापाळ इस्त्राएली जवान मंळसागोळी कळुदुन, यार यहोवा अन साटी होमबली अदिक वस्तागोळ्द मेलबली येर्सदुर. 6 अदिक मूसा आर्धा रक्ता हुडुकु वाटी दा ईटदुन, अदिक आर्धा वेदी मा सिप्स बुट्टुन. 7 आग वाचा अन किताब हुडुकु लॉकुरी वाचुसकु केळ्सदुन; अदरी केळकु आंदुर अंदुर, "जो येनारा यहोवा अंदान आ सप्पा मातगोळी नाव माळेव, अदिक आऊन आग्या मान्सेव." 8 ✝24:8 मत्ती 26:28; १ कुरिन्थि 11:25आग मूसा रक्ता हुडुकु लॉकुर मा सिप्स बुट्टुन, अदिक आंदुर से अंदुन, "नोळी, ईद आ वाचा अन रक्ता हुन, यदरी यहोवा ई सप्पा वचनगोळ मा नीम सांगुळ कट्यान."

9 आग मूसा, हारून, नादाब, अबीहू अदिक इस्त्राएलीगोळ्द सत्तर स्याणा लॉकुर म्याकुच होदुर, 10 अदिक इस्त्राएल इन परमेश्वर उन दर्शन माळदुर; अदिक आऊन काल दिशी नीलमणि इन चौरंग घाई येनतरी ईरोद, जो आकाश इन घाई का स्वच्छ ईरोद. 11 अदिक आव इस्त्राएलीगोळ्द प्रधानगोळ मा कय वाळुसीदील; आग आंदुर परमेश्वर उन दर्शन माळदुर, अदिक तिंदुर कुळदुर.

12 आग यहोवा मूसा से अंदुन, "पहाळी मा नान हात्ती येरकु बा, अदिक अल्या ईर; अदिक ना नीनी कल्लगोळ्द पाटीगोळ, अदिक तान लिख्सद व्यवस्था अदिक आग्या कोळाईन कि नी आंदरी कलस्या." 13 आग मूसा यहोशू हेसुर इनव तान सेवक समेत परमेश्वर उन पहाळ मा येरेदुन. 14 अदिक स्याणागोळ से आव ईद अंदकु होदुन, "यागासताका नाव नीम हात्ती वापस बरालेव आगासताका नीव ईल्या नाम हादी कायतेला ईरी; अदिक केळी, हारून अदिक हूर नीम सांगुळ आर; अगर यारदारा मुकदमा आदीत रा आंदुर दा हात्ती होगुल."

15 आग मूसा पहाळ मा येरेदुन, अदिक बादल पहाळ इक मुचबुळ्त. 16 आग यहोवा अन्द तेज सीनै पहाळ मा निवास माळ्त, अदिक अद बादल आऊन मा आर दिन ताका मुचकु ईत्त; अदिक सातवा दिशी आव मूसा अक बादल इन बीच दा टु कारदुन. 17 इस्त्राएलीगोळ्द नजर दा यहोवा अन्द महिमा पहाळ इन चोटी मा प्रचंड बेक्‍की इन घाई कांळ्सकु बिळतोगोद. 18 आग मूसा बादल इन बीच दा प्रवेश माळकु पहाळ मा येरेदुन. अदिक आव पहाळ मा चालीस दिन अदिक चालीस ईळ्लक ईत्तुन.