Êxodo 7

1 आग यहोवा मूसा से अंदुन, "केळ, ना नीनी फिरौन उन साटी परमेश्वर उन घाई ठहरूसतीन; अदिक नीन वार्ट हारून नीन नबी ठहरूस्‍यान. 2 जो जो आग्‍या ना नीनी कोळाईन अदा नी अनेत, अदिक हारून अदरी फिरौन से अंदान, यदुर देल आव इस्त्राएलीगोळी तान द्‍याश दा टु होळगोट्‍टान. 3 ✝7:3 प्रेरितगोळ 7:36लेकीन ना फिरौन उन मन इक कठोर माळाईन, अदिक तान हापाळ सा चिन्‍ह अदिक चमत्कार मिस्त्र द्‍याश दा तोरसुसाईन. 4 तरी भी फिरौन नीम्‍द केळतीदील; अदिक ना मिस्त्र द्‍याश मा तान कय नेगुकु मिस्त्रीगोळी भारी दण्‍ड कोटकु तान सेना मतलब तान इस्त्राएली प्रजा अक मिस्त्र द्‍याश टु तेग्‍द बुळाईन. 5 अदिक याग ना मिस्त्र मा कय वाळुसकु इस्त्राएलीगोळी आंदुर बीच दा टु तेगाईन, आग मिस्त्री अर्त कोंडार कि ना यहोवा हुईन." 6 आग मूसा अदिक हारून यहोवा अन आग्‍या अन अनुसार अच माळदुन. 7 याग आंदुर फिरौन से मात माळली कुरतुर आग मूसा अस्‍सी साल इन, अदिक हारून तिर्‍यास्सी साल इन ईरोन.

हारून उन कोल

8 बाक यहोवा मूसा अदिक हारून से ईत्‍ता प्रकार अंदुन, 9 "याग फिरौन नीम से अनुल, ‘तान प्रमाण इन यातोदारा चमत्कार तोर्सी,’ आग नी हारून से अनेत, ‘तान कोल हुडुकु फिरौन उन मुंद हाक्‍क बुळ कि अद हाव बनसेगुल.’" 10 आग मूसा अदिक हारून फिरौन उन हात्‍ती होगकु यहोवा अन आग्‍या अन अनुसार माळदुर; अदिक याग हारून तान कोल फिरौन अदिक आऊन कर्मचारीगोळ्‍द मुंद हाकदुन, आग अद हाव बनसेत. 11 ✝7:11 २ तीमुथियुस 3:8आग फिरौन पण्‍डीतगोळ अदिक जादु टोना माळावाळेरी कारसुसदुन; अदिक मिस्त्र अन जादूगरगोळ बंदकु तान तान तंत्र-मंत्र देल हांगा माळदुर. 12 आंदुर भी तान तान कोलगोळी हाक्‍क बुट्‍टुर, अदिक अव भी हाव बनसेदव. लेकीन हारून उन कोल आंदुर कोलगोळी नुंगबुळ्‍त. 13 लेकीन फिरौन उन मन मात्‍त यक्‍कुल कठिन आगेत, अदिक यहोवा अन वचन इन अनुसार आव मूसा अदिक हारून उन मातगोळी मान्‍सीदील.

पयला विपत्ती-नीर इन रक्ता बनसोद

14 आग यहोवा मूसा से अंदुन, "फिरौन उन मन कठोर आगेग्‍याद अदिक आव ई प्रजा अक होग गोळालुन. 15 याग फिरौन व्‍हातुर इन होती गांगा अन्द किनारा मा बंदान आ समय नी आऊन हात्ती होगेत; अदिक जो कोल हाव बनसेगीत, अदरी कय दा हुडुकु नील गांगा अन किनारा मा आऊन से मुलाकात माळोर साटी निदुरकु ईरेत. 16 अदिक आऊन से ईत्‍ता प्रकार अनेत, ‘इब्रीगोळ परमेश्वर यहोवा नानी ईद अनोर साटी नीन हात्‍ती कळ्‍यान कि नान प्रजा अन लॉकुरी होगगोळ, यदुर देल आंदुर आळी दा नान उपासना माळ्‍यार; अदिक ईगास ताका नी नान मात मान्सीदील. 17 ✝7:17 प्रकाशितवाक्य 16:4यहोवा ईद अनतान, ईदुर देल नी जान्‍स कोंड्‍या कि ना अच परमेश्वर हुईन; नोळ, ना तान कय इन कोल इक नील गांगा अन किनारा मा बडाईन, अदिक नीर रक्‍ता बन्‍सेदीत, 18 अदिक जो मेनगोळ नील गांगा दा आव अव सोतोदाव, अदिक गांगा वास बरली हत्तीत, अदिक गांगा अन नीर कुडोर साटी मिस्त्रीगोळ्द योग्य ईरतीदील.’" 19 बाक यहोवा मूसा से अंदुन, "हारून से अन कि तान कोल हुडुकु मिस्त्र द्‍याश दा याट नीर आद, मतलब अदुर्द गांगागोळ, नयरगोळ, झीलगोळ, अदिक डोबनगोळ, सप्‍पा अन म्‍याकुच तान कय वाळुस कि अऊर्द नीर रक्‍ता बनसेगुल; अदिक पुरा मिस्त्र द्‍याश दा काठ अदिक कल्‍ल येढ्‍ढु भाति इन नीर इन पात्रगोळ दा रक्‍ता अच रक्‍ता आगेदीत."

20 ✝ 7:20 भजन संहिता 78:44; 105:29 आग मूसा अदिक हारून यहोवा अन आग्‍या अन अनुसार माळदुर, मतलब आव कोल इक नेगुकु फिरौन अदिक आऊन कर्मचारीगोळ्‍द नोळतेला नील गांगा अन नीर मा बळदुन, अदिक गांगा अन सप्‍पा नीर रक्‍ता बनसेत. 21 अदिक नील गांगा दा जो मेनगोळ ईरव अव सोतोदव; अदिक गांगा दा टु वास बरली कुर्त, अदिक मिस्त्री लॉकुर गांगा अन नीर कुडु सकीदील; अदिक पुरा मिस्त्र द्‍याश दा रक्‍ता अच रक्‍ता आगेत. 22 आग मिस्त्र अन जादूगरगोळ भी तान तंत्र-मंत्र देल हांगा माळदुर; तरी भी फिरौन उन मन कठोर आगेत, अदिक यहोवा अन अना अनुसार आव मूसा अदिक हारून उन मान्‍सीदील. 23 फिरौन ईदुर मा भी ध्‍यान कोटीदील, अदिक मार्रा तिर्गुसकु तान मान्‍नी होटोदुन. 24 अदिक सप्‍पा मिस्त्री लॉकुर कुडा नीर इन साटी नील गांगा अन आसपास अगुळली हतदुर, यतिकी आंदुर गांगा अन नीर ईला कुडु सकोर.

25 याग यहोवा नील गांगा अक बळदीदुन आगी टु येळ दिन आगेगीदव.