लैव्यव्यवस्था 13

चर्म रोग इन बारा दा नियम

1 बाक यहोवा मूसा अदिक हारून से अंदुन, 2 "याग यावारा मंळसा अन्द मय इन तोगुल दा सुजन या चट्टा या दाग ईरूल, अदिक इदुर देल आऊन तोगुल दा कोळ इन व्याधि इन घाई येनारा कांळ्सकु बिळुल रा आऊक हारून याजक उन हात्ती या आऊन पार जो याजक आन, आंदुर दा टु यारीकारा हात्ती ओईल. 3 याग याजक आऊन तोगुल इन चट्टा अक नोळुल, अदिक अगर आ चट्टा अन जागा अन्द चुट्टीगोळ बिळेव आगेग्याव अदिक चट्टा तोगुल देल गहरा कांळ्सकु बिळुल, रा आव जान्स कोमुल कि कोढ़ इन चट्टा हुव; अदिक याजक आ मंळसा अक नोळकु आऊक अशुद्ध ठहरूसुल. 4 पर अगर अद चट्टा आऊन तोगुल दा बिळीद ईरूल, लेकीन तोगुल देल गयरा कांळ्सबाळुल, अदिक अलेव चुट्टी बिळेव हैलेच, रा याजक आऊक येळ दिन ताका अलग माळकु ईटुल; 5 अदिक सातवा दिशी याजक आऊक नोळुल, अदिक अगर अद चट्टा ह्यांग चा हांग अच कांळ्सुल अदिक आऊन तोगुल दा फैलुसकु ईरबाळुल, रा याजक आऊक मात्त येळ दिन ताका अलग माळकु ईटुल; 6 अदिक सातवा दिशी याजक आऊक मात नोळुल, अदिक अगर नोळुल कि चट्टा अन चमक कम आद अदिक चट्टा तोगुल मा फैलुसकु हैलेच, रा याजक आऊक शुद्ध ठहरूसुल; यतिकी आऊन रा तोगुल दा सिर्फ चट्टा आद; अदिक आव तान कपळा तोळुकु शुद्ध आगेगुल. 7 पर अगर याजक उन आ जाच इन बाद्दा यदुर दा आव शुद्ध ठहरूसकु आगीदुन, अद चट्टा आऊन तोगुल मा हापाळ फैलुसेग्याद, रा आव बाक याजक उक तोर्सकु आगुल; 8 अदिक अगर याजक उक कांळ्सुल कि चट्टा तोगुल दा फैलुसेग्याद, रा आव आऊक अशुद्ध ठहरूसुल; यतिकी अद कोढ़ अच हुन.

9 "अगर कोढ़ इन घाई चट्टा यातोदारा मंळसा अक ईरूल, रा आऊक याजक उन हात्ती पोहचुस्कु आगुल; 10 अदिक याजक आऊक नोळुल, अदिक अगर अद सुजन आऊन तोगुल दा बिळीद आगुल, अदिक अदुर कारण चुट्टी भी बिळेव कांळ्सुल, अदिक आ सुजन दा बिना तोगुल इन मास ईरूल, 11 रा याजक जानसुल कि आऊन तोगुल दा हाळोद कोढ़ आद, इदुरसाटी आव आऊक अशुद्ध ठहरूसुल; अदिक बंद ईटबाळुल, यतिकी आव रा अशुद्ध आन. 12 अदिक अगर कोढ़ यावारा मंळसा अन्द तोगुल दा ईल ताका फैलुसेगुल, कि येल्यारा भी याजक नोळुल रोगी इन ताल्ला टु तरकाल ताका कोढ़ पुरा तोगुल इक जकळुस कोंडाद, 13 रा याजक ध्यान देल नोळुल, अदिक अगर कोढ़ आऊन पुरा मय इक जकळुस कोंडाद, रा आव आ मंळसा अक शुद्ध ठहरूसुल; अदिक आऊन मय जो बिलकुल बिळीद आगेग्याद आव शुद्ध अच ठहरूसुल. 14 पर याग आऊन दा बिना तोगुल इन मास कांळ्सकु बिळुल, आग रा आव अशुद्ध ठहरूस्यान. 15 अदिक याजक बिना तोगुल इन मास इक नोळकु आऊक अशुद्ध ठहरूसुल; यतिकी हांगा बिना तोगुल इन मास अशुद्ध अच ईरतद; अद कोढ़ हुन. 16 पर अगर अद बिना तोगुल इन मास बाक बिळीद आगेदीत, रा आव मंळसा याजक उन हात्ती होटोगुल, 17 अदिक याजक आऊक नोळुल, अदिक अगर अद चट्टा दुबारा मात्त बिळीद आगेत्याद, रा याजक रोगी इक शुद्ध जान्सुल; आव शुद्ध आन.

18 "बाक अगर यावारा मंळसा अन्द तोगुल दा फ्वाळा आगकु चंगा आगेग्यान, 19 अदिक फ्वाळा अन्द जागा दा बिळीद सुजन या क्याचांद घाई बिळीद दाग ईरूल, रा अद याजक उक तोर्सकु आगुल; 20 अदिक याजक आ सुजन इक नोळुल, अदिक अगर अद तोगुल देल गयरा कांळ्सकु बिळुल, अदिक अदुर चुट्टी भी बिळेव आगीदाव, रा याजक ईद जान्सकु आ मंळसा अक अशुद्ध ठहरूसुल; यतिकी अद कोढ़ इन चट्टा हुन जो फ्वाळा दा टु वडुकु होटाद. 21 लेकीन अगर याजक नोळुल कि अदुर्दा बिळीद चुट्टी हैलेच, अदिक अद तोगुल देल गयरा हैलेच, अदिक अदुर्द चमक कम आगेग्याद, रा याजक आ मंळसा अक येळ दिन ताका बंद माळकु ईटुल. 22 अदिक अगर अद चट्टा आ समय ताका तोगुल दा खराखुरा फैलुसेगुल, रा याजक आ मंळसा अक अशुद्ध ठहरूसुल; यतिकी अद कोढ़ इन चट्टा हुन. 23 लेकीन अगर अव दाग फैलुसालव अदिक तान जागा मा का बन्सकु ईरताव, रा अद फ्वाळा अन्द दाग हुन; याजक आ मंळसा अक शुद्ध ठहरूसुल.

24 "बाक अगर यावारा मंळसा अन्द तोगुल दा होत्‍तोद घाव ईरूल, अदिक आ होतकु घाव दा बिना तोगुल इन दाग क्याचांद आगतेला बिळीद या बिळीद अच आगेगुल, 25 रा याजक आऊक नोळुल, अदिक अगर आ दाग दाकळव चुट्टी बिळेव आगेग्याव अदिक अद तोगुल से गयरा कांळ्सकु बिळुल, रा अद कोढ़ हुन; जो आ होतकु दाग दा टु वडुकु होटाद; याजक आ मंळसा अक अशुद्ध ठहरूसुल; यतिकी आऊन दा कोढ़ इन चट्टा आद. 26 पर अगर याजक नोळुल, कि दाग दा बिळीद चुट्टी हैलेच अदिक न अद तोगुल से येनु गयरा हैलेच, अदिक अदुर्द चमक कम आगेग्याद, रा याजक आऊक येळ दिन ताका अलग माळकु ईटुल, 27 अदिक सातवा दिशी याजक आऊक नोळुल, अदिक अगर अद तोगुल दा फैलुसेग्याद, रा आव आ मंळसा अक अशुद्ध ठहरूसुल; यतिकी आऊक कोळ इन चट्टा आद. 28 लेकीन अगर अद दाग तोगुल दा ईला फैलुसीदाद अदिक तान जागा मा यल इन अल बन्सकु ईरूल, अदिक अदुर्द चमक कम आगेग्याद, रा अद होतदुर कारण बातकु आद, याजक आ मंळसा अक शुद्ध ठहरूसुल; यतिकी अद दाग होतदुर कारण देल आद.

29 "बाक अगर यावारा गंळ्स या आर्त इन ताल्ला मा, या गंळ्स उन दाढ़ी दा चट्टा ईरूल, 30 रा याजक चट्टा अक नोळुल, अदिक अगर अद तोगुल से गयरा कांळ्सकु बिळुल, अदिक अदुर दा भुरा-भुरा पतला चुट्टी ईरूल, रा याजक आ मंळसा अक अशुद्ध ठहरूसुल; अद चट्टा चर्मरोग, मतलब ताल्ला या दाढ़ी इन कोढ़ हुन. 31 अदिक याजक चर्मरोग अन्द चट्टा अक नोळुल, कि अद तोगुल से गयरा हैलेच अदिक अदुर्दा करेव-करेव चुट्टी हैलेच, रा याजक चर्मरोग अन्द रोगी इक येळ दिन ताका अलग माळकु ईटुल, 32 अदिक सातवा दिशी याजक चट्टा अक नोळुल, आग अगर चर्मरोग फैलुसकु ईला ईरूल, अदिक अदुर्दा भुरा-भुरा चुट्टी ईला ईरूल, अदिक चर्मरोग तोगुल से गयरा कांळ्सकु ईला बिळुल, 33 रा आ मंळसा अक मुंडन माळकु आगुल, लेकीन यल चर्मरोग आग्याद अल मुंडन माळकु आग बाळुल; अदिक याजक आ चर्मरोग हतकु मंळसा अक अदिक भी येळ दिन ताका अलग माळुल; 34 अदिक सातवा दिशी याजक चर्मरोग अक नोळुल, अदिक अगर अद चर्मरोग तोगुल दा फैलुस्कु हैलेच अदिक तोगुल से गयरा कांळ्सकु बिळाल, रा याजक आ मंळसा अक शुद्ध ठहरूसुल; अदिक आव तान कपळा वगुकु शुद्ध ठहरूसुल. 35 पर अगर आऊन शुद्ध ठहरूसोद बाद्दा चर्मरोग तोगुल दा थ्वाळासा भी फैलुसुल, 36 रा याजक आऊक नोळुल, अदिक अगर अद तोगुल दा फैलुसकु ईरूल, रा याजक भुरा चुट्टी इक ढुंढ्स बाळुल, यतिकी आ मंळसा अशुद्ध आन. 37 लेकीन अगर आऊन नजर दा अद चर्मरोग ह्यांग इन हांग बन्सकु ईरूल, अदिक अदुर्दा करेव-करेव चुट्टी जमस्कु ईरूल, रा आव जान्सुल कि दाग वळ्लीद आगेग्याद, अदिक आ मंळसा शुद्ध आन; याजक आऊक शुद्ध अच ठहरूसुल.

38 "बाक अगर यावारा गंळ्स या आर्त इन तोगुल दा बिळेव दाग ईरूल, 39 रा याजक नोळुल, अदिक अगर आऊन तोगुल दा अव दाग कम बिळेव ईरूल, रा आव जान्सुल कि आऊन तोगुल दा होटकु दाद अच हुन; आ मंळसा शुद्ध ठहरूसुल.

40 "बाक या मंळसा अन्द ताल्ला अन्द चुट्टीगोळ झळसेग्याव, रा जान्सेतीर कि आव टकला रा आन लेकीन शुद्ध आन. 41 अदिक यावारा मंळसा अन्द ताल्ला अन्द मुंदळव चुट्टी झळसेग्याव, रा आव ताल्ला देल रा टकला आन लेकीन शुद्ध आन. 42 लेकीन अगर टकला ताल्ला मा या टकला ह्याणा मा क्याचांद बिळीद चट्टा ईरूल, रा जान्सेतीर कि अद आऊन टकला ताल्ला या टकला ह्याणा मा होटकु कोढ़ हुन. 43 इदुरसाटी याजक अदरी नोळुल, अदिक अगर चट्टा अन्द सुजन आऊन टकला ताल्ला या टकला माथा मा हिंग लाली हुळकु बिळीद ईरूल जसा चमळी इन कोढ़ दा ईरतद, 44 रा आ मंळसा कोढ़ी आन अदिक अशुद्ध आन; अदिक याजक आऊक जरूर अशुद्ध ठहरूसुल; यतिकी अद चट्टा आऊन ताल्ला मा आद.

45 "यारदा ई चट्टा ईरूल आ कोढ़ी इन कपळा हरकु अदिक ताल्ला अन्द चुट्टी बगरूस्कु ईरूल, अदिक आव तान म्याकळोद टुट्टी इक मुचकु अशुद्ध-अशुद्ध कारूतेला ईरूल. 46 यास दिन ताका अद चट्टा आऊन दा ईरूल आस दिन ताका आव रा अशुद्ध ईत्तान; अदिक आव अशुद्ध ठहरूसकु ईरूल; इदुरसाटी आव आबना अच ईरूल, आऊन ईरोद जागा छावनी इन व्हार्या ईरूल.

कपळा या तोगुल इन वस्तु उन कोढ़

47 "बाक या कपळा दा कोढ़ इन चट्टा ईरूल, चाहे अद कपळा ऊन इन ईरूल या सन इन, 48 अद चट्टा चाहे आ सनी या ऊन इन कपळा अन्द होल्द ईरूल या बन्सकु ईरूल, या अद चट्टा तोगुल दा या तोगुल इन माळकु यातोदारा वस्तु दा ईरूल, 49 अगर अद चट्टा यातोदारा कपळा अन्द चाहे होल्द ईरूल चाहे बन्सकु ईरूल, या तोगुल दा या तोगुल इन यातोदारा वस्तु दा हिवरा ईरूल या क्याचाँद सा ईरूल, रा जान्सेतीर कि अद कोढ़ इन चट्टा हुंद अदिक अद याजक उक तोर्सकु आगुल. 50 अदिक याजक चट्टा अक नोळुल, अदिक चट्टा हतकु आ वस्तु उक येळ दिन इन साटी अलग माळुल; 51 अदिक सातवा दिशी आव आ चट्टा अक नोळुल, अदिक अगर अद कपळा अन्द चाहे होल्द ईरूल चाहे बन्सकु ईरूल, या तोगुल दा या तोगुल इन माळ्द यातोदारा वस्तु दा फैलुस्कु ईरूल, रा जान्सेतीर कि चट्टा हानिकारक कोळ हुंद, इदुरसाटी अद वस्तु , चाहे ह्यांगारा क्याल्सा दा येती न बरबाळुल, तो भी शुद्ध ठहरूसीत. 52 आव आ कपळा अक अदुर्द ताना या बाना दा अद चट्टा ईरूल, चाहे अद ऊन इन ईरूल चाहे सनी इन ईरूल, या तोगुल इन, या तोगुल इन वस्तु ईरूल, अदरी होताकबुळुल, अद चट्टा हानिकारक कोढ़ इन हुंद; अद वस्तु बेक्की दा होताक्कु आगुल.

53 "अगर याजक नोळुल कि अद चट्टा आ कपळा अन्द होल्द या बन्सकु, या तोगुल इन वस्तु दा फैलुसकु हैलेच, 54 रा या वस्तु दा चट्टा ईरूल अदरी तोळोद आग्या याजक कोळुल, आग आऊक मात्त येळ दिन ताका अलग माळकु ईट्टुल; 55 अदिक आऊन तोळदुर बाद्दा याजक आऊक नोळुल, अदिक अगर चट्टा अन्द न रा रंग बदलुसकु ईरूल, अदिक न चट्टा फैलुसकु ईरूल, रा जान्सेतीर कि अद अशुद्ध आद; अदरी बेक्की दा होताकेतीर, यतिकी चाहे अद चट्टा बुळ्क चाहे म्याकुच ईरूल तो भी अद फैलुसावाळा चट्टा हुन. 56 पर अगर याजक नोळुल, कि आऊन तोळदुर बाद्दा चट्टा अन्द चमक कम आगेग्याद, रा आव अदरी कपळा अन्द चाहे होल्द चाहे बन्सकु दा टु, या तोगुल दा टु हरूकु तेगुल; 57 अदिक अगर अद चट्टा आग भी आ कपळा अन्द होल्द या बन्सकु दा, या तोगुल इन आ वस्तु दा कांळ्सकु बिळुल, रा जान्सेतीर कि अद वोळकु होळ्त चट्टा हुंद; अदिक यदुर्दा अद चट्टा ईरूल अदरी बेक्की दा होताकेतीर. 58 अगर आ कपळा देल अदुर्द होल्द या बन्सकु दा चट्टा ईरूल, या तोगुल इन जो वस्तु ईरूल अदरी याग तोळुकु आगुल अदिक चट्टा होगतेला ईरूल, रा अद दुसरा घन तोळुकु शुद्ध ठहरूसुल."

59 ऊन या सनी इन कपळा अन्द होल्द या बन्सकु दा, या तोगुल इन यातोदारा वस्तु दा जो कोढ़ इन चट्टा ईरूल अदुर शुद्ध अदिक अशुद्ध ठहरूसोद ईदा व्यवस्था हुंद.