लैव्यव्यवस्था 4

पापबली इन विधी

1 बाक यहोवा मूसा से अंदुन, 2 "इस्राएलिगोळ से ईद अन कि अगर यावारा मंळसा आ क्याल्सागोळ दा टु यदरी यहोवा मना माळीदुन, यातोदारा क्याल्सा अक भूल देल माळकु पापी आगेगुल; अदिक इंदुर दा टु यावारा ऊंद मंळसा माळ्यान." 3 अदिक अभिषित याजक हिंग पाप माळुल, अदुर देल प्रजा दोषी ठहरूसुल, रा तान पाप इन कारण आव ऊंद हारोद वस्ता अक यहोवा अन्द पापबली माळकु येरसुल. 4 आव आ हारोद वस्ता अक भेंटमाळोद तम्बू उन दरवाजा मा यहोवा अन्द मुंद ओतकु अदुर ताल्ला मा कय ईटुल, अदिक आ हारोद वस्ता अक यहोवा अन मुंद बली कोळुल. 5 अदिक अभिषित याजक हारोद वस्ता अन्द रकत दा टु येनारा ओतकु भेंटमाळोद तम्बू दा ओईल; 6 अदिक याजक तान बेल्ल रकत दा नेनाक-नेनाक्कु अदिक अदुर दा टु येनारा ओतकु पवित्र जागा अन्द न्याड्यावाळा परदा अन्द मुंद यहोवा अन मुंद येळ घन सिपसुल. 7 अदिक याजक आ रकत दा टु येनारा मात्त हुळकु सुगन्धित धूप इन वेदी इन सींगगोळ मा जो भेंटमाळोद तम्बू दा आद यहोवा अन्द मुंद हचदुर; बाक वस्ता अन्द सप्पा रकत इक वेदी इन पायवा मा होमबली इन वेदी जो भेंट माळोद तम्बू उन दरवाजा मा आद हाक्क बुट्टुर. 8 बाक आव पापबली इन वस्ता अन्द सप्पा न्याण इक अदुर दा टु अलग माळुल, मतलब या न्याण देल कळ्लपच्चीगोळ झाक्सकु ईरताव, अदिक याट न्याण अदुर्दा गुंळ्सकु आगतद, 9 अदिक येढ्ढु फॉफसागोळ अदिक अदुर म्याकुच इन न्याण जो नेळु उन हात्ती ईरतद, अदिक फॉफसागोळ सांगुळ ईरग्या अन्द म्याकुच इन परत, ईव सप्पा चिज इक हिंग अलग माळुल, 10 ह्यांग मेल-मिलाप इन चढ़ावा अन वस्ता से अलग माळकु आगताव, अदिक याजक ईदरी होमबली इन वेदी मा होताकुल. 11 लेकीन आ पाड्डा अन्द तोगुल, काल, ताल्ला, कळ्लपच्चीगोळ, सेंगळी, 12 अदिक पुरा मास, मतलब पुरा वस्ता छावनी से व्हार्या शुद्ध जागा मा, यल राख हाक्कु आदीत, ओतकु हुळ्लीगोळ मा ईटकु बेक्की देल होताकुल; यल राख हाक्कु आगतद अद अल्या होताक्कु आगुल. 13 "अगर इस्राएल इन पुरा मंडली अग्यानता अन कारण पाप माळुल अदिक अद मात मंडली इन कण्णगोळ देल होचकु आद, अदिक आंदुर यहोवा अन्द यातोदु आग्या अन खिलाप येनारा माळकु दोषी ठहरूस्यार." 14 रा याग आंदुर्द माळ्द पाप प्रगट आगुल आग मंडली ऊंद वस्ता अक पापबली माळकु येरसुल. आव अदरी भेंटमाळोद तम्बू उन मुंद ओईल, 15 अदिक मंडली इन स्याणा हाळाबाट्टुर तान-तान कयगोळी यहोवा अन्द मुंद वस्ता अन ताल्ला मा ईटुल, अदिक आ वस्ता यहोवा अन्द मुंद बली माळकु आगुल. 16 आग अभिषिक्त याजक वस्ता अन्द रकत दा टु थ्वाळासा भेटवाळा तम्बु दा ओईल; 17 अदिक याजक तान बेळ्ल रकत दा नेनाक-नेनाक्कु अदरी न्याड्यावाळा परदा अन्द मुंद येळ घन यहोवा अन्द मुंद सिपसुल. 18 अदिक अदा रकत दा टु वेदी इन सींगगोळ मा जो यहोवा अन्द मुंद भेंट माळोद तम्बू दा आद हचुल; अदिक मिक्द सप्पा रकत होमबली इन वेदी इन पायवा मा जो भेंटमाळोद तम्बू उन दरवाजा मा आद हाक्क बुळुल. 19 अदिक याजक वस्ता अन सप्पा न्याण तेगुकु वेदी मा होताकुल. 20 ह्यांग पापबली इन वस्ता अन्द सांगुळ माळीद हांग अच ईदुर सांगुळ भी माळुल; ई प्रकार याजक इस्राएलीगोळ साटी प्रायश्चित माळुल, आग आंदुर पाप माफ माळकु आदव. 21 अदिक आ वस्ता अक छावनी टु व्हार्या ओतकु हांग अच होताकुल ह्यांग पयले वस्ता अक होताकीद; ईद रा मंडली इन निमित्त पापबली ठहरूसीत. 22 "याग यावारा प्रधान गंळ्स पाप माळुल, मतलब तान परमेश्वर यहोवा अन्द यातोदारा भी आग्या अन्द खिलाप भूल देल येनारा माळकु दोषी आगेगुल, 23 अदिक आऊन पाप आऊन मा प्रगट आगेगुल, रा आव ऊंद तंदरूस्त व्हात बलिदान माळोर साटी तरूल; 24 अदिक व्हात इन ताल्ला मा तान कय ईटुल, अदिक व्हात इक आ जागा मा बली माळुल यल होमबली पशु यहोवा अन्द मुंद बली माळकु आगताव; ईद पापबली ठहरूसीत." 25 आग याजक तान बेळ्लगोळ देल पापबली पशु उन रकत दा टु थ्वाळासा ताकोमकु होमबली इन वेदी इन सींगगोळ मा हचुल, अदिक अदुर्द रकत होमबलि इन वेदी इन पायवा मा पलटुस बुळुल. 26 अदिक आव अदुर्द पुरा न्याण इक मेलबली इन न्याण इन घाई वेदी मा होताकुल; अदिक याजक आऊन पाप इन बारा दा प्रायश्चित माळुल, आग आव माफ माळकु आदान. 27 "अगर साधारण लॉकुर दा टु यावारा अग्यानता देल पाप माळुल, मतलब यातोदारा हिंग क्याल्सा यदरी यहोवा मना माळीदान अदरी माळकु दोषी ठहरूसुल, अदिक आऊन अद पाप आऊन मा प्रगट आगेगुल, 28 रा आव आ पाप इन कारण ऊंद तंदरूस्त मर्री बलिदान माळोर साटी तरूल; 29 अदिक आव तान कय पापबली पशु उन ताल्ला मा ईटुल, अदिक होमबली इन जागा मा पापबलि पशु उन बलिदान माळुल." 30 अदिक याजक अदुर रकत दा टु तान बेळ्ल देल थ्वाळासा ताकोमकु होमबली इन वेदी इन सींगगोळ मा हचुल, अदिक अदुर सप्पा रकत इक अदा वेदी इन पायवा मा पलटुस बुळुल. 31 अदिक आव अदुर्द सप्पा न्याण इक मेलबली पशु उन घाई अलग माळुल, आग याजक आऊक वेदी मा यहोवा अन्द निमित्त सुखदायक सुगन्ध इन साटी होताकुल; अदिक ई प्रकार याजक आऊन साटी प्रायश्चित माळुल, आग आऊक माफी सिक्कीत. 32 "अगर आव पापबली इन साटी ऊंद म्यांडा अन्द पाड्डा तरूल, रा अद तंदरूस्त मादा ईरूल, 33 अदिक आव तान कय पापबली पशु उन ताल्ला मा ईटुल, अदिक अदरी पापबलि इन साटी अल्या बलिदान माळुल यल होमबली पशु बली माळकु आगताव." 34 आग याजक तान बेळ्लगोळ देल पापबली इन रकत दा टु थ्वाळासा ताकोमकु होमबली इन वेदी इन सींगगोळ मा हचुल, अदिक अदुर्द सप्पा रकत इक वेदी इन पायवा मा पलटुस बुळुल. 35 अदिक आव अदुर्द सप्पा न्याण इक मेलबलीवाळा मेमना अन्द न्याण इन घाई अलग माळुल, अदिक याजक अदरी होमबली मा यहोवा अन्द चढावागोळ्द म्याकुच होताकुल; अदिक ई प्रकार याजक आऊन पाप साटी प्रायश्चित माळुल, अदिक आव माफ माळकु आदान.