लैव्यव्यवस्था 3

मेल-मिलाप बलिदान इन विधी

1 "अगर आऊन चढ़ावा मेल-मिलाप इन आगुल, अदिक अगर आव पालस्द पशु दा टु यारीकारा येरसुल, रा बाक अद पशु नर आगुल या मादा, लेकीन जो तंदरूस्त ईरूल अदरी का आव यहोवा अन्द मुंद येरसुल. 2 अदिक आव तान कय तान चढ़ावा अन्द पशु उन ताल्ला मा ईट्टुल अदिक अदरी भेंटमाळोद तम्बू उन दरवाजा मा बली कोळुल; अदिक हारून उन पार जो याजक आन आंदुर आऊन रकत इक वेदी इन नाकु दी सिपसुल. 3 आव मेल-मिलाप दा टु यहोवा अन्द साटी होमबली इन बेक्की मा हाकुल, मतलब या न्याणद देल कळ्लपच्चीगोळ ढाक्सकु ईरताव, अदिक जो न्याण अदुर्दा गुंळ्सकु ईरतद अद भी, 4 अदिक येढ्ढु फॉफसागोळ अदिक अदुर म्याकुच इन न्याण जो नेळु उन हात्ती ईरतद, अदिक फॉफसा अन सांगुळ ईरग्या अन्द म्याकुच इन परत, ईव सप्पा अक आव अलग माळुल. 5 आग हारून इन पार इदरी वेदी मा आ होमबली इन म्याकुच होताकुल, जो आ हुळ्लीगोळ मा ईत्तीत जो बेक्की इन म्याकुच आद, कि ईद यहोवा अन्द साटी सुखदायक सुगन्धवाळा भेंट ठहरूसुल.

6 "अगर यहोवा अन्द मेल-मिलाप बलिदान इन साटी चढ़ावा पालस्द पशु दा टु ईरूल, रा चाहे अद नर आगुल या मादा, लेकीन जो तंदरूस्त ईरूल अदरी का आव येरसुल. 7 अगर आव म्यांडा अन्द पाड्डा येर्सतान, रा अदरी यहोवा अन्द मुंद येरसुल, 8 अदिक आव तान चढ़ावा अन्द पशु उन ताल्ला मा कय ईटुल अदिक अदरी भेंटमाळावाळा तम्बु उन मुंद बली कोळुल; अदिक हारून उन पार अदुर रकत इक वेदी इन नाकु दी सिपसुल. 9 आग मेलबली इक यहोवा अन्द साटी बेक्की इन होमबली मा हाकुल, अदिक अदुर न्याण तुमकु धोळ पुसटी अद रीढ़ इन हात्ती टु अलग माळुल, अदिक या न्याण देल कळ्लपच्चीगोळ ढाक्सकु ईरताव, अदिक जो न्याण अदुर्दा गुंळ्सकु ईरतद, 10 अदिक येढ्ढु फॉफसागोळ, अदिक जो न्याण अदुर म्याकुच नेळु उन हात्ती ईरतद, अदिक फॉफसागोळ सांगुळ ईरग्या अन म्याकुच इन झिल्ली, ईव सप्पा चीज इक आव अलग माळुल. 11 अदिक याजक इदरी होमबली मा होताकुल; ईद यहोवा अन्द साटी भेंट रूपी ऊमोद ठहरूसुल.

12 "अगर आव मर्री येरसुल, रा अदरी यहोवा अन्द मुंद येरसुल. 13 अदिक आव तान कय अदुर ताल्ला मा ईटुल, मात्त अदरी भेंटमाळोद तम्बू उन मुंद बली कोळुल; अदिक हारून उन पार अदुर्द रकत इक वेदी इन नाकु दी सिपसुल. 14 आग आव अदुर दा टु तान चढ़ावा यहोवा अन्द साटी बेक्की इन होमबली मा येरसुल, अदिक या न्याण देल कळ्लपच्चीगोळ ढाक्सकु ईरताव, अदिक जो न्याण अदुर्दा गुंळ्सकु ईरतद अद भी, 15 अदिक येढ्ढु फॉफसागोळ अदिक जो न्याण अदुर म्याकुच नेळु उन हात्ती ईरतद, अदिक फॉफसागोळ सांगुळ ईरग्या अन्द म्याकुच इन परत, ईव सप्पा चिज इक आव अलग माळुल. 16 अदिक याजक इदरी होमबली मा होताकुल; ईद भेंट रूपी ऊमोद हुन जो सुखदायक सुगन्ध इन साटी ईरतद; यतिकी पुरा न्याण यहोवा अन हुन. 17 ईद नीम ईरा जागा दा नीम पीढ़ी-पीढ़ी इन साटी हमेशा अन्द विधी ठहरूसीत कि नीव न्याण अदिक रकत यागलु तिनबाळी."